Sołeta
In ediłiẑia se costuma ciamar co la parola sołeta na strutura orizontal in material diverso dal legn in grado de trasferir i sforẑ (pi che sia quei in piei) a altre struture.
Na soleta la pol esser fata de cimento armà, de aciaio, de maton, o co altri materiai. Se la ze fata de legn la se ciama sołer.
Evoluẑion tecnologica canbia
La tecnica de far solete la ze nassesta co el bisogn de diminuir al spessor che era necessario par far i soler e par er na ciusura orizontal che esse manco bisogn de manutenẑion, che no la ciapesse fogo e che la isolesse mejo dal rumor e dal calt.
Le solete de matoi canbia
I romani, par far le solete, i doperea tanto al legn fa le tecniche de costruẑion del maton: par querder anbienti grandi se costumea far no an soler ma na cuba de matoi, che la gnea inpienida te el sora fin a far an pian de apogio par al livel sora o par al quert. Nonostante sto particolar, a na cuba no se pol ciamarghe soleta parchè sta ultima parola la se riferiss pi che sie a struture orizontai che che le descarga al peso te i mur laterai in direẑion vertical (la cuba e al arco i dà anca sforẑ orizontai) e che le laora par flesion dei elementi (la cuba la laora par conpresion e atrito tra i bloch doperadi).
Le solete de aciaio canbia
Co la introduẑion del fer prim, e del aciaio pi tardi, se ga svilupà la tecnica costrutiva de la soleta in fer e maton, costituida da travet de metal che i querde la luce pi curta del vodo, e da matoi aposta, ciamadi taveloi, a querder la distanẑa intrà i travet. De el '800 e fin a la prima metà del '900 se usea far cubea bot par querder al vodo tra i travet: sta qua la ze ciamada sołeta co voltine alla romana, parchè sta tecnica la ze stata doperada tanto a Roma (te un quel periodo, paraltro, in Italia se ga fat su pi che sia a Roma, par colpa del trasferimento de la capital co tuti i so ministeri e indoti). Sta tecnica dess la ze doperada solche inte i edifici che i ga na strutura portante in aciaio. La soleta in fer e maton la ze tanto elastica, la risent dei teremot e la pol trasferir fret inte el anbiente se na testa del travet la ze a contato co el esterno. Le ze solete che de solito le ga an spessor tra i 20 e i 30 cm.
La soleta de matoi e ciment canbia
Ultimo in orden de tenpo al ze stat al svilupo de la soleta de metoi e ciment, fata in cimento armà e matoi. La ze na tecnica costrutiva che se vet da spess, doperada inte la realizaẑion de senplici soler par comuni abitaẑion aonde che la strutura de cimento armà la se donta a elementi de inlidieriment de tera cota. Se trata de trau de cimento armà ("travet") metesti a na distanẑa de circa medo metro, e in meẑ a sti qua se ghe mete elementi de teracota , tipo i matoi, ciamadi "pignate"; sora i travet e le pignate se geta la caldana de betume de un spessor minimo de 4 schei. Se fa na soleta metendo le pignate (no taveloi parchè no le partecipa in modo ativo dal punto de vista strutural) a file sora na armadura piana de legn; tra na fila e que el altra se ghe poja i fer e po se ghe tra al betume. Inte la tecnica costrutiva classica, al geto de betume che el costituiss i travet al ze al isteso che costituiss an ca la soleta armada. La strutura de la soleta la ze fenida cossì. Soreghe pol esser metest do al pavimento. Al svilupo de sta tecnica al ze stat fort inte i ani, considerando al ingresso inte el marcà de travet prefabricadi autoportanti ciamadi "sap" (che i evita de er da far an unico gran pian de legn da doperar come armadura par al geto) e de diverse soluẑion par al inlidieriment de la soleta , tra le quale i novi materiai plastici (sfere, paralelepipedi) al posto del maton forà. Incoi la tecnica pi doperada, anca se la ga subì tante trasformaẑion deograẑia de la evoluẑion de le tecniche de costruẑion, come i sap, le pignate de materiai innovativi, o anca vere e proprie solete prefabricade che ga da esser postade in opera. Evoluẑion de sto tipo se solete le ze le solete de cimento armà nervade e le solete fate na un unico geto de cimento, senẑa matoi frameẑ. La risent del sovracargo, da' che la ga na rotura desfrasile (la ga poco preaviso prim de ceder), la ze la soleta che resiste mejo al incendio. La se conporta ben in caso de teremot (se fata polito) ma, se la subiss lesion, la va demolida e rifata su de novo, parchè tante olte no convien farghe consolidamenti. Te el marcà, dess come dess, se cata anca solete prefabricade che basta postarle in opera tramite sostegni provisori ciamadi "ronpitrata" o anca senẑa gnessun sostegno. Te un sto caso la soleta "autoportante" la ga bisogn de poder esser pojada te i bordi par an pochi de ẑentimetri. Le solete cossì pojade e in seguito getade le sarà, na olta inmadurì al cimento, sbianchedade (par de sot) e pavimentade (te el sora). Ẑerte dite le fa anca solete belche sbianchedade te el de sot.
Tecniche de costruẑion canbia
De solito a le solete, indipendentemente dal tipo de material doperà a farle, ghe gnen senpre dat na ẑerta panẑa in su in meẑ a la canpada, co el dopio scopo de pareciar al pian al sforẑ de conpresion e de remediar al efeto de panẑa verso al bass dovest a ilusion otiche.