Par fjen o fen se intende erba secada in maniera particolar, binada e inmagazinada co 'l scopo de darghela da magnar a serti animai, in particolar vache, cavai, caore e sede.

Na rotobala
Na rastreliera par secar al fjen a Sesto 'te la Val Pusteria

Anca serti animai mesteghi cei come conici e roditori i pol magnar fjen. In particolar par i conici la alimentaion pì justa la è a base de fjen, sensa cereai, pan, mangime o altro. Al fjen par i conici al representa al alimento principal, inportante anca par la salute de i dent fruandoli prim che i gnene grandi assei da dar problemi. I porsei invese i à problemi a digerir al fjen, a pì che no se ghe 'l dae dopo erlo assà qualche dì a maserar 'te l'aqua.

Al fjen al gnen doperà par guarnar le bestie quando e aonde che no ghe n'è pascoi assei par via de 'l clima (par esenpio de invern) o parchè i teren pì boni i gnen doperadi par altre coltivasion.

Al fjen al gnen tajà e ciot sù pì de na olta durante al an. Secont de 'l periodo che se fa sta operasion, al ciapa nomi diferenti:

  • fen se al è al primo tai
  • dorch o ardiva se al è al secondo tai
  • tersanin se al è al terso tai

Aonde che se pol tajar pì de 3 olte, al fjen fat dopo de 'l tersanin al feniss comunque co 'l gner considerà come tersanin.

Contenuto de 'l fjenCànbia

Te 'l fen se ciapa entro la gran part de i stech: se cata da le radicele a i radici da 'l mat a i diversi tipi de erba spiga. Se al gnen fat tardiu se pol catar anca al masacaval. La dorch de solito la è fata da strafoi, pjantan, erba spiga de dimension ridote, spagna, ladino, masacaval. Se al teren al è umido se pol catar anca fenocere. Al tersanin al à entro pjantan e altre erbe de dimension ridote.

Al è inportante sotolinear che al fjen fat a man al à entro anca na gran quantità de siess, che le costituiss an alimento conpleto e concentrà par le bestie che le lo magna. Al fjen fat co i machinari par quant al gnen sbatest co forsa, sichè al pers la gran part de le siess co 'n conseguente pejorament de la qualità, sichè se rende necessario integrar la dieta de le vache co na part de mangime.

Produsion de 'l fjenCànbia

La produsion de 'l fjen la à inisio da 'l segar l'erba. Sta operasion la gnen fata a partir da San Vetor, endo cura che al pra al scominsie a ciapar an color gialin-rossastro e che le spighe de la erba spiga le scominsie a piegarse do, segn che la siess la è madura. Sta operasion na olta la gnea fata co la fals, ma te i ultimi 100 ani al progresso al à portà prim a le bare falcianti tirade da i cavai, po' a le machine da segar e a la fin a le bare falcianti e a le bare rotanti da tacar te 'l trator. Na olta segada, l'erba la gnen secada a 'l sol. Parchè la se seche in maniera uniforme ogni tant la gnen oltada sot sora co la forca, o la gnen sghirlada co 'l girel. Se al loch laorà al è particolarmente umido, par poderla secar se la pica su struture particolari ciamade rastreliere. Se al fjen al è sech, ma no assei da gner cargà, al è inportante star atenti che no 'l se bagne. Te 'l caso che gnene ignans an tenporal, se pol salvarlo a farlo sù come marus. Na olta che al è pronto se 'l fa in rela, de solito doperando međi mecanizadi come al restelon. La racolta la pol gner fata co na inbalatrice, che la lo conpata in bale tonde o quadre, senò al pol gner cargà te 'l autocaricante.

ConservasionCànbia

Al è inportante che al fjen sech al stae senpre a 'l sut. Durante la conservasion par de pì al subiss de i processi de fermentasion che al è inportante che i sie ben ariedadi parchè le alte tenperature se gnen a generarse le podaree anca esser pericolose in fato de incendio. Al deposito de 'l fjen al se ciama fjenil e de solito al è sora a 'n staol, ma te le aziende moderne al tende a deventar an edificio par conto soo. te i pra magri de montagna al fjen al gnea cenest anca entro te i barch. Al fjen al gnen inmagazinà come bale o sfuso. Te 'l primo caso se varda de sielder la maniera de postar le bale in modo che le ciape manco posto che se pol. Te 'l secondo caso al fjen al gnen portà in qualche modo te 'l deposito, aonde che al gnen postà polito in maniera che al se conprime te quei grum che se ghe ciama moje. An nantra solusion par inmagazinar al fjen quando che no se à posto a quert la è quela de far sù le mede. Se trata in poche parole de moje fate sù coniche dintorn de 'n pal inpjantà 'te 'l teren. An palco al evita che al fjen al reste a direto contato co la tera.

Voxe colegadeCànbia

Altri progètiCànbia

Controło de autoritàGND (DE4159757-6
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Fjen&oldid=917367"