Difarense intrà łe version de "One Piece"

Ła storia de ''One Piece'' ła scumisia co ‘sta fraze pronunsiada da’l "Re de i Pirati" [[Parsonaji de One Piece#Pirati Jolly Roger|Gol D. Roger]] poco prima de èsar justisìa da ła [[#Marina (One Piece)|Marina]] inte’l patìboło de ezecusion: in cheła ocazion Roger el conferma l’ezistensa de’l tezoro ciamà purpio ''One Piece'' e, dizendo cusì, el scaena ła cusidita "Era de ła Piratarìa".

Siben che ła storia de’l manga ła ciapa rento un stramaro de parsonaji e de situasion A se pol dir che’l protagonista asołuto de l’òpara el ze un tozatel de njanca vinti ani che’l se ciama [[Monkey D. Luffy|Monkey D. Luffy]]. Ła narasion ła scumisia co łu che’l ciapa el mar pa’ ła prima ‘olta in serca de’l mìtego tezoro ''One Piece''. A partir da i primi capìtułi Luffy el scumisia a catar vari conpanji de aventura, tuti cuanti co na abiłità partegołare, che i ndarà a costituir ła [[One Piece#Ciurma de'l Capel de Paja|Ciurma de’l Capel de Paja]] (''Mugiwara'' in orizenałe japoneze), ciamà cusì purpio in onor de’l capel de paja che Luffy el ga indoso sin da’l primo epizodio. Daspò de vinti ani de pubregasion regołare njancura no se sa mìa che cosa che’l sipia el tezoro ''One Piece'', siben che ła só ezistensa ła ze stà confarmada da [[Parsonaji de One Piece#Pirati Jolly Roger|Gol D. Roger]] e anca da n’altro strainportante pirata ciamà [[Parsonaji de One Piece#Ciurme de i Cuatro Inperadori|Barbabianca]]. Roger el ze stà ciamà “Re de i Pirati” parché, co ła só ciurma, el ze stà el primo a concuistar tuta ła [[Jeografìa de One Piece#Łinea Granda|Łinea Granda]]. A'l ponto de ła narasion che’l coresponde a’l vołume n°82 A savemo che Luffy e i primi menbri de ła ciurma i ze partii da’l [[Jeografìa de One Piece#Mar Orientałe|Mar Orientałe]], i ze entrài inte ła Łinea Granda, i ga traversà tuta la prima parte anca dita el [[Jeografìa de One Piece#Paradizo|Paradizo]] ciapando rento man man altri menbri, fin che i ze stài sconfiti inte un scontro contra de ła Marina na ‘olta che i jera rivài a’l confin con ła [[Jeografìa de One Piece#Łinea Rosa|Łinea Rosa]], pronti par pasar inte’l [[Jeografìa de One Piece#Mondo Novo|Mondo Novo]]. A sèito de ciò i ze stài sparpanjài in jiro pa’l mondo per du ani, par poderse cusì arlenar e mejorar. Daspò de [[One Piece#El salto de du ani|el salto de du ani]], e de i avenimenti de ła Bataja Granda de [[Jeografìa de One Piece#Marineford|Marineford]], i [[One Piece#Ciurma de'l Capel de Paja|Mugiwara]] i se ga catà tuti insenbre pa retornar a navegar inte'l Mondo Novo. Chive i ga vuo ocazion de scontrarse co’l pirata [[Parsonaji de One Piece#Ciurme de i Sete Corsari|Don Quijote Do Flamingo]] (ex de i [[One Piece#I Sete Corsari|Sete Corsari]]'')'' e i ze drio pa' intrigarse co un de i [[One Piece#I Cuatro Inperadori|Cuatro Inperadori.]] L’autor [[Eiichirō Oda|Oda]] el ga declarà che, rivài a ‘sto ponto, l'òpara ła ze sirca a’l 70% de ła narasion <ref name="One Piece è al 70 per cento"> One Piece è al 70 per cento.[http://onepiecegt.it/One_Piece_%C3%A8_al_70_per_cento.htm]</ref>. Donca A ghe vorà ancura de i ani vanti de rivar a ła fine de ła storia.

I '''pirati''' i ezisteva dezà vanti de [[Gol D. Roger]] ma, daspò de ła só declarasion pùbrega revardo el tezoro ciamà ''One Piece'' (fazesta inte’l patìboło de ezecusion), A se pol dir che da chel momento ze scumisià ofisialmente "l'Era de ła Piratarìa". A se cata łe ciurme de pirati dezà inte łe acue de i Cuatro Mari, indóe che i tende a far i sparonsoni tra łe popołasion de łe varie ìzołe e co ła [[#Marina (One Piece)|Marina]] che parò A ghe tien bota. A partir da’l Paradizo de ła Łinea Granda A se cata ciurme asè pì potenti e organizàe e par 'sto motivo tante ìzołe łe ze sote el controło direto de i pirati, soratuto de coełi che i apartien a i Sete Corsari. El Mondo Novo el ze goernà solche da i Cuatro Inperadori, donca se na ciurma ła vol soravìvar in 'ste acue o ła se sotomete a un inperador opur A ghe toca sfidarlo. Scuazi tuti i pirati pì forti i ze dotài de i poteri spesiałi derivanti da'l fato de ver manjà un partigołare [[Glosaro de One Piece#Fruti de'l Diàoło|Fruto de'l Diàoło]] e, a'l isteso tenpo, i ze anca boni de doparar łe varie forme de [[Glosaro de One Piece#Anbision|Anbision]].

Prima de ła Bataja Granda de [[Jeografìa de One Piece#Marineford|Marineford]] a’l posto de Barbanera el jera inperador [[Edward Newgate “Barbabianca”]], conosesto par èsar l’omo pì forte de’l mondo e copà in cheła bataja purpio da'l pirata Barbanera. Un puchi de ani indrìo Barbabianca el gheva sintìo ła spiegasion de'l segreto de'l ''One Piece'' ciacołando de parsona co [[Parsonaji de One Piece#Pirati Jolly Roger|Gol D. Roger]], ma no’l se ga mai intaresà par catarlo. A savemo anca che Shanks, da zóvane, el jera stà novisio inte ła ciurma de’l Re de i Pirati e donca pol èsar che anca łu el conosa calcosa. A no savemo mìa se Big Mom e Kaido i sipia a conosensa de ła verità so'l ''One Piece'', par serto savemo che i ze drio nar in serca de i misteriozi [[Glosaro de One Piece#Poneglyph|Road Poneglyph]] che i serve par catar ła diresion justa par l'ìzoła de [[Jeografìa de One Piece#Raftel|Raftel]], indóe che se pensa che ghe sipia el tezoro. I Cuatro Inperadori i ze paroni asołuti de’l Mondo Novo, njanca ła Marina ła ze bona de contrastarli, siben che nisun de łuri el sipia bon de prevałer sora de chełaltri. I convive su che’l toco de mar in virtù de un dełicato ecuiłibrio che'l stà in piè a mezo de ałeanse co chełaltre ciurme, ma anca a mezo de crìmini e de tramaci małavidozi.