Càmara dei deputai (Itàlia)


Łe Istitusion in Itałia


Sistema połitego de ł'Itałia










modifica

Categorie: Pułitega, Dirito e Stato
'

La Camara dei deputai, inte l'ordenamento costitusionałe italian, ła ze l'asenblea lejislativa che, in union al Senato de ła Repùblega, i forma el Parlamento.

Istituia inte el 1861, ła sostituia ła Càmara dei deputai sardo-piemonteza e, inte el ndar de el perìodo monàrchego, ła zera fiancada dal Senato del Regno; ła ze restada in dòpara fin al 1939, co che ła ze vegnesta sopiantada da ła Camara dei fasi e de łe corporasion, vegnendo in fin recuparada co l'avegnimento de ła Costitusion republegana.

Ła ze contenplada inte l'interno del Tìtuło I de ła parte seconda de ła Costitusion che, inte el desiplinar el Parlamento inte el so insieme, el delìnea un sistema bicamarałe perfeto.

Sede de ła Camara canbia

  Par savèrghene de pì, vardarse ła voxe Pałaso Montecitorio.


Sede de ła Camara dei deputai el ze Palaso Montecitorio, andove che ła se reunise fin dal 1871, poco dopo el spostamento de ła capitałe del Regno d'Itàlia a Roma.

Le sedi antecedenti de ła Camara del Regno d'Itàlia łe ze stae Pałaso Carignano a Turin (1861-1865) e Pałaso Vecchio a Firense (1865-1871).

A Montecitorio i se ghea sentà anca i òrgani asenbleari che i ghea interonpesto ła secuensa intrà Càmara dei deputai del Regno d'Itàlia e Càmara dei deputai de ła Repùblega Italiana: dal 1939 al 1943, inte el ndar de el rezime fasista, ła Camara dei deputai ła zera stada sostituia da ła Camara dei fasi e de łe corporasion, ła cuała ła ze sta a so volta sucedesta, dal 1945 al 1946, da ła Consulta nasionałe e, dal 1946 al 1948, da l'Asenblea Costituente.

Conpozision canbia

Orìzenariamente el Statuto Albertin e ła Costitusion repùblegana łe prevedea un nùmaro de deputai variàbiłe in baze a ła popołasion de cadauna sircoscrision; partindo dal 1963 el numaro totałe el zera vegnesta fisà a 630.

A norma de l'art. 56 Cost., cofà modìfegà da ła leje costitusionałe n. 1/2020, aprovada col referendum confermativo, ła Càmara ła ze fazesta da 400 deputai. ste conpozision łe vegnarà in vigore partindo da ła XIX lejislatura.

Sistema ełetorałe canbia

Perìodo monàrchego canbia

La prima leje ełetorałe, mutuada da cueła in vigore inte el Regno de Sardegna, ła prevedea un'ełesion del Parlamento Italian co un scrutigno majoritàrio de dópio turno, col paeze sudividesto in tanti cołeji cuanti che łe zera łe càreghe de l'asenblea

La prima modìfega ła ghe ze stada inte el 1919 co se ze pasai a un mecanismo proporsionałe intrà liste concorenti de partio.

L'avegnimento del fasismo ła ga dazesto liogo a na inflesion antidemocràtega inte el sistema ełetorałe, da-prima co ła leje Acerbo che inte el 1924 ła coreze ła proporsionałe co un stra-largo prèmio de majoransa, paro ai do tersi de łe càreghe, a favor de ła lista pì votada, e dopo col pasajo inte el 1929 a un sistema plebisitàrio inte el cuało na formałe aprovasion popołare ła zustìfegava ła ełesion escluziva dei candidai dezignai dal rezime. La cadesta del rezime fasista col consevente restabiłimento de łe libartà democràteghe, fin da łe ełesion de l'Asenblea Costituente inte el 1946, ła ghea permetesto de rivoltar a na leje ełetorałe che ła prevedese na respartision proporsionałe de łe càreghe su baze sircoscrisionałe e co insegnasion de cheło che resta su baze nasionałe.

Perìodo republegan canbia

Dal 1948 al 1993 ła Camara ła zera ełezesta co un sistema proporsionałe s-ceto. Inte el 1993 se ze pasai a un sistema ełetorałe in prevałensa majoritàrio (leje Matareła): el 75% dei deputai (o sia 475) el vegneva ełezesto co un sistema de tipo majoritàrio: in cadauno dei 475 cołeji uninomenałi inte el cuało el zera dividesto el teritòrio itałian, el vegneva ełezesto soło chi in sti cuà el tołeva-sù el pì grando nùmaro de voti, finmente che el restante 25% de łe càreghe el vegneva ełezesto co un sistema proporsionałe, corezesto co un mecanismo par favorir i partii perdenti inte i cołeji uninomenałi, ma co un sbaramento par i partii che no i superava el 4% dei voti.

Inte el 2006, dopo trè lejislature, ła ze stada aplicada na nova leje proporsionałe, ła Leje Calderołi, che no ła prevede de esprìmar prefarense verso i candidai ma solché a na lista, corezesta co un prèmio par ła coałision de majoransa rełativa (ła ciapa 340 seji, se no ła ze bona de ciapar un nùmaro superiore), e par ła prima volta i ze stai asegnai dei seji par i ełezesti dai sitadini italiani che vive fora del teritòrio nasionałe.

Inte el 2015 ła leje Calderołi, za declarada in parte incostitusionałe l'ano prima, ła zera sta definitivamente sostituia dal denomenà Italicum, de inpianto proporsionałe, siben che corezesto, a dópio turno co bałotajo. La nova leje ła prevede na conbinasion de cai-lista "blocai" e preferense, oltre che a mantegnere el prèmio de majoransa de 340 seji a ła lista (e mia pì a ła coałision) che ła rìvee inmanco al 40% dei voti o che ła vinsa l'eventuałe bałotajo.

Dopo de l'entrada in vigor de ła leje Rosato che ła istituise un conpleso sistema smisià de proporsionałe (bazà su picenini cołeji e liste blocae) e uninomenałe, a prevałensa proporsionałe. 232 deputai i vien ełezesti co un sistema majoritàrio e 386 co sistema proporsionałe. El lìmite de sbaramento el ze sta fisà al 3%, co liste blocae e sensa pusibiłità de voto dis-zontà.

Eletorà ativo e pasivo canbia

La Camara dei deputai ła ze ełezesta a sufrajo universałe e direto.

I ze ełezìbiłi a ła càrega de deputà tuti i ełetori che inte el dì de łe ełesion i gàpia conpiesto vintisincue ani de età.

Durada del mandà canbia

La Càmara (cusita cofà el Senato) ła ze ełezesta par un mandà de sìncue ani. El presidente de ła Repùblega, na volta scoltai i so presidenti, el połe desòlvar łe Càmare, o anca solché una de ste cuà.

L'art. 61 de ła Costitusion ła prevede che łe ełesion par el renovo de ła Camara łe avegna drento de 70 dì da ła fin de ła presedente. El cołejo cusita renovà el se reunise entro vinti dì da łe ełesion.


Controło de autoritàVIAF (EN151997339 · ISNI (EN0000 0001 2325 6226 · LCCN (ENn79043899 · GND (DE1005718-3 · BNF (FRcb11864658v (data) · BNE (ESXX87367 (data) · NLA (EN35735787 · BAV ADV10085494 · WorldCat Identities (ENn79-043899
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Càmara_dei_deputai_(Itàlia)&oldid=1159828"