Cuatro Inperadori
I Cuatro Inperadori (四皇 Yonkō) i ze de i parsonaji che i conpare inte el manga japoneze One Piece dizenjà da Eiichirō Oda. I ze i comandanti de łe cuatro ciurme de pirati pì forti in asołuto inte el mondo de One Piece e i dòmina incontrastài tuto el Mondo Novo. Onji inperador el ze considarà na parsona asè forte e parigołoza, e solche in puchi i se azarda a sfìdarli o a mancàrghe de respeto. L'ezistensa de i Inperadori ła ze stà revełà da Monkey D. Garp inte el finałe de ła saga de Enies Lobby. A savemo donca che i Cuatro Inperadori i ze sti cuà: Shanks “El Roso”, Charlotte Linlin “Big Mom” (let. “Ła Mamona”), Kaido “de łe Sento Bestie”, Marshall D. Teach “Barbanera”. Vanti de ła Bataja Granda de Marineford a’l posto de Barbanera el jera inperador Edward Newgate “Barbabianca”, conosesto par èsar l’omo pì forte de’l mondo e copà in cheła bataja purpio dal pirata Barbanera che cusì el ga ciapà el só posto. I Cuatro Inperadori i ze i paroni asołuti de’l Mondo Novo siben che nisun de łuri el sipia bon de prevałer sora de chełaltri, e njanca ła Marina ła sarìa bona de contrastarli se la gavese da frontarli tuti insenbre o anca do a ła volta: par 'sto motivo onji 'olta che un inperador el ghe proa a incontrarse o scontrarse co n'altro el cuartier zenarale de ła Marina el va in màsemo ałarme par paura che 'sti cuà i meta su na ałeansa o na guera masa granda. I convive su che’l toco de mar in virtù de un dełicato ecuiłibrio che el stà in piè a mezo de ałeanse co chełaltre ciurme, ma anca a mezo de crìmini e de tramaci małavidozi e onjun el ga na ciurma fata su co parsonaji strapotenti e asè parìgołozi. Par de pì, oltra che ła ciurma, i ga a despozision na vera e propia armada de mar fata su co varie divizion navałi, onjuna de 'ste cuà capitanada da un comandante che el responde diretamente a l'inperador. A ze da dir che fin deso A no łe ze mai 'sta mostrà łe divizion de Shanks. In virtù de tuta 'sta forsa i ze paroni de łe varie ìzołe semenàe par el mar del Mondo Novo e onjuna de 'ste cuà ła ze soto ła protesion de ła bandiera del respetivo inperador.