People Mover de Venesia

El People Mover de Venesia xe el sistema de trasporto publico etometrico de tipo people mover, che cołega l'ixoła del Troncheto a Piasal Roma, pasando dała cussì dita zona Maritima. El xe entrà in funsion el 19 April 2010^[3].

El people mover gà vełocixà notevolmente el tenpo de parcorensa intra el Troncheto e Piasal Roma (a pìe ghe vol sirca 20 minuti, 3 minuti se se utiłixa el People Mover), anca se in vertù deła frequensa dełe corse (ogni 7 minuti dałe 7 ałe 23^[4]), e inaxònta el xe caraterixà da l'economicità par i viagiatori che no gà ła Carta Venesia (no se aplica infati ła tarifa diferensià prevista par i mexi de navigasion de l'azienda de trasporto publico)^[5].

Orsùxo xe previsto che, grasie anca ad altri łavori, el people mover agiuta a ridefinir l'organixasion de łe porte de aceso automobiłistego a Venesia^[6].

Tecnołogia El people mover de Venesia xe formà da 'na infrastrutura soraełevà (dai 5 ai 7 metri), formada da do piàstre guałive (neła fermada sentral deła Maritima łe piàstre deventa quatro, do par diresion, par parmetar l'incroxo intra i convògi che percore tragiti difarenti) sora łe quałe score, menà da un sistema a sóga, i convògi Dopplemayr Cable Car, indotà de rode gomàe. Le ròde portante ga l'aso orixontal, łe ròde guida gà l'aso vertical. Xe utiłixàe ròde gomàe par ridùxer al minimo l'inquinamento acustego. La sóga xe del tipo dito Jota e xe reałixàda in asial special^[7]. El scartamento tra łe do piàstre xe de 1220 mm^[7].

El disliveło intra i do estremi xe de 0.58 metri e tuto 'l parcorso gà na pendénsa inferior al 5%, fora che 'ntel trato de atraversamento del canal del Troncheto co' un ponte de 180 metri co' na pendénsa del 6.2%.

I convògi (consegnài al gestor el 4 setenbre 2009), automatici e dònca sensa conduxente a bordo, xe gestìi da 'na sała operativa postada al Troncheto^[8], xe conposti da 4 vagoni co' na capaçità conplesiva de 200 pasegeri (o 168 pasegeri più 8 carosìne, 2 par vagón) e pol raxonxer 'na vełocità masima de 26 km/h.

Xe el primo sistema de sto tipo in Eoropa.

El people mover xe stà progeta par straportar fin 3.200 pasegeri a l'ora par diresion ^[10].

Costi e inprexe I costi stimà par sta opàra publica, progetada dal venesian Francesco Cocco, gera previsti in 16 miłion e 331.483.76 € (IVA escluxa) erogà da l'ASM (società del Comun de Venesia, che gà contrato un mutuo a tal scopo) e da un finansiamento ministerial^{[5]sup> (lexe 211/92-interventi 'ntel setor dei sistemi de trasporto rapido de masa). El costo final xe stà invese de € 22.700.000, 13,41 miłion [11] a cargo de l'ASM, a cauxa de inatexi łaòri ai sotoservisi e de bonifega [12][13].}