Difarense intrà łe version de "Storia del Madagascar"

La '''Storia del Madagascar''', en tel senso de na storia basada so documenti, la scominsia co l’arivo de i primi arabi en tel VII secolo de la nostra era. L’ixola la xera za abità da zente vegnù da la Polinesia e da l’Africa. De ste prime migrasioni ghemo notisia solo co la leteratura orale, che la riporta fati storici e la mitologia malgasia.

 

Verso el VI secolo a.C., le popolasioni de la macro region ciamada austranesia le se sa espanso par rivar a popolar la polinesia e el sud est axiatico. Seguendo le corenti equatoriali, grupi de sti popoli i xe rivà so le ixole de l’Oceano Indiano. Verso el II secolo d.C. i xe rivà anca so l’ixola de [[Madagascar]]. Le migrasioni le xe continuà fin al V secolo.

 

Pi o meno a lo steso tenpo, popolasioni bantu de l’Africa Orientale le xe rivà so l’ixola en te la parte osidentale. I do grupi i sa miscià presto, visto che a l’arivo de i primi eoropei en tel XVI secolo no ghera diferense visibili tra la popolasion malgasia. La cultura malgasia la presenta ancò sia trati axiatici che africani. La mitologia la parla de i ''vazimba'', on popolo nano de bianchi che i abitava el Madagascar prima de tuti. I vazimba i saria ancora so l’ixola, ma i vive sconti en te la foresta. La venerasion de i avi la xe ona de le carateristiche de la cultura malgaia, e i vazimba i xe considerà i avi pi ancestrali.

 

Marcanti arabi i gha probabilmente conosù le coste del Madagascar par secoli. En te la leteratura arabo-persiana se cata tanti nomi par on ixola a est de l’Africa: Phebol, Cernea, Menuthias, Medruthis, Sherbezat, Camarcada, e l’Isola de la Luna. Anca se no se pol esar sicuri, ono o pi de sti nomi dovaria riferirse al Madagascar.

L’influso arabo, picinin ne i numari, el xe stà grando en te la cultura. Tuti i nomi che riguarda el tenpo – mesi, stasoni, dì de la setimana – i schei e la medesina vien da l’arabo. Anca la pratica de la circoncision, la strutura de la società (da matriarcale a clanica) e la pratica de la divinasion le xe stà introdote da i arabi.

 

En tel XV secolo, i eoropei i gha volù verzar linee de comercio co le Indie par metar da parte la mediasion de el mondo arabo. I portoghexi i gha scominzià a esplorar le coste de l’Africa par catar on pasagio a sud. El capitan Diogo Dias el xe stà el primo eoropeo a metar pié su le coste del Madagascar en tel 1500 co la so nave la xe stà mesa fora rota da i venti en tel canal del Mozanbico. I portoghexi i no xera interesadi costruir n’avanposto en Madagascar. Francexi e inglexi, invese, i gha tentà de verghe on ponto de atraco so le coste de l’ixola. Guere co le popolasioni locali, malatie e on clima difisile i gha senpre meso fine a tuti i tentativi. El xe stà solo che a la fine del XVII secolo che i francexi i xe stà boni de costruir de i forti permanenti so la costa orientale.

 

La presensa eoropea la gha introdoto le guere per caturar i sciavi da vendare a i marcanti olandexi, inglexi e francexi. I capi che no volea far la guera i vendea i so suditi en canbio de [[s-ciopo|fusili]] e munisioni.

 

Co le etnie de la costa le vegnea en contato co el mondo arabo e eoropeo, le etnie de l’interno le ghe dava vita a la monarchia. En tel XIX secolo, soto la dinastia Merina, i re Andrianampoinimerina (sirca 1745 – 1810) e so fiol Radama (1792 – 1828) i xe stà boni de conquistar quasi tuta l’ixola. La conquista la xe stà fata sopratuto xugando so l’union de i diversi capi locali, co matrimoni tra i principi. Andrianampoinimerina el gha stabilì la cavedal a [[Antananarivo]] e da la el gha riorganizà le legi agricole, sopratuto quele che riguardava la coltivasion del riso. El re el gha ordinà la costrusion de dighe, canali e l’uso de on novo tipo de zapa par coltivar mejo le risare. El gha anca riorganizà el esercito e, se no riusia a conquistar na zona co le bone, Andrianampoinimerina el atacaa co la forsa. A la so morte Andrianampoinimerina el xera pronto a conquistar la costa.

 

[[File:Radama1.gif|thumb|250px|left|El re Radama I]]

El fiol de Andrianampoinimerina, Radama I o Radama el Grande, el gha continuà el laoro de so pare. I inglexi i gha subito reconosù el re. I gha fato così par mandar on segnal a i francexi che el Madagascar el dovea star fora da i interesi coloniali de le potense eoropee, e che lori – i inglexi – i xera diventà i novi paroni de el destin de l’Africa. Radama I el gha firmà de i tratati co i inglexi par far smetar la trata de i sciavi e permetar l’arivo de misionari anglicani en Madagascar. Radama el gha conquistà tuta l’ixola e el xe morto en batalia durante na spedision punitiva contro i betsimisaraka.

 

Co la morte de Radama I, el Madagascar el xe entrà en on periodo de violensa, dominà da el regno de regine, no sempre bone de esar vere guide de el popolo.

 

La vedova de Radama I, ciamà la Crudele, la xe salia al trono parché – a la morte de so marì – la gha fato copar tuti i disententi maschi e altri parenti. Par 33 ani, dal 1828 al 1861, la regina la gha governà usando la violensa e la paura come armi de controlo de la zente. Ranavalona la gha opreso i cristiani e se calcola che 150 000 cristiani ixe stà copà durante el so regno. El Madagascar el se sa anca ixolà da el comercio internasionale e i foresti i gha dovù speso scampar via, o i xe stà espulsi.

 

El fiol de la regina, Radama II, el xera catolego e, co na letara a Napoleone III, el gha invità i francexi a invader l’ixola en tel 1854. El 28 giunio 1854 el gha firmà on contrato co Joseph Francois Lambert do ghe dava a Lambert el dirito de sfrutar quasi tute le materie prime del Madagascar en canbio de on 10% su i profiti. Ranavalona la gha scoperto i intrighi del fiol e espulso tuti i francexi dal Madagascar. La regina la xe morta ent el 1861. El fiol Radama II el gha tentà alora de canbiar la politega del paexe. Le nove dcisoini liberali le andava contro i interesi de la nobiltà. El primo ministro Rainivoninahitriniony e so fradel Rainilaiarivory i gha copà el re, sposà la vedova e le seguenti regine, e governà el paexe da drio le quinte.

 

El dì dopo la morte de Radama II, i prinsipi de la casa Merina i gha incontrà la vedova del re. I gha dito che ela la podea esar regina solo se la azetava de difendar la libartà de religon, de canbiar le legi giudisiarie e smetar la opresion de la cexa. La nova regina la gha subito verto i confini e mandà ambasadori a Londra, Parigi e Washington.

 

Ranavalona II la xe diventà anglicana en tel 1869 e la gha dichiarà la fede anglicana la religion de Stato. Ranavalona II la gha fato brusar tuti i amuleti e statue de fetici. La regina la gha jutà i inglexi a influir s la cultura e le struture malgasie.

Ranavalona III la xe stà na regina sotomesa a i intrighi de palazo e la gha scanselà i diriti del marcante francexe Lambert.

 

[[File:FrenchTroopsMadagasgar.jpg|thumb|Soldadi francexi che sbarca a Mahajanga en tel 1895.]]

I francexi, che no volea perdar i diriti comerciali de Lambert, i gha invaso el Madagascar en tel 1883. A la fin de la guera, el Madagascar el gha dato l’ixola de Antsiranana a la Fransa e la pagà na multa de 560 000 franchi d’oro a i disendenti de Lambert. El primo ministro Rainilaiarivory el xe riusì a metar Fransa e Inghiltera ona contro l’altra, ma ala fin, el so intrigo el se sa reoltà contro de lù. A la [[Conferensa de Berlin]], l’Inghiltera la gha lasà el Madagascar a la Fransa. En tel 1895, i francexi i xe sbarcà a Mahajanga e atacà Antananarivo. El ano dopo, el parlamento francexe el gha anexo el Madagascar e meso fin a la monarchia Merina.

 

[[File:LaGuerreAMadagascar.jpg|thumb|left|Poster de la guera fancexe en Madagascar.]]

I francexi i gha inciso profondamente en te la cultura e società malgase. Soldadi malgasi i gha combatù par i francexi durante la seconda guera mondiale. I inglexi i gha ocupà el Madagascar en tel 1942 par evitar na invasio giaponexe. El Madagascar el xe tornà a la Fransa libara en tel 1943. En tel 1947, i malgasi i sa reoltà e i gha domandà la indipendensa. El governo francexe el gha risposto co la violensa, causando la morte de 90 000 malgasi. L’indipendensa la xe rivà el 26 giunio 1960 e el primo presidente el xe stà Philibert Tsiranana.

 

El presidente Tsiranana el gha continuà la politegha francexe fin al 1972. Soto la presion popolare, Tsiranana el gha dovù lasar el poter al generale Gabriel Ramanantsoa, che el gha spostà el paexe a sinistra. Co la fin de el governo provisorio, en tel 1975, na serie de colpi de Stato la gha portà al potere vari militari. El 15 giunio 1975, el comandante Didier Ratsiraka el gha fato on colpo de Stato e tolto el potere. Ratsiraka el gha governà mal e portà el paexe al declinio economico.

 

En tel 2001, el candidato de l’oposision Marc Ravalomanana el gha vinto le elesioni, ma Ratsiraka nol gha volù lasar el potere. Dopo scontri violenti en tuto el paexe, Ravalomanana el xe diventà presidente graxie al sostegno de le cexe catolega e protestante. Dopo on primo periodo de movimento verso la democrasia, Ravalomanana el gha scominsià a tor decisioni senpre pi totalitarie. En tel otobre 2007, el governo malgasio el gha espulso on gesuita francexe che el gha vu el corajo de criticar el governo.

 

* El nome Madagascar el vien da el libro [[El Miłion|El Milione]] de [[Marco Polo]]. El mercante venexiano el parla de n'ixola ciamada ''Madeigascar''. El nome el xe stà asocià al Madagascar da i cartografi italiani del Rinasimento e el xe diventà el nome uficiale del paexe.

* Durante la guera de conquista del 1895, venti soldadi francexi i xe morti in batalia, e sie mila i xe morti par la malaria e altre malatie tropicali.