Monica Raymund

Monica Raymund, (St. Petersburg, 26 de łujo, 1986), ła ze na atora statunitense.

Monica Raymund

Biografia
Nasimènto	(37 ani) St. Petersburg (Florida)
Dati personałi
Formasion
Atività
Ocupasion
Atività	2004  –

Biografia

L'atora ła ga frecuentà ła Shorecrest Preparatory School a St. Petersburg in Florida. Drìoman ła se iscrive a ła Juilliard School a New York e, na volta diplomada, ła va a ła North Carolina School of the Arts a Winston-Salem.

So pare ze presidente del consejo a aministador dełegà in pension a ła Tech Data Corp., na azienda che distribuise conponenti par computer e software che ga sede a Clearwater. Par zonta, el ze un nadivo àbreo ła cuała fameja ła provenjea da ła Zarmània e da l'est Europa.

Só mare Sonia ła ze ła confodadora de ła Soulful Arts Dance Academy a St. Petersburg e ła ze orizenaria de Santo Domingo, inte ła Repùblega Domenegana. Monica ga anca un fradeło de nome Will.

Inte'l zugno del 2011 l'atora ła se ga spozà co'l scritor Neil Patrick Stewart; dopo do ani, inte'l 2013, i do i se separa par po' divorsiar l'ano drìo.

Cariera

Monica Raymund ga recità in Cymbeline direto da Richard Feldman; The Diviners direto da Jonathan Bernstein e in Animal Farm direto da Trizana Beverley, tuto ciò mentre che ła frecuentava ła Juilliard School.

Drìoman, ła se ga ezibìo anca inte ła so sità nadałe (St. Petersburg, Florida) in Manhattan Casino (direto da Bob Devin Jones), na produsion orizenałe de ła LiveArts Peninsula Foundation, in cui ła ga intarpretà el parsonajo prensipałe Althea Dunbar; in Webb's City: The Musical (mùzega e testi de Lee Ahlin, scrivesto e dirizesto da William Leavengood). L'atora ła ze stà anca na studentesa al Broadway Theater Project de Ann Reinking.

Monica ga łaorà anca co'l comediografo José Rivera in Boleros for the Disenchanted a l'Huntington Theatre Company de Boston inte'l 2008. Inazonta ła ze conparìa inte ła sena de vertura de l'epizodio Authority de ła nona stajon de ła serie tełeviziva Law & Order - Unità vittime speciali, come vitima de na umiliasion sesuałe.

Tra el 2009 e'l 2011 ła ga recità inte'l ròło de Ria Torres, cołaboradora del dotor Cal Lightman inte ła serie Lie to Me; ła interpretava na sorta de màchina de ła verità umana, el só parsonajo el gaveva de łe dote naturałe, cuindi no ła gaveva risevesto nesun adestramento par riconoser łe buzìe o łe emosion dei altri.

Dal 2011 al 2012 l'atora ga avesto un ròło ricorente inte ła tersa stajon de ła comedia de ła CBS The Good Wife, in cui ła interpretava Dana Lodge, asistent procurador de ła contea de Cook.

Inte'l 2012 Raymund ze entrà inte'l cast de ła serie tv drama de ła NBC Chicago Fire inte'l ròło del paramèdego e viziłe del fogo, Gabriela Dawson; interpreta sto ròło fin al 2018 e durante sto pariodo ła conparise anca inte i epizodi crossover che coinvolze i do spin-off de ła serie, Chicago P.D. e Chicago Med.