Verxi el menu prinsipałe
Sto articoło el xe scrito in padoan
Schema detajado che'l fa védare le struture che le fa parte del'aparato respiratorio. In alto a drita ghe xe desegnà l'insieme dei alvèoli, grupai in sachi alveolari, ventilai da bronchìoli ciamadi respiratori, orizenai come rami de bronchìoli lobulari e cussì via fin ai bronchi e la trachea.

L'aparato respiratorio xe l'insieme dei òrgani necessari a preparare el scanbio dei gas in fra sangue e aria anbientale, querzendo almanco do dei quatro processi fondamentali che i definisse la respirassion. Sti qua i xe la ventilassion, che la xe el spostamento dei volumi dei gas drento e fora dai loghi dove che se verìfega el passajo dopo, che'l xe el scanbio dei gas propiamente dito (o ematosi), durante el quale el sangue se svoda de un fià de anidride carbònica e'l se inpiena de ossìgeno.

I òrgani dove che sti processi i toe logo i xe, in te'l órdene che la sèvita l'ària durante l'inspirassion, xe:

In te'l corso del'espirassion l'aria la torna indrio longo st'altro verso; al fondo el passajo nasale xe facoltativo, in intrada come in insida, podendo l'aria ndare drento e fora anca par la boca (ventilassion orale, che respeto a quela nasale la incontra manco resistensa, ma xe manco bona de umidefegare e netare l'aria da partezele iritanti). Inspirassion e espirassion le xe le do fasi de la ventilassion. Va dito che sto siclo no poe èssare conpletà dai polmoni da soli, che i manca de na muscoladura propia bona par farlo: par sta razon, vien considarade funsionalmente parte del'aparato respiratorio anche le struture che ghe sta intorno, overo le pleure e le struture de la gabia toràcica (ossa, mùscoli, articolassion, ecc.), fondamentali par parmétare sto movimento vidale.

La destinsion funsionale sentrale par la fisiologia del'aparato respiratorio, la divide donca le vie aèree (a so volta destinte in superiori, fin a le corde vocali drento la laringe, e inferiori, che le va da la trachea ai bronchìoli terminali), i alvèoli (dove che xe pussìbile el scanbio dei gas) e'l sistema tòraco-polmonare (che co le so propietà mecàneghe parmete le escursion de volume che le definisse la ventilassion). La ventilassion xe garantida da muscoladura striada soto controlo volontario facoltativo, overo se no ghe se pensa la ponpa ventilatoria la funsiona da sola grassie a automatismi nervosi. Sti qua i xe stimoladi da le segnalassion de recetori che i ativa nùclei nervosi del tronco encefàlico, a so volta coligai ai mùscoli de la ventilassion, soratuto inportanti i xe quili ispiratori, come i intercostali esterni e'l diaframa. Se no la vien sforsada, l'espirassion la vien da sola, grassie al'elastissità dei polmuni.

L'aparato respiratorio xe fato da struture notevolmente deverse in fra le spece dei anemali. Mentre lo schema del'omo xe vàlido par tuti i altri mamìfari, tolti i lionfanti che i no ga i spassi plèurissi, i osei i no ga alvèoli ma struture ciamade sachi aerìferi e la gàbia toràcica la xe tanto più rìgida. I anfibi i respira co la pele oltra che coi polmuni, ma la difarensa più evidente se ga in te'i pessi, dove ghe xe struture ciamade sbaise (anca ciamade baise o bavise) che le filtra l'aqua traverso la quala l'anemale el nua. Anca le piante le fa respirassion traverso busi diti stomi, el flusso dei gas spesso el ga versi oposti de quelo dei eteròtrofi come i anemali (le consuma anidride carbònica e le produze ossìgeno).