Penoti

Col termine penòti se intende i rilievi a forma de cono che vien soa pele quando che se indrisa i pei. I xe dovui aea contrasion del muscoeo eretore del peo có'l xe sotoposto a serti stimoi nervoxi. El termine vien doparà anca par rifarirse ae piume dei oxei, ai peuchi (in italiano pelucchi) o, in modo ironico, ai pochi caveji restai sua testa de persone quasi calve, come inte el caxo dea frase "chei 4 penoti che ghe xe restà so a testa. Nel'uxo comune i penoti dea pele umana gà ciapà sto nome parché ła pele co i penoti ła ghe someja a quea de na gaina che xe stà spenotà (che ghe xe stá tirai via i penoti).

Penoti sul corpo de un esere uman

Etimoeogia

Gaina spenotà

El termine penoti vien dae pene dei oxei, i saria in realtà ła peuria o e prime pene che mete i oxeeti, opure anca ła parte terminae dee piume dei oxei adulti.

In altre lingue

In italian se uxa i termini piloerezione, orripilazione (che vol dire peo che se indrisa) o cute anserina, (dal latino: pelle d'oca) ma de soito se dopara ła locusion volgare pelle d'oca. in francexe se dixe chair de poule, in spagnoeo piel de gallina, in portogheze pele de galinha e in rumen piele de găină, che i voe tuti dire pele de gaina. In inglese se dopara un termine simie a penoti, goosebumps, dove che goose voe dire oca e bump gnoco o protuberansa in generae, no soeo quei dei oxei.

Animasion de come che se indrisa un peo, da notare come che se forma el penoto soa pele

Un gateo coi pei indrisai paea paura de cascare dal'alto

Descrision

I penoti i xe un fenomeno che dura poco e i xe i rilievi dea pele in corispondensa de dove che ghe xe i pei. Ea contrasion del muscoeo eretore del peo no dipende daea voeontà dea persona ma ła xe na roba del tuto invoeontaria, come un rifleso automatico che poe vegnere quando che se sente tanto fredo o quando che se prova emosion forti come ła paura, ła nostalgia, ła contentesa, el stupore, ła amirasion e ła ecitasion sesuae. Altri motivi che fa vegnere i penoti poe esare sentire onge che sgrafa na lavagna, scoltare serti tipi de musica, o anca quando che se se ricorda forti emosion e sentimenti.

El rifleso inte na situasion de gran fredo el crea tra el pelo e ła cute un ristagno de aria, che ła se scalda, ła fa da isoeante termico e ła fa diminuire ła dispersion de caeore corporeo. I penoti poe vegner fora quando che se pasa da un ambiente caldo a uno fredo o anca quando che ła pele diventa de colpo più freda. I recetori sensoriai che xe subito soto aea pele reagise faxendo in modo che i pori se strenxa e i bulbi peiferi i cambia stato. El rixultato xe che ła pele diventa come quea de na gaina o de na oca spenà, co ła base del peo che se sgionfa e col peo che se indrisa. In sto stato ła condusibiità termica dea pele diminuise e de conseguensa vien limità ła quantità de caeore dispersa dal'organismo. El rifleso che fa vegnere i penoti el se ciama in italian piloerezione, o riflesso pilomotore. Quindi ła diferensa tra piloerezione e penoti xe che ła prima xe un rifleso mentre i secondi i xe i rilievi che se vede soa pele.

Fenomeno simie su mamiferi non umani

Tra i caxi simii più evidenti che ghe capita ai animai ghe xe queo del'istrice, che quando che el se sente minacià el tira su de colpo i acuei dea schina, quei dea lontra marina, dei cani e dei gati. Ea xe na reasion che fa sembrare l'animae più grando de queo che el xe e che ghe fa ciapare paura al nemico, che el preferise rinunciare al'agresion. Questo ghe capita anca ai simpansé, e ai sorxi quando che i xe stresai.

Altri projèti

Altri progetti

• Wikimedia Commons

• Wikimedia Commons el detien imàjini o altri file so Penoti