Al codolà o salesà al ze an tipo partegolar de pavimentasion fata de sass doperada te le ciusure orizontai de base.

File:Pavimento codolà.JPG
Codolà co elementi decorativi a Sessmenor (Sess)

Costrusion e materjai doperadi canbia

Par prima roba se posta i sass controtera in modo da crear na serta aerasion. A sto punto co la sabia se parecia na superficie o ben o mal pjana aonde scominsiar a far al codolà. Par farlo de solito se selesiona sass ruiss (o altri sass duri) pitost smussadi e co na sagoma cilindrica o piramidal. A sto punto se i posta partendo da un canton in modo da crear an strato spess almanco na spana. La finidura la gnen fata a slargar sabia e a fracarla polito o a serar i buss intrà i sass co na stcianta de malta de calsina. Ten sta maniera i sass oltadi a ponta in do no i se sfila par colpa del atrito e se gnen a costituir na pavimentasion che pì la gnen usufruida e pì la se conpata. normalmente al codolà al gnen fat solche co un scopo funsional, ma qualche olta i sass i gnen postadi in modo da costituir dei decori.

Inpieghi canbia

De solito al codolà, par al tenpo e al costo dei materjai, al gnea fat te i staoi e te i porteghi, aonde che al ze necessario er an serto atrito parchè i animai no i sbrissie e che ghe n'è la esigensa de er an pavimento che al resiste par ani a la usura. Qualche olta se el cata par i stessi motivi anca te la pavimentasion stradal e in rari casi anca te le case, aonde che al podea costituir na alternativa a le pjere o al pavimento in tera batesta.

Al falso codolà canbia

A el dì de incoi a scopo estetego ten serti posti gnen fat de le pavimentasion che le ghe someja vagamente al codolà. Se trata de an strato pitost fin de sasset tonti incalcadi te un betume a base de cimento Portland. Se cognoss direti al inbrojo parchè la pavimentasion la ristcia de saltar sù par colpa del gias, no la se deforma ma la se creba se ghe passa sora an peso concentrà (tipo na roda de un camiun), i sass i ze pì pisoi e distanti, i interstisi i ga an color bluastro.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Codolà&oldid=1054349"