Islam

L'Islam (en arabo إسلام ["Islàm"], ca 'l vol dir somiçion, sbandon [a Dio]), el xe na relijon monoteista nasesta a la Meca (Arabia Saudia) inte l VII secolo a seguito de la predegaçion de Maometo, ca i musulman i crede esar l’ultimo profeta mandà da Dio. Pa i musulmani, l’Islam el xe 'l revelo definitio, 'l xe verto a tuti e se spanpana co l’opara miçionaria de tuti i cardenti.

Stadi co popolaçion de relijon islamega.

Ła fede islamega

L’Islam predegà da Maometo 'l ga domè tri artegoli de fede:

• Dio (Allah) 'l xe uno soło
• Maometo 'l xe el so profeta
• El mister de i ultimi di

Chi 'l crede in sti tri prinçipi 'l pol dirse on islamego. In arabo, Islam e Salam (paxe) i ga l'istesa raixa (SLM), l’Islam el saria lora anca la relijon de l’intima paxe intra Dio e i omeni, 'l musulman l'anema ca la se sbandona a Dio conpletamente. Sto sbandon el se demonstra inte i çincue pilastri (arkàn al-Islàm), ca tuti i boni musulman i segue.

Cuel ca 'l preme no 'l xe la convinçion parsonal so la teoria teologega (ortodosia), ma l’asion publega (ortoprasi). I xe i conportamenti ca i intesta l’islameghidà de na parsona. La lexe ca la regola la vida de i musulman la xe la shari'a (che 'l vol dir la stra). Domè che Dio el pol xudegar i convinçamenti interiori.

I çincue pilastri

El nome de Allāh in lengua araba

I arkān al-Islam ("Pilastri de l'Islam") i xe i çincue doveri ca tuti i musulman i ga da metar in pratega, i xe:

• la shahāda, o "testimoniansa" de fede (ca 'l vol dir laudar ca Dio 'l xe uno solo e Maometo 'l xe 'l so profeta);
• la zakāt, la limoxina;
• la Salāt, l'oraçion da faxer çincue olte a 'l di co 'l mueçin el ciama la comunidà;
• el Sawm ramadān, el dizun diurno inte 'l mexe de ramadan, i xe retrà i malà;
• el Hajj, el peregrinajo a la Meca in tel mexe de Dhū l-hijja, domè par chi 'l pol parmetarselo.

Algune sete le zonta el sesto pilastro, 'l jihad, lo sforço, che 'l vol dir conbatar i erori de fede a l’interno de l’Islam (jihad grando) e defendarse da na violensa esterna (jihad ceo). De frecuente "jihad" el vien traduxesto co "goera santa", ma 'l xe on erore.

Oblighi morai e sociai

File:Masjid Nabawi. Medina, Saudi Arabia.jpg

Moschea del Profeta a Medina, seconda sità sacra de l'Islam

El musulman 'l ga da faxer el ben e conbatar el mal "co la man, co la parola, co la pena e co la spada". 'L ben e 'l mal i xe definesti da Dio inte 'l Coran, el livro sacro de l’Islam. El Ben el vol dir ubidir a Dio, 'l Mal el xe la dexubidiença. Chi 'l vol scrivar na morale difarente, baxà so 'l rajonamento, 'l sbaja. L'istes el val pa le regole alimentari. Le xe stà date da Dio, e no le se pol discutar. El cardente no 'l se fa çerte dimande, 'l stà sotometesto.

Gerarchia

Fola de pelegrini a la Spianata Sacra de La Mecca, la sità pi santa de l'Islam

Le sete pi grandi de l’Islam no le ga on clero o gerarchie (parò i Sciiti i ga na forma de clero) parché nisun el pol far da intermediario co Dio. I imam i ciama el popolo a la preghiera, i ulama i interpreta el Corano, i mufti i da pareri giuridici, i qadi i fa da giudici secolari. Parò i val tuti i steso e nisul el xe on vero sacerdote. Tuti i pol discutar l’interpretasion del Corano, no se pol discutare solo che i principi fondamentali. Quel che ga na forsa el xe el consenso. Co che ghe consenso, se crede che quela sia la interpretasion che Dio el vol.

Libri sacri

La Cupola de la Rocia a Gerusaleme, la terza sità santa de l'Islam

I libri sacri de l’Islam i xe:

• el Corano (che vol dir "Recitazione"). I musulmani i crede che el Corano el sia la Parola de Dio data da Dio steso a Maometo par mezo de l’Arcangelo Gabriele. Maometo el xera analfabeta. Gabriele el ga srotolà el Corano e, par grazia divina, Maometo el xe stà bon de lezarlo. Dopo che lo ga memorisà, el lo ga insegnà a i so seguaci, che i lo ga scrito. No se pol canbiar nianca na parola dal testo uficiale.
• la Suna (che vol dir "tradision") i xe na serie de deti e storiele (hadith) de la vita de Maometo. La Suna la se cata inte i Sei Libri (al-kutub al-sitta) de Bukhārī, de Muslim ibn al-Hajjāj, de Ibn Māja, de al-Nasa'i, de al-Tirmidhi e de Abu Dawud al-Sijistani.
• i libri de la Bibia, ma ne la loro version originale. I musulmani i dixe che i cristiani i ga tolto de i verseti dal Vangelo par far pasar Gesù come Fiol de Dio.

I testi de altre religioni, come l’induismo e el budismo, i xe considerà de origine divina, ma masa coroti da l’omo.

Profeti

L’Islam el riconose la tradision religiosa scominsià da Abramo, el primo profeta inportante (Adamo el xe stà el primo profeta in asoluto). Profeti riconosudi i xe anca: Noè, Isaco, Ismaele, Giacobe, Giusepe (el patriarca), Mosè, Davide, Salomone, Giovani Batista e Gesù. Co Maometo la profesia la xe terminada.

Sete

L’Islam el xe profondamente divixo in corenti e sete, anca picinine. No ghe xe cai religiosi che i gabia autorità su tuti. I pi inportanti grupi i xe:

• Suniti, la majoria de i musulmani;
• Sciiti, el 10% de i musulmani i xe sciiti; i sciiti i xe divixi in tante sete:

• i imaniti, ,
• i ismaeliti,
• i zayditi.

• Ibaditi, picolo grupo che se cata in tel Maghreb.

Altri progetti

• Wikimedia Commons

• Wikimedia Commons el detien imàjini o altri file so Islam
• el detien schemi gràfeghi so