Gol D. Roger

Gold D. Roger (ゴール・D・ロジャー Gōru Dī Rojā) el xe un parsonjo del manga One Piece, scrito e dixenjà da’l mistro japonexe Eiichirō Oda. Gol D. Roger el xe conosesto anca col soranome de Re de i Pirati e el xe un parsonajo asè inportante parché el xe stà el capitan de ła ciurma de i Pirati Jolly Roger e donca el posesor del mìtego texoro One Piece. Roger el xe un parsonajo che el conpare sùito al scumisio de l'òpara in forma de flashback, ma col continuar de ła narasion łe só conparsàe łe sarà senpre asè ràdeghe e sparpanjàe e donca de łu A se conose ancura tanto poco.

Gol D. Roger

Biografia
Càuxa de morte	Pubblica esecuzione (it)
Dati personałi
Altura	274 cm
Atività
Ocupasion
Menbro de
Fameja
Spoxa
Fiołi	Portuguese D. Ace (it)

Storia de Gol D. Roger

Savemo par serto che Roger el jera nasesto a Rogue Town inte el Mar Orientałe e ancura da bocia el ga scumisià a métar su na ciurma co l'obietivo de "rebaltar el mondo". Inte łe puche siene che se ło cata da xòvane A se pol védar che el gheva dexà indoso el famoxo capel de paja che daspò el sarìa pasà a Shanks e, daspó ancura, a Luffy. Fixegamente el gheva calcosa de somejante co Luffy siben che el fuse stà pì alto e muscołoxo. Daspò de un parìodo łongo de aventure e de gaveta pa' i mari savemo che Roger e la só ciurma i xe pasài pa' ła Ponta de i Xemełi indóe che i ga recrutà Crocus col roło de mèdego de bordo. 'Sta sielta ła xe stà dovùa parché el capitan el se gheva inacorto de ver un bruto mał: maldestin Crocus el ga podesto soło calmar i dołori de 'sta małatia, justo el tenpo che pasase cuatro ani e che finalmente i rivase a conpletar tuta ła Łinea Granda catando el One Piece. Roger el xe stà ofisialmente ciamà da tuti el "Re de i Pirati" soło daspò che 'sta inprexa ła xe deventà pùbrega. Rivà a 'sto ponto el ga siolto ła ciurma, łasando che onjun de i só òmeni el seitase ła só strada, e daspò de n'altro ano el ga desidesto de consenjarse spontaneamente a ła Marina. Ła Marina parò ła ga senpre publegamente declarà che ła jera stà eła a caturarlo. Poco tenpo vanti de èsar justisià Roger, tamentre che el jera recruxo in seła, el ga confesà al só aromai ex aversario Monkey D. Garp (el nono de Luffy) che A ghe jera nasesto un fioło che el se ciaméa Portuguese D. Ace e che ła mare Portuguese D. Rouge ła jera morta. Donca Garp el ga asetà de far crésar łu Ace tenjendo sconto 'sto segreto al Goerno, e purpio par 'sto motivo Ace el xe stà conpanjo de infansia de Luffy e anca de Sabo. L'execusion de ła condana a morte ła xe stà mesa su a Rogue Town, ła dir ła sità de nàsita de Roger, scuaxi a vołer sinbołegamente métar ła fin al só siclo. El dì che i ga justisìa Roger jera prexenti scuaxi tuti i pirati che daspò i sarìa deventài inportanti, par exenpio tanti che i sarìa nài rento i Sete Corsari o sanò el steso Shanks, che el jera stà novisio de i Jolly Roger e che de sèito el sarìa deventà inperador inte el Mondo Novo. Tra tuti manchéa parò Silvers Rayleigh, a dir el mejo amigo de Roger che, contando 'sta storia a i Mugiwara, el ga confesà che "no'l ga mai piandesto, ridesto e bevesto cusì tanto" cofà chel dì. Roger, calche secondo vanti de èsar justisià, el xe stà bon de pronunsiar ła fraxe ciave de tuta l'òpara, a dir: "El me texoro...? Se ło vułì, el xe vostro... A gavì da sercarlo! Mi A go łasà tuto inte un serto posto!". 'Ste puche parołe łe ga scaenà un putiferio in tuto el mondo e cusì ła Marina ła se ga catà che, invese de ver serà par senpre un siclo, A ghe ne xe stà verto n'altro, a dir "l'Era de ła Piratarìa". Daspò de la só morte 'sta informasion ła xe stà pubregamente confarmada anca dal pirata Barbabianca. El parsonajo de Roger el xe donca ła prinsipałe fonte de ispirasion de Monkey D. Luffy.

Varda anca

• One Piece
• Parsonaji de One Piece
• Monkey D. Luffy
• Jeografìa de One Piece