Guera de Troia

La guera de Troia lè stà combatesta dai Greci (ciamà anca Achei) contro i Troiani, presso la sità de Troia. La storia de la guera lè contà nel'Iliade, famoso poema epico scrito da Omero, e in altre opere. I storici i pensa che l'Iliade la conta dei avenimenti sucesi par dal bon, ma no iè mia proprio sicuri de la data (se crede intorno al 1200 a.C.).

Na scena de bataglia tra Achei e Troiani, Museo del Louvre

Elena de Troia

Secondo la tradision, la guera lè nata par via de Elena, mujèr de Menelao re de Sparta, che la jera la femena pi bela mai vista al mondo. Un dì Paride, fiol de Priamo re de Troia, el sa inamorà de ela e el là rapìa par sposarsela. Elora Menelao, jutà da so fradel Agamennone, el ga meso in piè un grando esercito con gente da tute le parti de la Grecia, e tuti insieme iè 'ndà ad assediar Troia.

Achei

Però la guera lè 'ndà par le longhe, e dopo diesani oncora i Achei no i era stè boni de ciapar la sità nemiga. In più i Achei i era in crisi, parchè Achille, el pi forte dei Achei, el gavea barufà co Agamennone, che el gavea ciavà la so s-ciava preferìa, Briseide, e quindi el se rifiutava de 'ndar a combattar. Dopo varie bataglie che se mete sempre pezo par i Achei, Patroclo, el mejo amigo de Achille, el se fa imprestar le armi de quest'ultimo, in modo che i Troiani, come i lo vede, i lo crede Achille e i ciapa paura. Parò ala fine, grasie a l'intervento del dio Apollo, l'eroe troian Ettore el riese a copar Patroclo.

Duello Achille-Ettore

Achille, rabià par la morte del so amigo, el decide alora de farse pareciar dele nove armi dal dio Efesto, e con quele el torna sul campo de bataglia. Dopo aver copà un mucio de Troiani, el affronta in duello Ettore, el lo copa, e in segno de disprezzo el liga el cadavere drio al so carro e el lo strapega in giro par festegiar la so vitoria.

Fin dell'Illiada

L'Iliade la finise qua, coi funerali de Ettore, ma da altre fonti a savemo che anca Achille el vien copà poco dopo, da na freccia lancià da Paride che la lo cica proprio sul calcagno, l'unico posto inte el cuało Achille l'era vulnerabile. Ala fin l'eroe acheo Ulisse, vedendo che no i era boni de ciapar Troia co la forsa, el gà l'idea de costruir un gran caval de legno (el Caval de Troia). Dentro el ghe sconde un pochi de soldai e el lo lassa davanti a le mura de Troia, mentre el resto de l'esercito el fa finta de partir e de tornar in Grecia (in realtà i se sconde su un'isoleta lì visin).

Festa e massacre

Troia brusà.

I Troiani, pensando che el caval el sia na oferta par i Dei, i lo mena dentro in sità. De note, fin che i Troiani i fa festa convinti che la guera la sia finìa, i soldai i va fora e i spalanca le porte de la sità a l'esercito acheo. I Troiani i vien quindi massacrà e Troia la vien brusà completamente. Solo pochi Troiani i riese a scampar: tra questi Enea, che dopo vari viaggi el riva inte el Lazio deventando capostipite dei Romani, e Antenore, che el fonda Padoa.

L'Odissea

Anca i Achei parò i cata un mucio de ostacoli tornando a casa; in particolare Ulisse, che ghe toca viajar diesani afrontando un saco de imprevisti, che iè contà nel'altro poema epico de Omero, l'Odissea.

Altri progetti

• Wikimedia Commons

• Wikimedia Commons el detien imàjini o altri file so Guera de Troia
• el detien schemi gràfeghi so