Primavera de Praga

La Primavera de Praga, in ceco Pražské jaro, la xe sta un tentativo de liberalizazion democràtega svolto in Cecoslovachia dal 5 de zenaro al 20 de agosto 1968, e terminà co l'invaxion del paese e la represion da parte de truppe de l'Union Soviètega e dei so aleati del Patto de Varsavia.

In Cecoslovachia ghera a l'epoca un regime comunista totalitario e represivo, controlà da l'Union Soviètega, che nei anni el gavea creà un bel po' de malcontento tra la gente. A l'inizio del 1968, a l'interno del Partio Comunista Cecoslovaco xe nato un gruppo de riformisti, guidà da Alexander Dubček, che i proponea de realizar un "socialismo dal volto umano". Co l'apogio de la grande majoranza de la popołasion, i sa messo a far na serie de riforme: l'idea l'era quela de mantegner l'inpostazion socialista de l'economia, co la coletivizazion e tuto quanto, ma concedendo ma magiore libertà pułìtega, de stanpa e de espresion.

I Sovietici parò i gavea paura, lasandoghe far le riforme, de perdar el so potere su la Cecoslovachia e magari su altri paesi de l'Est che gavaria seguio el so esenpio, e quindi i ga decidesto de fermar la liberalizazion co la forza. La note tra el 20 e el 21 de agosto del 1968, na forza stimà tra 200 000 e 600 000 soldai e tra 5 000 e 7 000 cariarmai i ga invadesto la Cecoslovachia, copando 72 persone e provocando l'emigrazion verso i paesi ocidentali de 300 000 persone in tuto. Dubček l'è sta arestà e sostituio a la guida del paese da Gustáv Husák, che el ga subito anulà tute le riforme. I paesi ocidentali i sa limità a qualche protesta verbale.

El 16 de zenaro 1969 un studente ceco, Jan Palach, el sa dato fogo in piaza Venceslao a Praga, morendo subito dopo, par protestar contro l'ocupazion soviètega.

Controło de autorità	GND (DE) 4175577-7 · NDL (EN, JA) 00573588