Bondoła Połesana

Ła bondoła del Połesine xe un sałado tipico de Rovigo e ła so provinça. I comuni dove che el se trova xe Frasinełe Połesine, Viłamarzana, Pincara, Guarda Veneta, Frata Połesine, Rovigo, co ła so frasion de Grignano Połesine. Ogni centro e ogni becaro ga ła so riceta, ma grosomodo ła xe fata cusì: paston de straculo e spała de mas-cio in parti eguali; goła, panceta, cheno, sałe, pevare e ajo (dełe volte anca un s-ciantin de noxe moscada). Tuto vien maxenà co na piastra media, numero oto.El paston va po' insacà in na vesiga de mas-cio o de vedeło. Vien fora un sałado de forma tonda, che vien invecià dai do-tre mexi a un ano. El pexo, da fresco, xe un chiło, 7-8 eti quando xe sta invecià.

Come ke ła se cuxina

Prima de cuxinarla, ła bondoła va tegnù a bagno par qualche ora. Dopo ła se mete in na canevasa ligà a un bastonsin parchè no ła toche el fondo de ła pignata. Se cuxina pian pian, par 4-5 ore. Ła va servìa de bojo, co tanto purè de patate.