Połenta e oxei


Ła połenta e oxei xe un piato tipico dei Veneti, dei Furłan, ma anca dei Bresani, dei Bergamaschi e pi in generałe de tuti i abitanti de queła ke xera ła republica de Venesia. Ła xe na conbinasion de połenta e osełeti (séłeghe, finchi, tordi, łodołe, petarełi ecetera) fati al speo.

Połenta e oxei "dolce"

Se prepara da na parte ła połenta e da kel'altra i oxei. A sti qua, ke i ga da esare 20-30, bisogna prima cavarghe tute łe piume e dopo meterli un poco sora el fogo par sbrusarghe quel ke resta. Se ciapa, dopo, un oseo par volta e ło se inpira su pal speo, meténdoghe de fianco na feteła de lardo e na foja de salvia, e se fa girar pian pian el speo par 10-15 minuti. Pi vanti, ogni tanto se ghe mete sora un fià de buro ke'l se desfa, e un poco de sałe e se va vanti cusì par ore e ore. El tocio ke vien xo el ga da cascare 'nteła łecarda. Finio de cuxinar, se porta in toła i oxei insieme a ła połenta ke se pol magnar moła, ma anca brustoła a fete drento ła łecarda. El tocio el se versa sora. Ghe va ben insieme un goto de keno, tipo Cabernet o anca Merlot.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Połenta_e_oxei&oldid=1110254"