Gilera

Gilera
	;
Bomò	Nata dal desiderio
Dati
Sorte	costrutor de motosiclete ; filiałe
Indùstria	indùstria automobiłìstega
Forma zurìdega	socetà par asion
Istòria
Creasion	1909 , Miłan
Fondador	Giuseppe Gilera (it)
Desołusion	2020
Governo d'impresa
Ente controłante	Piaggio
Propietàrio	Piaggio (1969–)
Sito web	gilera.com

Gilera, ła ze stà na azienda itałiana che ła costruiva motosiclete. Ancùo ła xe marca de siclomotori e motoiscli de propietà del Grupo Piaggio.^[1]

Storia

Ła Gilera ze stà fondà da Giuseppe Gellera inte el 1909 che verzesto prima na picoła ofisina in Corso XXII Marzo a Miłan e drioman na fàbrega inte ła sitadina de Arcore, in provinsia de Miłan. Ła prima moto a portar sto nome ze stà ła VT 317.

Na Gilera 500 4C del 1950

Drio ła prima guera mondiałe, inte el 1918, Gilera ga produzesto moto da 500 cm³ de siłindrada e ga scominsià co staltre a partesipar e a vinser inte łe pì prestijoze conpetision internasionałi del tenpo. Sto motor gaveva łe valvołe łaterałe, solchè inte i ani trenta ła caza ga tacà utiłizar łe valvołe in testa. Ga nasesto cusì ła Quattro Bulloni 500 e ła Otto Bulloni.

Na Gilera 500 Saturno Sport del 1947

Inte el 1936, partindo da un projeto de ła caza romana CNA Rondine, Gilera ga prezentà l'omonèma moto dotà de un cuatro siłindri in łinea da 500 cm³ dotà de conpresor che ga stabiłio el novo record mondiałe de l'ora (a 274,181 km/h, record stabiłio inte el 1937 co a ła guida Piero Taruffi^[2]) e ga concuistà el łàvrano inte el Canpionato Europeo del 1939 co Dorino Serafini.

Anca par Gilera, cofà par tuti costrutori de moto de l'epoca, ła segonda guera mondiałe ga interonpesto onji atività.

Inte'l medià dopoguera (1946) l'azienda ga prezentà naltro dei so modełi inte ła storia: ła Saturno 500. Ła gama ła zera stà conpletà co racuante moto de picoła e mèdia siłindrada (ła Nettuno 250 e ła 125, mazorada drioman a 150 e 175 cm³). Łe nove cuatro siłindri 500 domena ła clase rezina del Motomondiałe ingajando duełi co Norton, Moto Guzzi e MV Agusta, e concuistando sie titołi piłoti tra el 1950 e el 1957: inte el 1950 e inte el 1952 Umberto Masetti ze canpion del mondo clase 500. Inte el 1953, inte el 1954 e inte el 1955 Geoff Duke concuista el primo dei tre titołi iridai e Gilera porta ad Arcore el titoło Costrutori clase 500cc. Inte el 1957 Libero Liberati vinse el titoło Piłoti e Gilera cueło Costrutori, par do categorie 500 cc e 350 cc.

I costi cresenti e łe prime avisaje de ła crize che da łì a pochi ani ga investìo el conparto motosiclistego, dovùo a ła sciopada del marcà automobiłistego, ga fazesto sì che Gilera ga desidesto propio inte el 1957 el ritiro da łe conpetision, de comun acordo co Moto Guzzi e Mondial.

Dei ani sesanta va recordae łe varie Giubileo, Rossa, Turismo e Sport che ga otenjesto un bon suceso comersiałe, insenbre a łe renovae Saturno, a ła 125 Regolarità Casa ed a ła 300 Bicilindrica.

Na Gilera 5V Arcore 150 del 1973

L'acuizision da parte de Piaggio

El 23 de novenbre 1969 Gilera ze stà acuizìa dal Grupo Piaggio. Ła nova propietà ga efetuà inportanti investimenti so tuta ła gama, soratuto insentrada so łe atività forastradisteghe che gaveva za dà łustro e gloria a ła caza łonbarda (numaroze łe vitorie inte łe Sie Dì Internasionałe). Ła 125 Bicilindrica Cross ne ze el pì famozo ezénpio. Inte el canpo de łe motosiclete da strada ze stà prezentà ła 5V Arcore disponìbiłe in do siłindrae da 125 e 150 cm³, che ga continuà el suceso de łe riusite 124 stradałi dei ani sesanta. El trend seitarà co ła serie "TG".

Na vera e propia inovasion ze stà l'ingreso inte el setor dei siclomotori da forastrada, ałora domenà da marche cofà Fantic Motor, Aspes, Benelli, Milani ed altre. Co'l modeło 50 Trial 5V, guidàbiłe sensa patente, Gilera ga concuistà un so spasio de marcà inte ła fasa de età dai cautordeze ani in su, anca grasie a numaroze inpreze sportive sponsorizae de ła Caza. Ła pì eclatante ze stà sertametne el raid First Climbing to Kilimanjaro 5000, o sia ła ranpegada in moto so ła montanja afregana fin a ła cuota de 5.000 metri. Ła serie ła ze stà conpletà dal modeło stradałe Touring e da łe inuzuałe sorełe targae, denomenae 7HP e destinae ai sedezeni in poseso de patente A. Ła Trial Codice ze stà seguramente el modeło de mazor suceso, co mière de ezenplari vendùi. Inte el 1974 ła Trial ła ze stà afiancà da ła50 Enduro, che no ze riusìa a bisarne el suceso, pur reciamando inte łe łinee e inte ła veste cromatega l'inbitisima 50 6V Competizione che se gaveva inponesto in tante gare de regołarità nasionałi.

Una Gilera 125 CX del 1991

Inte i ani otanta Gilera ga prezentà na nova serie de motori a 4 tenpi de derivasion automobiłistega, i bi-4, monosiłindreghi e bialbaro, inte łe siłindrae de 350 e 500 cm³ (drioman portà a 558 cm³). El projeto del novo motor zera stà afidà a Cesare Bossaglia, za autor co Rudolf Hruska del "boxer" Alfasud. Bossaglia ga termenà el projeto a ła fin del 1984, ma no'l ga avesto el tenpo de conpletar el zviłupo dei prototipi, a cauza de na grave małatia che ło ga menà a ła morte inte l'ano drio. Łe varianse nesesarie a l'entrada in produsion ze stae reałizae dal so amigo e cołaborador Bruno Grana e dal tècnego Gilera Alessandro Colombo. El primo modeło ad èsar dotà del novo motor ze stà l'enduro Dakota 350 del 1986.

Sti motori de produsion i ze stà utiłizà anca par łe moto enduro da conpetision, łe RC 600 e RC 750.

Inte el 1991 ze nasesta ła Nordwest, disponìbiłe inte łe siłindrae 350 e 600 cm³, moto inovadiva ed antesinjana de łe atuałe supermotard, ma che ga otenjesto poco suceso tutociò che ła vantase guidabiłità e prestasion interesanti, unie a l'afidabiłità del bi-4 Gilera.

Anca altre moto da strada ga subio un notevołe inpulso tecnołòzego, e ze naseste ła SP02 e ła CX125, dal design aveniristego e caraterizada soratuto par ła forsèła davanti monobraso.

Ła serada del stabiłimento e'l spostamento a Pontedera

Inte el 1993 el Grupo Piaggio ga comunegà ła cesasion de łe atività inte el stabiłimento de via Cesare Battisti 70 ad Arcore (Miłan), che ze stà dezmetesto e çedùo a tersi. Parte dei machinari, de łe resorse umane e de reserca ze stae spostae ai stabiłimenti de ła Piaggio de Pontedera. Mentre co l'ocazion alcuni modełi - cofà el Gilera Bullit - ga cesà de èsar produzesti, a Pontedera ga seità l'ansenblajo dei modełi oncora in catałogo e considarai reditisi o par i cuałi el çiclo vitałe no'l zera njancora concludesto (fra cuesti, ła Gilera RC 600 inte łe varsion Nordwest, Cobra e R).

Contenporaneamente se ga sercà de diversifegar ła produsion introduzendo na gama de scooter, nesesariamente sportivi segondo ła tradision del marchio Gilera. El Gilera Runner (50, 125, 180 e 200 cm³, sia a 2 che a 4 tenpi) ne ze stà comersialmente el modeło de ponta. El suceso de ła scooter ga portà parò come nesesaria contropartia a l'usida definitiva del marchio Gilera da łe motosiclete.

Gilera ga sevità comuncue ad ocuparse de riserca, produzendo nove idee de discreto successo cofà ła DNA, na via de mezo tra na moto tradisionałe e un scooter.

Al Sałon de Miłan del 2003, Gilera ga prezentà ła Ferro, dal design apresà ma soratuto contradestinguesta da un vero canbio automàdego. Cueła che doveva èsar ła prima “moto automàdega” de l'era moderna (non ła prima in asołuto, eséndoghe stà el presedente de bon suceso de ła Moto Guzzi V1000 Idroconvert del 1971) ze restà parò soło al stadio de prototipo, non avendo avuo po' un seguito comersiałe.

Inte el 2003 ze stà imetesti sol marcà do novi modełi da 50 cm³: ła Gilera RCR da enduro e ła soreła motard SMT.

Inte el 2004 ze rivà sol marcà naltro projeto inovadivo, un scooter de 500 cm³ de siłindrada dal tenperamento partegołarmente sportivo co na sospension dadrìo regołabiłe, el Nexus 500.

Inte el setembre del 2007 vien prezentà el GP800 che, in chel momento, se podeva freziar del titoło de scooter de serie pì potente mai produzesto: el desponeva de 75 cv de potensa e el dichiarava na vełosità masima de 200 km/h, co un scato sol 0–100 km/h conpanjo a 5,6"[3].

Inte el 2008 ła gama Nexus, ła vede l'usida del modeło 250 cm³ e l'ingreso del novo Nexus 300.

Inte el 2011 el grupo Piaggio trasferise ła gama Nexus soto el marchio Aprilia co ła denominasion SR Max, mentre el GP800 vien evołuo, senpre soto el marchio Aprilia, inte el novo SRV 850, łasando tanta insertesa so łe stratezie future rełative al marchio Gilera.

El stabiłimento de Arcore

El stabiłimento de Arcore, progresivamente el se gaveva espanso - inte i ani - verso sud, inte un parimetro sarà - idealmente - da via Giuseppe Cappellotto, via Polini, par concludarsi, a sud-est, co via Nazario Sauro, dove A zera prezente el sircuito de prova dei motosicli^[3]. Daspò che'l ze stà serà, i spasi i ze stà frasionà e cedùi a diverse atività. Da via Cesare Battisti - ingreso stòrego de l'azienda - se acede a l'area industriałe, i cui capanoni i ze oncora ezistenti. L'area de prova ła ze invese stà scuazi conpletamente edifegada; soło ła parte nord ła ze restada inedifegada, e ła costituise ł l'area frontałe a dei capanoni. Cua, ła conformasion tormentada de via Sauro ła ze łigada a l'orizenaria curva nord de'l trasà.

Sucesi sportivi

Ła gama 2012

Notasion

↑ Profilo, in Gruppo Piaggio, 14 agosto 2017. entrada il 6 marzo 2018.
↑ Il record sul sito Pirellipirelli.com (archivià dal URL orizenałe il 19 zugno 2015).
↑ scoprilabrianzatuttoattaccato, Complesso industriale Gilera anni ’50Cameriere, di che scrivere. Cartoline da Arcore, 22 de setenbre 2018. entrada l'8 de novenbre 2021.

Altri projeti

Wikimedia Commons el detien imàjini o altri file so Gilera
Scholia el detien schemi gràfeghi so Gilera

Linganbi foresti

Sito ufisałegilera.com.

[1] Profilo, in Gruppo Piaggio, 14 agosto 2017. entrada il 6 marzo 2018.

[2] Il record sul sito Pirellipirelli.com (archivià dal URL orizenałe il 19 zugno 2015).

[3] scoprilabrianzatuttoattaccato, Complesso industriale Gilera anni ’50Cameriere, di che scrivere. Cartoline da Arcore, 22 de setenbre 2018. entrada l'8 de novenbre 2021.

[1]

[2]

[3]