Difarense intrà łe version de "Parsonaji de One Piece"

'''Gold D. Roger''' el ze stà el cusidito "Re de i Pirati" e 'l capitan de ła ciurma de i '''Pirati Jolly Roger,''' a dir ła ciurma pì forte che ghe ze stà pa' i mari e par de pì l'ùnega che la ze stà bona de sircumnavegar tuta ła Łinea Granda par intiero. Par de pì łu el ga pubregamente declarà, vanti de subir l'ezecusion de ła condana a morte, che'l jera el posesor de'l mìtego tezoro ''One Piece'' e che tuti i gavarìa podesto sercar de catarlo. Daspò de la só morte 'sta informasion ła ze stà pubregamente confarmada anca da'l pirata [[Barbabianca]]. Roger el ze un parsonajo che'l conpare sùito a'l scumisio de l'òpara in forma de ''flashback'', ma co'l continuar de ła narasion łe só conparsade łe sarà senpre asè ràdeghe e de łu, daspò de vinti ani de pubregasion de'l manga, A se sa ancura tanto poco. Savemo par serto che Roger el jera nasesto a Rogue Town inte'l [[Jeografìa de One Piece#Mar Orientałe|Mar Orientałe]] e ancura da bocia el ga scumisià a metar su na ciurma co l'obietivo de "rebaltar el mondo". Inte łe puche siene che se ło cata da zòvane A se pol védar che'l gheva dezà indoso el famozo capel de paja che daspò el sarìa pasà a Shanks e, daspó ancura, a Luffy. Fizegamente el gheva calcosa de somejante co Luffy siben che'l fuse stà pì alto e muscołozo. Daspò de un parìodo łongo de aventure e de gaveta pa' i mari savemo che Roger e la só ciurma i ze pasài pa' ła [[Jeografìa de One Piece#Ponta de i Zemełi|Ponta de i Zemełi]] indóe che i ga recrutà Crocus co'l roło de mèdego de bordo parché el capitan el se gheva inacorto de ver un bruto mał: maldestin Crocus el ga podesto soło calmar i dołori de 'sta małatia, justo el tenpo che pasase cuatro ani e che finalmente i rivase a conpletar tuta ła Łinea Granda catando el ''One Piece''. Soło daspò che 'sta inpreza ła ze deventà pùbrega e łora Roger el ze stà ofisialmente ciamà da tuti el "Re de i Pirati". Rivà a 'sto ponto el ga siolto ła ciurma, łasando che onjun de i só òmeni el seitase ła só strada, e daspò de n'altro ano el ga desidesto de consenjarse spontaneamente a ła Marina. Ła Marina parò ła ga senpre pubregamente declarà che ła jera stà eła a caturarlo. Poco tenpo vanti de èsar justisià Roger, tamentre che'l jera recruzo in seła, el ga confesà al só aromai ex aversario Monkey D. Garp (el nono de Luffy) che A ghe jera nasesto un fioło che'l se ciaméa Portuguese D. Ace, e Garp el ga asetà de farlo crésar tenjendo sconto 'sto segreto a'l Goerno (e par 'sto motivo Ace el ze stà conpanjo de infansia de Luffy e Sabo). L'ezecusion de ła condana a morte ła ze stà mesa su purpio a Rogue Town, ła só sità de nasita, scuazi a vołer sinbołegamente métar ła fine a un siclo. El dì che i ga justisìa Roger jera prezenti scuazi tuti i pirati che daspò i sarìa deventài inportanti, par ezenpio tanti che i sarìa nài rento i Sete Corsari opur el steso Shanks, che'l jera stà novisio de i Jolly Roger, e che de sèito el deventarà inperador. Tra tuti manchéa parò el mejo amigo de Roger, par de pì capitan vicario de ła ciurma, a dir Silvers Rayleigh che, contando 'sta storia a i ''Mugiwara'', el ga confesà che che'l dì "no'l ga mai piandesto, ridesto e bevesto cusì tanto". Calche secondo vanti de èsar copà Roger el ze stà bon de pronunsiar ła fraze ciave de tuta l'òpara, a dir: "El me tezoro...? Se ło vułì, el ze vostro... A gavì da sercarlo! Mi A go łasà tuto inte un serto posto!". 'Ste puche parołe łe ga scaenà un putiferio in tuto el mondo e, donca, ła Marina ła se ga catà che, invese de ver serà par senpre un siclo, A ghe ne jera scumisià n'altro, a dir "l'Era de ła Piratarìa". El parsonajo de Roger el ze donca ła prinsipałe fonte de ispirasion de Monkey D. Luffy.