Briscoła el xe un xugo de carte difuxisimo in tuta Itàlia ma soratuto in Veneto.

Se xuga in 2 o 4 , ma ghe xe anca varianti co 3 o 5 xugadori, co un maso de carte (de sołito trevixane) da 40. Smisiae łe carte, bisogna darghene tre a xugador, e una ła va mesa soto el maso de łe carte coerte. Questa ła xe ciamà briscoła, e el seme de sta carta el vinse senpre. Scopo del xugo xe suparar i 60 punti, che se fà catando łe carte, secondo ła regola de ła carta-briscoła sora spiegà. Se infrà łe carte in toła, inte na man del xugo, no ghe xe briscołe, el seme pì forte el xe cheło che ga scominsià el turno. Eco el vałore de łe carte inte ła briscoła:

  • Aso: 11 punti
  • Tre: 10 punti
  • Re: 4 punti
  • Cavało: 3 punti
  • Fante: 2 punti
  • Tute łe altre: 0 punti

Łe prime do carte, el Aso e el Tre se ciamà Càrichi , łe carte che vałe xero xe ciamà scartini, scartełe o isij. Tajar vol dir meter so ła toła na carta-briscoła.

'N altro xugo co łe stese carte xe ła scoa

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Briscoła&oldid=1041494"