Mesa/Boogie Mark series

Storia de ła Mesa/Boogie serie Mark

Mark I

El primo Mesa/Boogie par chitara xe stà el Mark I. Al'inìsio no el vegniva ciamà cusita, ma soło da dopo che xe vegnesto fora el Mark II.....par distinguerli uno da staltro. I Mark I jera dei conbo da 60 o 100 watt co el cono da 12 pòici Altec-Lansing 417-8H Series II o EVM(Electro-voice). El Mark I gheva 2 canałi: l'"Input 2" che el gheva un suono ispirà ai veci Fender, e un secondo canàe, "Input 1," un "high gain" che el xe diventà el famoxo "Boogie lead" che se pol sentir inte l'album "Abraxas"(anca in cuèi dopo) de Carlos Santana. Anca Keith Richards e Ron Wood ga doparà el Mark I in live dal 1977 fin al 1993 e in studio pa registrar Some Girls e Tattoo You. Sto anpli no'l ga canałi switchabii, par ndar da un canàe a staltro bixogna inpiràre el jack so i input separałi dei dò canài.

Inte'i primi Mark I no ghe gera el reverbero e gnanca i potensiometri switchabii tipo "Pull lead", ma i modèi vegnisti fora na sçianta dopo, I gheva come opsiòn sia reberbero che equaìzator. Inte'i potensiomentri dei voeùmi ghe gera el "Pull bright" e el "Pull boost", "slave out" e "reverb" gera scriti co de łe etichéte. I anpli no i sonàva tuti conpagni: serti jera bei sçèti, altri pì infonfonài.

El Mark I sòna in chea maniera la parché i primi 2 stadi de preanplificasiòn i xe prima dei contròi dei toni(treble-bas-middle). Inte'i Mark II e Mark III invese ghe xe sol che un stadio de gain prima dei toni.

Inte el panèo davati ghe xe i contròi de Volume 1, Volume 2, Treble, Middle, Bas e Master.

I xe tanto ricercài, ma xe fadiga catarghine che sona uno conpagno a chealtro e xe fasìe catarghine de modificałi o ciapałi co e bonbe.

Mark II

Mark IIA

Co xe nato el Mark II xe stà anca mesa in pràtega na nova invension de Randall Smith: el canbio de canàe a pedàe(anca a man) che dava a posibiità de pasàre dal canàe rhythm a queo lead sensa ogni olta dover inpirar el jack inte l'input del canàe, ma bastava strucar el botòn de un pedaìn...anca se inte el canbio de canàe se sentiva un s-cioco. Anca el reverbero el faxeva un fià de caxin, ma stì 2 difeti no i xe stai boni de meterli a posto puito fin al Mark IIC, al 1984. Fin che no xe vegnisto fora el Mark IIB, el Mark IIA no el se ciamava cusita, ma Mark II. Rispèto al Mark I, el Mark IIA ga un suono pi suto e centrae, e el canae clean el xe tanto beo.

El MarkIIA e IIB quando che i vegniva doparai co na pasua de distorsiòn, i gheva un fià de problemi microfonici co e valvoe preanplificatri 12AX7. Par sistemar sta rogna i ghe ga meso un mestiero in silicone ciamà "fetron" al posto de na 12AX7, co un switch pa sceliere el fetron o na valvoła 12AX7.

Mark IIB

Co el Mark IIB xe stà zontà el loop efeti e i "Pull" inte el potensiometro del Lead Drive e anca in queo del Lead Master. Naltra invension de ła Mesa/Boogie e che ga brevetà, xe stà el sistema ciamà "simul-clas" che, inte'i anpli co 4 valvoe finai, i faxeva funsionar 2 valvoe 6L6 senpre in pentodo e clase AB, e staltre 2 in triodo in clase A poendo scèliere se meter 2 6L6, o 2 EL34. I anpli in simul-class riva a far 75 watt RMS, ma voendo, co un switch meso inte el panèo da drio, se pol doparar sol che'e vàlvoe in clase A e ndar ben o mae intorno i 15 watt; in staltra poxision se dopara l'anpli in simul clas.

I Mark IIB ghe xe sia la version simul class che la version 100 watt in clase AB col switch par poer sceliere se dopararlo a 60 watt o 100 watt.

Ga dito William G. Sacks: "Ghe xe un bel bagoło, ma poco conosesto, che se se pol far col Mark IIB (o l'originae Mark II): visto che el loop efeti nol pol eser considerà un vero loop efèti, te coeghi l'output de un pedae de vołume (sensa picarghe la chitara al'input) dentro l'entrata "return", e te poi regołar el gain col pedae! La xe na opsion che ga pochi anpli, che sensa saverlo el dopara el potensiometro del pedàe voeùme come un limiter pasivo, co el pedae xe verto del tuto, pasa anca tuta la corente al finàe, quando invese el pedàe xe sarà, sucede che se sbasa el segnae de preanplificasion, e el suono se zneta, el ga manco gain. Uno dei me mejo amighi, el regoła el canàe pulto a 9 e el regoła el suono col pedàe vołume de ła Ernie Ball. Oh, vujo convinsere la Mesa che meta sta opsiòn anca inte'i novi modèi..."

Tanti se cronpa i veci Mark II e Mark IIB pal via del canae pulito che i gà. I tecnici de ła Mesa/Boogie dixe che el canàe lead del Mark IIB el xe groso e co na bea papìna, ma el xe el modèo dopo, el Mark IIC, che el ga el mejo canae pulito e lead de tuti i Boogie che xe stai fati fin deso.

Mark IIC & IIC+

I Mesa/Boogie Mark IIC e IIC+(insieme ai Mark I) i se ga guadagnà la fama de eser i mejo Boogie che xe stai fati.

El Mark IIC ga un sistema pal canbio de canàe pi siensioxo de quei fati prima e el ga un circuito difarente pal revebero: in tuti i Mark II, a parte racuanti Mark IIB, ghe gera un reverbero rumoroxo. El problema el xe stà sistemà dal Mark IIC, spostando el cavo de ła mesa-tera e co de łe rexistense de n'altro tipo. Sta modifica la xe ncora inte el libro "uficiàe" de łe modifiche che i fà ala Mesa/Boogie, co el prèso de $50, anca se al dì de uncò no la vien pì fata.

El Mark IIC+ el xe stà l'ultimo de ła serie Mark II, el ga de diverso dal Mark IIC che el canae lead el xe pi sensìbie, ma pichealtro el ga un loop efeti mejo, ansi el xe el primo loop efeti de ła storia, el primo che va ben. Diversamente da staltri Mark II, col IIC+ se pol doparar i pedałi davanti sensa mandarghe masa segnàe al'input del'anpli.

Serti dize che la "+" xe pa diferensiar i anpli co l'equaìzator da quei sensa, e questo parché drio la metà dei ani '80 la Mesa/Boogie gheva butà in comercio el Studio 22+ che de difarente dal Studio 22 el gheva coegamenti fati mejo e altri bagoi, ma no xe par questo. Par saverghine de pì struca cuà: Mesa/Boogie Mark IIC and IIC+ Tuti i Mark II i ga come opsion l'equaìzator grafico, ma no tuti i'o ga. Ghe podarìa eser un Mark IIC+ che par exenpio el xe 100 watt e sensa equaìxatore o reverbero.

Par riconosere un IIC+ basta vardar insima l'atàco de ła spina de ła corente che la xe inte el paneo da drio: ghe xe scrito co l'indeebie nero "+". Tanti tien alto el preso del Mark IIC+ sensa saver cosa che l'è, anca parché voèndo a "+" uno podarìa scrìversea da lu lu soło, ma par esere sicuri basta domandarghe ala Mesa/Boogie, mandàndoghe via email i serial number, par capir se el xe un C+ o no. De Mark IIC ghe nè stałi fati 1499, ma tanti xe stai modificałi in IIC+, e de Mark IIC+ ghe n'è 2500 modei. La scrita "Boogie" ghe jera in tuti i conbo e testate, invese inte'i combo 15", e testate long head, jera pì fasie catarghe la scrita "Mesa/Boogie".

Mark III

Col Mark III vièn fato el primo anpli a tre canài, un crunch che xe na via de mexo tra el canàe rhythm e quèo lead, pichealtro l'è un suono ciapà dal canàe rhythm, ma co tanto pi gain. Pa canbiare canałi ghe xe dò pedaìni, uno che canbia da rhythm a lead come jera so i Mark II, invèse co chealtro se switcha el canàe rhythm co quèo crunch. El canàe rhythm e crunch ga i contròi de toni e gain conpagni, invèse el canàe lead ga un potensiometro del gain pa i fàti sui.

In partensa i voèva fare un'anplificatore chel ghese un pulito Fender, un crunch Marshall e el lead Mesa/Boogie, ma no i xe stałi boni del tuto. Se te tiri fora un bel suono pulito, te te cati col lead o el crunch che xe confuxionài, se te tiri fora un bel lead, te te cati un pulito el pulito fà pietà. Pa catàre na bona via de mexo bixogna perdirghine de tenpo co e regòeasion.... Comunque el Mark III sona ben, forse mejo se uxà in clàse A. Stò anpli l'è stà criticà pichealtro parché nol gheva el suono "Boogie" che ghe jera so i Mark I e Mark II, el jera pì spostà verso i "Marshall".

Na bea modifica che xe stà fata ai Mark III, xe quèa de xontarghe un contròeo voeùme separà pal crunch, in stò modo l'anpli diventa tanto pì versàtie, fàsie da doparàre, e se rièse a tiràre fora dei suoni mejo. Chi che gà el Mark III col teàro pìcoło, e versiòn short head o conbo co cono da 12", fà fadiga catàrghe el posto pa mètere el potensiometro del voeùme pal crunch.

Ghe xe varie versiòn del Mark III, co varie modifiche fato soi àni, e pa diferensiàrse una da chealtra i ghe faxeva na strica "stripe" co penarèi indeebii de vari cołori.

• None or Black Stripe: sensa segni, co un puntìn e ghe nè anca un sentenare co a strica nera o na "+".

- Suono pì fin, ma pì potente de un C+. L'è el primo Mark III.

• Purple Stripe: strica vioła.

- El canàe crunch(R2) l'è stà modificà pa sonare pì tondo e co manco gain

• Red Stripe: strica ròsa.

- R2 mejo e pì caldo. El canàe Lead el ghe và tanto visìn a queo de un C+.

• Blue Stripe: strica blu.

- Gain pì catìvo, canàe pulito(R1) mejo, finàe de potensa bastansa conpagno a queo del C+.

• Green Stripe: strica verde.

- Canàe R1 pì pulito ncora. El finàe de potensa laora soło in pentodo, sensa triodi so e valvoe che laora in clase A, pal resto el finàe l'è conpagno a queo del Blue stripe. L'è l'ultimo Mark III che xe stà fato.

Colisłum Mark, Series 300

Co a serie Colisłum o series 300 a MESA/Boogie ga fato de łe testate e conbo che gheva i stèsi circuiti dei Mark II e Mark III parò co pì potensa.

A serie 300 vièn tacà fare sol 1980 portando el Mark IIB a 180 watt, uxando sie 6L6 de valvoe finałi e sie valvoe de preanplificasion: quàtro 12AX7(da V1 a V4), na 12AT7 sò a V5 e na 6FQ7 so a V6, a phase inverter/driver. I Mark IIB Colisłum ghe jera soło a 180 watt in clase AB e i conbo i metèva sù un cono da 15". I Mark IIC/IIC+ e i Mark III invèse ghe ne faxeva da 150 watt simul clas, che come valvoe de finałi montava dò EL34 mèse in centro e so chealtre quàtro ai lati i ghe metìva e 6L6, o senò a versiòn 180 watt in clase AB co sie 6L6. Dea series 300 ghe nè stałi fati 500 modèi, 336 Mark IIB Colisłum, 86 Mark IIC/IIC+ Colisłum e 78 Mark III Colisłum. Sol tour del 1981 Keith Richards e Ron Wood dei Rolling Stones se ga portà drio i Mark IIB Colisłum. Sol 1982 anca i Who li doparava. Media:Esenpio.ogg

Mark IV

Mesa Boogie Mark IV

El Mark IV l'è un anplificatore tre canałi che xe pièn de switch e opsiòn, par quèsto el vièn ciamà state-of-the-art Mesa/Boogie. A roba pì inportante xe che i tre canałi xe indipendenti, a parte el potensiòmetro dei medi e dei bàsi tra canàe pulito(rhythm 1) e quèo crunch(rhythm 2).

Come pal Mark III, anca el Mark IV ga avùo critiche parché el sona pì tipo un Marshall invèse che come i Mark I&II. Se se fà na prova A/B tra Mark IV e, ad exenpio, un Mark II, ghe xe bastansa difarensa, ma da quà a dire chel sona come un Marshall ghe ne voe.....el Mark IV gà el sò suono: el suono de un Boogie moderno.

Ghe xe dò versiòn del Mark IV, quèi fati fin al setènbre 1993 xe i Mark IV(A), quèi dopo el '93 xe i Mark IV(B). E difarènse evidenti da versiòn "A" a "B", xe che no ghe xe footswitch pal reverbero, ne loop efèti stereo, gnanca el send pal "satellite" pa far ndare n'altro anplificatore. A versiòn "B" ga el lead pì modificà verso el IIC+, dei pull so i "presence" pa avere un suono pì moderno e el crunch ga pì gain. I primi Mark IV(B) ga a spina tacà al'anpli come i Mark IV(A)....e anca come i Mark I-II-III.

Anca se ghe xe dò versiòn difarenti, tuti dò ga a stèsa quàità. El canàe rhythm 1 xe tanto pulito, se poe ndare da un suono blues a uno funky, col rhythm 2 voèndo se riva a fare un crunch tipo AC/DC e co un pedaìn overdrive(o distorsore) davanti se ghe poe fare anca metal. El lead ga un mùcio de gain, fadiga sfrutàrlo a ciòdo, anca sel resta senpre pì morbido, "lìquido" e manco fuzzoxo de łe distorsiòn rectifier. El lead par tanti xe tanto beo, serti lo considera el mejo lead de tuti i Mesa/Boogie.

Mark V

El Mark V, ciamà anca MARK FIVE™ o Mark 5, l'è l'ultimo Mesa/Boogie de ła serie Mark e anca l'unico oncora in produsiòn. El ga na pasùa de posibiità, se ghe poe catare suoni che se ispira al Mark I, Mark IIC+ o Mark IV, ma anca suoni pì ispirałi ai anpli inglexi. Se pòe sceliere el tipo de potensa finàe da uxare, 10,45,90: uxando e dò valvoe esterne se ga 10 watt in clàse A, uxando quee interne 45 watt in clàse AB, uxàndoe tute quàtro 90 watt in simul-clas. Ghe xe tre canałi indipendenti e so ogni uno se ga i contròi de Gain, Treble, Mid, Bas, Presence e Master, se ghe poe sceliere a potensa del finàe(10-45-100 watt) e se poe asegnàrghe l'equaìxatore grafico si o no. Ghe xe tanto altri contròi, dal depth al reverbero, loop programàbii, el "Solo" controeàbie anca a pedàe, ecc.... Col canàe pulito se poe avère un pulito tipo Fender, dal funky al blues come ridere, col secondo canàe se riva a fare un bel crunch rock, forse el mejo crunch che gae mai avùo un Mesa/Boogie Mark, col lead se poe fare de łe ritmiche rabiòxe, soli sbregamudande, shred da far vegnère i penòti. Rispèto al Mark IV l'è tanto pì scièto e co manco conpresiòn.

Quad preamp

El Quad preamp ga dò canałi separài, uno sòra e uno sòto: sò quèo sora ghe xe el canàe col circuito de pre del Mesa/Boogie Mark IIC+ e invèse soto ghe xe st'altro canàe che l'è ciapà da un Mark III. Pena vegnesto fora ghe jera 8 valvoe de pre NOS Tesla E83CC fate soi àni '70 de produsiòn Telefunchen. El percorso del segnàe del Quad l'è soło valvołare e no come chealtri pre come Triaxis o el JMP-1 che uxa "opamp" (sol Triaxis i "opamp" vièn uxałi soło pal dynamic voice). Randall Smith ga dito: "Al'inìsio el Quad (insieme al Simul 395 Stereo power amp) l'è sta fato pa sonare dal vivo al posto de ndare via co dò-tre(anca de pì) testate, de sòito modificàe, e in pì anca un switcher." El Quad preamp ga anca el reverbero de ła Accutronics: forse el mejo reverbero che ga fato a Mesa/Boogie.

I numeri de serie, dal Mark I al Mark III

• Mark I 1x12: A0001-A2999 = 2999 Mark I
• Mark I 1x15: B001 - B300= 300 Mark I
• Dal 1971 al 1978 = 3299 Mark I

• Mark IIA 1x12: 3000-5574 = 2575 Mark IIA
• Mark IIA 1x15: B301-B549 = 249 Mark IIA
• Dal 1978 al'agosto 1980 = 2824 Mark IIA

• Mark IIB 1X12: 5575-11000 = 5426 Mark IIB
• Mark IIB 1X15: B550-1100 = 550 Mark IIB
• Mark IIB Series 300: Dal K001 al K336 = 336 Series 300 Mark IIB
• Dal'agosto 1980 a majo 1983 = 5212 Mark IIB

• Mark IIC 1X12: 11001-12499 = 1499 Mark IIC
• Mark IIC/IIC+ Series 300: dal K337 al K422 = 86 Series 300 Mark IIC/C+
• Mark IIC+ 1X12 = dal 12500 al 14999 = 2500
• Mark IIC dal majo 1983 al genajo 1984
• Mark IIC+ dal genajo 1984 a marso 1985 : 1499+86+2500 = 4085

• Mark III 1X12: da 15000 a 28384 = 13385
• Mark III Series 300: da K423 a K500 = 78
• 1988 Special Edition Mark III 1X12: 001-100 = 100
• Da marso 1985 a febraro 1999 = 13563

Più o meno 1000 Mark III al'àno.

Totàe dei Mark series: 28,983 dal Mark I al Mark III