Difarense intrà łe version de "Storia de la Mauritania"

Co la fin de la conquista berbera, la se sa verto na lota tra i novi paroni de la Mauritania e i arabi dorigine yemenita – i ''maqil'' – che i volea controlar tuto el [[Maghreb]] osidentale. La lota, prima culturale e politega e poi anca violenta, la xe terminà co la Guera de i Trentani (1644 – 1674). I arabi i ghaga vu la mejo e i ghaga influensà la stratificasion de la società. I guerieri arabi – ''hassane'' - i xe diventà el grupo pi inportante de la società mauritana. Lori i gavea el dirito de farse pagar le tase da le tribù pi deboli. I berberi i ghaga dovù sistemarse in te le caste secondarie, ma i ghaga tegnù la dominasion spirituale visto che i marabuti – santoni musulmani – i xera quasi tuti berberi. Le tribù berbere che no gavea la posibiltà de fornir guerieri o omeni de cultura, i xe diventà i ''znaga'', la clase pi basa. I sciavi neri – caturà da le etnie a sud del fiume Senegal – i xe diventàa poco a poco i haratin, o mauritani neri. I ''haratin'' i xe ancò na etnia che vive servendo i mauritani bianchi considerà nobili. La società mauritana la xe senpre stà na società nomade, tribale e regolà da le lote interne. A lo steso tenpo, la cultura islamica e la produsion de opere scrite – famoxa la racolta de manoscriti de l’oasi de Cinquetti – la ghaga dato na strutura legale e non arbitrariamente ligà a le regole del pi forte.

L’arivo de i francexi a l’inisio del XX secolo el ghaga portà dei canbiamenti sociali forti. I francexi i ghaga proibio la sciavitù, che la xera parte de le regole sociali de la Mauritania. I ghaga ancà tentà de fermar l’influenza de i hassane, dandoge pi inportansa a i zawia e i znaga, che xera i grupi pi basi de la società. I francexi i ghaga meso fine a le lote tribali, che le ghe permetea a i hassane de controlar la vita tribale. I francexi i no ghe riusì a spacar el grovilio de contati tra diversi grupi e i ghaga dovesto senpre tentar aleanse tenporanee co i vari grupi. I mauritani i xe restai nomadi, favorendo la formasion de una elite de neri originari del Senegal.

El 28 novenbre 1960, la Mauritania la xe diventà indinpendente. La majoria de la popolasion la xera nomade e la cavedal Nouakchott la xera stà costruia in tuta freta rente al vilagio de Ksar. La majoria de i abitanti co residensa fisa i xera neri de origine senegalexe che i gavea preso in man l’aministrasion del potere. I altri mauritani i ghaga risposto a sta situasion forsando l’arabisazion del paexe. El primo presidente, Moktar Ould Daddah, el ghaga subito proclamà el mononpartitismo e el xe stà rieleto in tel 1966, 1971, 1976. Daddah el ghaga spinto par el rinovo econòmego e el se sa scontrà co la volontà popolar par el sfrutamento de le risorse naxionali, in man a i francexi. Par risolvar la question, el presidente el ghaga naxionalizà le companie minerarie in tel 1974.

En tel 1975, Daddah el gavea da frontegiar l’oposision in casa, e l’espansionismo marochin a l’estaro. La Mauritania la ghaga invaso el teritorio del Sahara Spagnolo, ancò [[Repubblica Araba Saharawi Democratica]], e el ghaga anexo el sud del teritorio. I guerilieri del [[Fronte Polisario]] i ghaga scominsià na guera de liberasion contro i mauritani. Par tri ani, i saharawi i ghaga atacà le postasion minerarie mauritane e persino bonbardà la cavedal. Daddah el ghaga mandà le trupe nere al fronte, ma queste le se sa ribelà parché i no volea conbatar na guera che i giudicava esar na guera araba. Daddah nol ghaga volù ritirarse e el ghaga preso decision senpre pi totalitarie.

El 10 lulio 1978, el colonel Mustafa Ould Salek el ghaga fato on colpo de Stato. El Polixario el ghaga proclamà on cesate el fogo. Ould Salek nol xe stà bon de mediare la situasion e el ghaga esasperà i neri del sud. A i inisi del 1979, Mohamed Khouna Ould Haidallah el ghaga fato n’altro colpo de Stato. Dopo na serie de atachi del Polixario, i mauritani i ghaga asetà de ritirarse da i teritori del Sahara Osidentale e riconosar el Fronte Polisario. El Maroco, che ocupava i teritori a nord, el ghaga reagì violentemente e el ghaga tentà de far on colpo de Stato a Nouakchott. I do paexi i ghaga roto le relasion diplomàteghe par qualche ano.

Haidallah el ghaga provà a canbiar le relasion tra i vari grupi de la società mauritana. El ghaga proclamà la fine de la sciavitù, decision che la vien fata da ogni governo mauritano, e el ghaga provà a darghe pi spazi a la minoransa nera. De fato, el ghaga dovù canbiar continuamente le aleanse, ricopiando in tel governo le vecie struture de aleansa tribale che le ghaga senpre governà la mauritania, le stese struture che el volea canbiar.

El 12 dicenbre 1984, Maaouya Ould Sid'Ahmed Taya el ghaga deposto Haidallah e el se sa proclamà capo del governo. Dopo verghe promeso el ritorno a la democrasia, el se sa dismentegà de le promese. Taya nol xe stà bon de svilupar el dialogo co le minoranze. La tension la xe salià fin a la guera de confin co el Senegal del 1989. Da alora la tension la xe diminuida, ma la diferensa tra mauritani de origine araba e de origine nera la resta presente in te la società.

Soto la presion interna e internasionale, Taya el ghaga parmeso la aprovasion de na nova Costitusion che la ghaga previsto anca el multipartitismo in tel 1991. Taya el xe restà al potere ma el ghaga subì vari tentativi de colpi de Stato.

El 3 agosto 2005, co el presidente Taya el xera in Arabia Saudita a i funerali del re Fahd, i militari i ghaga ocupà la cavedal. Dopo qualche ora de incerteze, i militari i ghaga fato saver a la naxion che i volea metar fine al governo de Taya. I militari i ghaga formà na giunta par prepar la strada verso la democrasia. El colonel Ely Ould Mohamed Vall, capo de i ribeli, el ghaga direto el governo a la scritura de na nova Costitusion, aprovà in tel giunio 2006. El 11 marso 2007, i mauritani i ghaga votà Sidi Ould Cheikh Abdallahi novo presidente del paexe.