Difarense intrà łe version de "Miami Heat"

I '''Miami Heat''' i ze una de łe trenta scuadre che łe zoga inte ła [[NBA]], co sede inte ła AmericanAirlines Arena de Miami, in Florida.

Pur sindo bastansa resente come scuadra, parché ła ze stà fondada inte’l 1988, ła ga vinto par tre volte ła [[NBA]]. El nome “Miami Heat” el ze stà sernìo co un sondajo intra i tifuzi, che i ło ga prefarìo a “Miami Vice”, come el film de połisìa.

I ani Noanta i ze stà caratarizài da alti e basi, ma A se recorda el tristo record de ła sconfita pi łarga de ła storia de ła [[NBA]] contro i [[Cleveland Cavaliers]] par 148-80 inte ła stajon 1991-1992. Dopo calche ano A ze rivà el sentro Alonzo Mourning che, sora de tuto co l’aiuto de Tim Hardaway, el ga portà a ła scuadra bełe vitorie par do tre ani, deventando un sìnboło. I ani Domiłe i se ga verto co ła bruta małatìa de Mourning, che a coeło A ghe ze stà dianjostegada na małatìa renałe (Mourning el ghe venjarà fora dopo tre ani), che ła ga conplegà ła strada de i Heat che i se ga trova sansa el zogador pi forte.

A’l draft de’l 2003 i Heat i ga cronpà Dwyane Wade e, poco dopo, Shaquille O’Neal, copia destinada inte’l 2006 a vìnsar el canpionado batendo in finałe i [[Dallas Mavericks]]. L’ano dopo el ze partìo mal a dirla tuta, anca par vìa de’l infortunio de O’Neal, tanto che i Heat i ze stài obrigài a véndarlo metendo fine a’l parìodo de gloria sparendo cusì da i piani alti de ła [[NBA]]. A’l draft de’l 2010, co’l boto, i ga cronpà da i [[Toronto Raptors]] Chris Bosh e da i [[Cleveland Cavaliers]] LeBron James che, co Wade, i ga formà i cusita diti “Big Three”: come che A se pensava, anca se i jera un grupo formà da poco, i ze stài boni de vìnsar ła [[NBA]] a’l so primo ano insenbre.