Rene

I reni o rini i xe un paro de òrgani catai drio de l'adome, inte la posision ciamada spassio retroperitoneale. I xe noti come i òrgani dove che se produze l'orina e i ga na caraterìstega e recognossìbile forma a fazolo, funsionale a quelo che i fa. Inte la zona del'ilo ghe xe, infati, l'alteria e la vena renale co le so respetive ramifegasion che le va e le vien dai lobi de st'organo. Sti qua i xe le unità più grande inte le quali se poe divìdare ognun dei do rini, in nùmaro intrà oto e disdoto par òrgano, e i xe desposti a convèrzare in diresion del'ilo, dove ognun el buta orina in tel respetivo càleze renale. I càlezi, a so volta, i converze a formare la pelvi renale: ognuna pelvi la se cata mediale al ilo, posterior a l'alteria e anterior a la vena renale, prima de strénzerse a formare el canale de scolo ciamà uretere.

Rognuni de agnelo, se nota la forma a fazolo e'l color rosso vivo, che el depende da l'intensa vascolarizasion del'òrgano: anca se entranbi i reni i costituisse na pìcola frasion del peso corpòreo, i toe conpagni, a ocio, 1/4 de la gitada cardìaca.

Desegno che el mostra le parte anatòmiche se se poe individuare inte un rene tajado par longo.

Tola anatòmica del Gray che la mostra el nefron, le so parte e come che le se despon infrà corticale e midolare del rene.

La strutura lobulada dei do rini la xe visìbile fin al'infansia, in tel'adulto l'espansion del'organo al màssimo lassa che se veda qualche solco soto la càpsula. I òrgani i razonze dimension massime del'asse longitudinale intorno ai 11–12 cm (peso infrà 110 e 170 g), quelo de dreta xe, de sòlito, un fiatin più pìcolo de quelo de sanca e se cata un poco più in basso, par via del fato che sta sto lato gavemo el figà, mentre da st'altro ghe xe la manco voluminosa spienza. L'anatomia esterna del'òrgano lo vede logà, in te'l retroperitoneo, drento a un calto ciamà loja renale, impienada, oltre che da elo, dai vasi, nervi e linfàtissi negai in te'l tessudo adiposo de sostegno e confinada da làmene de tessudo conetivo ciamade fassa anterior de Gerota e fassa posterior de Zuckerkandl. Tuto sto conplesso se cata al'altessa de le vèrtebre T12-L3 e solo i poli inferiori de ogni rene i sporze da soto de la XII costa: inte le persone magre o coi rini sgrandai par qualche rezon i se podaria anca palpare.

Al tajo se apressa l'anatomia interna del rene: la prima destinsion evidente xe inte i stradi che i carateriza ogni lobo. Al de fora, soto la càpsula, catemo la corticale, più in drento la midolare renale. St'ultima la xe sénpleze da recognóssare parché divisa in formasion còniche ciamade piràmide renali de Morgagni: la base la poja su la corticale verso fora, mentre la sima, ciamada papila, la se taca a un càleze. In mezo a ogni piràmide ghe se inserisse porsion de corticale ciamade colone renali de Bertin.

L'anatomia microscòpica la destina a corticale e midolare struture deverse. Ogni rene poe èssare pensà come un grumo de unità funsionali tacà conpagne, che se ciama nefroni. Ogni nefron se poe divìdare un do parte:

• El corpùscolo renale, prossimale a la diresion del flusso de orina, el ga do conponenti. La prima xe el glomèrulo renale, strutura vascolare particolare che la costituisse la prima de le do ramifegasion capilari in fondo al corso de l'alteria renale e dei sui rami più pìcoli. Conpreso intrà un'alterìola aferente e un'alteriola eferente, xe el logo dove el plasma sanguigno vien filtrà par entrare in te'l spassio urinìfero de la càpsula de Bowman, seconda parte del corpuscolo che la volze el glomèrulo par tore su el so prodoto de filtrassion. El glomèrulo xe formà da sèlule endoteliali in continuità co quele intimali de le alterìole, la càpsula da tipi deversi a seconda dei do versanti: quelo tacà al glomèrulo xe formà da podociti. Le struture del corpùscolo no le regènera miga e la so destrusion la xe ireversìbile.
• El tùbulo renale, che el sèvita la càpsula de Bowman e se poe divìdare in quatro parte del so longo percorso: da quela prima a quela dopo catemo tùbulo convoludo (o contorto) prossimale, reto prossimale, reto distale e convoludo (o contorto) distale. I tùbuli reti i se sprofonda inte le piràmide formando la cussì dita ansa de Henle, cussì i vien anca ciamadi branca assendente e dessendente de sta qua. I tubuli i xe formadi da sèlule epiteliali inpegnate inte i processi de riassorbimento e secression, a sìngolo strato e forma cùbica o squamosa a seconda dei trati. L'interstissio che el reje ste sèlule el varenta el recanbio selulare e la regenerasion epiteliale dopo un dano reversìbile. I capilari che i vascolariza ste struture i se forma par ramifegasion de l'alterìola eferente e i vien drenai da le vénule che le formarà le vene renali.

Ogni tùbulo distale el buta inte un doto coletore: la convergensa de sti duti i buta l'orina inte i càlezi, prima stasion de le vie urinarie.

La fisiologia del rene ghe assegna un mucio de funsion, senplifegàbili in:

1. Produsion de orina. El glomèrulo xe la sede de la filtrassion con cui 650 ml/min de flusso plasmàtico renale i passa in te'l spassio urinìfero dei nefroni. El tùbulo che sèvita xe el logo dei processi de riassorbimento e secression che manman in trasforma el plasma in orina, sto processo el continua fin ai duti coletori e revarda tute le conponenti, orgàniche e inorgàniche, del plasma a partire dal solvente che xe l'aqua che la sèvita, par la gran parta de sto parcorso, el prinsipale soluto che el xe el sodio inte i sui spostamenti dal spassio urinario a quelo interstissiale e vascolare. La ponpa sodio-potassio, espressa sui lati basali de le menmbrane selulari dei tubulociti renali, la fa da motore par la majoransa dei processi de riasorbimento e secresion che i vien fati a sto livelo. Questi processi i poe èssare modifegai da stimolasion nervose, ormonali e da fàrmassi. A la fin, i processi de riassorbimento i xe cussì potenti che solo poco più de 1 ml/min vien espulso dai ureteri in vissiga.
2. Regolasion del volume extraselulare. Sia par qualità che par quantità, basta pensare a le conseguense del'insufficensa renale: el restagno de volume inte i vasi el porta a ipertension, in te'l interstissio (fora dai vasi, dito terso spassio) a èdemi; el restagno de scorie azotade el porta a l'intossegasion ciamada sìndrome urèmica.
3. Funsion endòcrina. A livelo renale ghe xe tre assi endocrini fondamentali. El primo xe la produsion de renina, ormon a la base del cussì dito sistema renina-angiotensina-aldosterone, che el règola la presion inte i vasi e'l riassorbimendo de aqua e sodio in te'l tùbulo a seconda de quanto vien filtrà e razonze el sensor tubulare ciamà macula densa, a so volta proporsionale propio al volume intravascolare. El secondo xe la produsion de eritropoietina, dependente da quanto ossìgeno el riva al rene e stimolante la produsion de glòbuli rossi a la megola òssea. El terso xe la conversion de la vitamina D inte la so forma idrossilata in posision -25 (dal figà) e -1 (dal rene) e donca ativa par stimolare un mazor assorbimento de calcio al'intestin.

El rene poe èssare colpio da un fraco de malatie deverse. La nefrologia la xe la siensa mèdega che la studia fisiologia e patologia de st'òrgano e le ripercusion sistèmiche del so funsionamento coreto e scoreto.

In cusina el rene dei anemali xe ciamà rognon e xe la base de piati difondesti in molte culture.