Mau Mau

I Mau Mau i xera on grupo de kenyani – quasi tuti de etnia kikuyu – che i ga combatù contro i colonialisti dal 1952 al 1959. El nome Mau Mau el xe stà dato da i bianchi. Lori i se ciamava Muingi (el movimento).

Inisi

Dopo ani de tentativi de cambiamento co el dialogo, i kenyani i sa oposto al colonialismo inglexe co la violensa. I kenyani i gavea combatù par l’Inghiltera durante la seconda guera mondiale (campagna de Burma e altre campagne axiatiche). Al ritorno in Kenya, i se spetava on riconosimento, che el no xe mai vegnù. A lo steso tempo, le tere migliori de i fertili altipiani sentrali del paexe le xera stà tolte da i coloni. I kikuyu, embu e meru i xera i popoli che gavea perso le tere e la posibilità de mantegnar le fameje. Sole el 10% de i kikuyu i lavorava inte le fatorie de i bianchi, in cambio del laoro i pode coltivar on toco de tera. Durante i ani de la seconda guera mondiale, i coloni i volea pi laoro e i dava manco tera a i lavoratori. A l’inisio de i ani sinquanta, la majoria de i kikuyu i vivea in manco de 5 000 km², col risultà che la zente la vivea in zone sovrapopolade, senza magnare e ne la povertà pi granda. El grupo Asociasion Sentrale de i Kikuyu (KCA), che i inglexi i gavea meso al bando, el gavea organisà de le campagne de disobediensa sivile par discutar del problema de la tera. I membri de sto grupo i fasea on giuramento de fedeltà, come el xera costume in la cultura de i popoli bantu de i altipiani. Anca i sindacati i gavea scominsià a lorar insieme. El 1 magio 1949, sie sindacati i se sera riunii co el nome de East Africa Trades Union Congress, Congreso de i Sindacati de l’Africa Orientale (EATUC). On ano pi tardi, i gavea domandà l’indipendensa. Tuti i cai del sindacati i xe stà arestà el 1 magio 1950. El 16 magio, i lavoratori de Nairobi i ga scominsià on siopero che el ga paralisà la cavedal par nove dì. Anca se el goevrno el ga fato arestar pi de 300 lavoratori, el siopero el xe ndà vanti a Mombasa e Nakuru. Co tuti i leader in prison, el EATUC no el xe stà bon de continuare a laorar. Co i tentativi de dialogo i xe falii, la sola posibilità restada la xera la rivolusion. I veterani de guera i ga formà el Grupo de i Quaranta e i se sa unio co el KCA.

Risposta inglexe

En tel magio 1951, el ministro par le colonie (Colonial Secretary) Jim Griffiths, el ga visità el Kenya. El partio politego Kenya African Union (KAU), Union Africana del Kenya, el ga presentà na lista de richieste: l’eliminasion de le legi raziste e la presensa de 12 membri in tel governo locale eleti da i africani. Griffiths no ga volesto savere de ste domande e el ga proposto la formasion de on governo locale co 14 rapresentanti eleti da i 30 000 bianchi, 6 eleti da i 100 000 indiani, 1 eleti da i 24 000 arabi e 5 nominati dal governo inglexe par rapresentar 5 milioni de africani. Sta proposta la ga convinto anca i pi otimisti che el xera imposìbiłe parlar co i inglexi. El tel giunio 1951, i membri radicali del KCA i ga deciso de formar de i comitati secgreti par organixar i giuramenti de sangue inte le sità. Jomo Kenyatta, che el no xera one de i radicali, el xe stà bon de farse elegere cao del KCA. En novembre, el KCA el ga meso l’indipendensa ne i so obietivi pi importanti. I comitati segreti i ga fato copare i kikuyu pi importanti che i laorava co el governo inglexe.

La rivolusion

El governatore del Kenya, Sir Mitchell, el xera drio ndar in pension. El no xe sta bon de caire che la situasion la stava andando mal. El novo sostituto governatore, Henry Potter, el xe rivà el 1 giunio 1952 e el ga trovà na situasion de violensa che el no spetava. El governo el sa meso subito a combatar i primi segni de rivolusion e el ga meso presion su Jomo Kenyatta parché el parlase contro i Mau Mau. Kenyata el ga fato vari discorsi doe el condanava i Mau Mau. Nisuni el xe stà bon de caire se Kenyatta usava de le frasi in codice par far cair el vero mesagio o manco. I inglexi i xera convinti che Kenyatta el fuse el vero cao de la resistensa. El 6 otobre 1952, el novo governatore del Kenya – Sir Evelyn Baring – el xe rivà a Nairobi. Dopo do setimane el ga dichiarà el stato de emergensa.

Stato de Emergensa

Co el stato de emergensa, el governo el ga fato arestar tuti i cai del KCA che i trovava e pi de 8 000 persone considerà pericolose. I veri cai del movimento i xera za nascosti. La risposta de i Mau Mau no la sa fato atandar tanto. En manco de do setimane, le fatorie de i bianchi e i racolti i vegnea brusà, e pi de 1 800 colaborasionisti copà. I Mau Mau considerava colaborasionisti i kikuyu che laoraa par i bianchi, ma anca quei che i se sera fati cristiani o che gavea on toco de tera. I inglexi i hja subito mandà de i rinforsi. Entuto el periodo de emergensa, 55 000 soldadi inglexi i ga combatù in Kenya. El Comitato Sentrale del KCA el ga dichiarà guera a i inglexi, anca se i membri no gavea preparasion militare e nianca armimoderne par metarse contro i colonialisti. El sostegno popolare e la mancansa de trupe inglexi preparà a combataer in Kenya, i ga parmeso che i Mau Mau i gavese la mejo inte i primi mexi de guera. I vari grupi de combatenti, che i se fasea ciamar Armate de la Libartà e de la Tera (Land and Freedom Armies), i se nascondea su le montagne Aberdare e ne le foreste del Monte Kenya. I no gavea na coordinasion sentrale e i tre leader pi importanti – Stanley Mathenge, Waruhiu Itote e Dedan Kimathi – i gavea strategie diverse. El 24 genaro 1953, i Mau Mau i ga copà la fameja Ruck, co on fiol de sie ani. Sto fato el ga fato cambiar la determinasion de i inglexi. I coloni i ga licensià tuti i laoradori kikuyu, costruio dei fortini de protesion inte le fatorie, e comprà armi par difendarse. El 25 marso 1953, i Mau Mau i ga atacà el vilagio de Lari, poco fora de Nairobi. I abitanti de Lari i xera tuti kikuyu e catoleghi, e par i Mau Mau questo volea dir anca colaborasionisti. 170 done e buteleti i xe stà copà in sto ataco. I mas mèdia inglexi i ga fato presto a descrivar i Mau Mau come de selvagi boni solo a copar i inocenti e bear el sangue de i buteleti. In aprile 1953, i kamba e i maasai i se ga organisà contro i inglexi inte la zona de Machakos, i primi, e quela de Narok, i secondi. La risposta inglexe la xe stà on incremento de le trupe e le legi speciali. I monti Aberdare i xe stà dichiarà ‘area proibita’. Ci entrava o usiva sensa parmeo el podea esar fusilà sul posto. Le riserve kikuyu le xe stà dichiarà ‘aree speciali’. La zente la dovea portar documenti e farli vedar a la polisia. Se uno no se fermaa, el podea esar fusilà sul posto. Co sta scusa, i inglexi i ga copà i sospeti che i catava. En tel aprile del 1954, i inglexi i ga ocupà militarmente la cavedal e arestà 17 000 africani, pi de la metà de la popolasion adulta. Pi de 15 000 i xe stà mandà ne i campi de concentramento. La majoria i xera inocenti, e tanti ie morti de fame e malatie, specialmente de colera. Pi de 77 000 kikuyu i xe stà mandà in sti campi durante el periodo de l’emergensa.

La fin

L’aresto de tanta gente, el sistema de le riserve (1 100 000 kikuyu streti in 854 vilagi), e el controlo militare de le sità el ga tajà le linee de rifornimento a i Mau Mau. En poco tempo i grupi armati i no xe stà pi boni de sopravivere inte la foresta. En tel 1956, quasi tuti i cai i xera morti o in prison, e solo 500-600 armati i rimaneva inte la foresta del Monte Kenya. L’ultimo cao de i Mau Mau, Dedan Kimathi, el xe stà caturà el 21 otobre 1956 da Ian Handerson e impicà l’ano dopo. La rivolusion de i Mau Mau la xera finia, anca se el stato de emergensa el xe andà vanti fin al 1960 e de i grupeti de Mau Mau i xe restai inte la foresta fin a l’indipendensa. Le legi de l’emergensa no le xe mai stade canselà, e i governi de Kenyatta e de Moi e le ga usà par controlar el paexe co che ghe piaxea.

Ripercusion

I inglexi i ga vinto sul pian militare, ma i ga perso sl pian politego. Tute le domande fate dal KAU in tel 1951 le xe stà otegnude. El costo el xe stà alto. Pi de 70 000 kikuyu i xe stà copà durante l’emergensa – almanco 25 000 i xera butini soto i 10 ni de età -, solo pochi inglexi i xe stà copà (32) o ferii. El governo inglexe el ga de frecuente na fortuna par mandar vanti la campagna militare, ma a la fin el ga dovù acetar on governo locale e la formula “na persona, on voto”. I coloni bianchi i pensaa de essar forti, ma i no gavea on vero peso econòmego. Solo el 20% de i investimenti inglexi i xera controlà da i agricoltori. Lo 80% de investimenti i xera in man de comanie che no gavea problemi a laorar co on governo de africani. El preso pi alto el xe stà pagà a livel sociale. Le atrocità comese da inglexi e africani le ga lasà n’eredità de violensa e sospeto.

Altri progetti

• Wikimedia Commons

• Wikimedia Commons el detien imàjini o altri file so Mau Mau

Controło de autorità	LCCN (EN) sh97007004 · GND (DE) 4169145-3