Lipidi

I lipidi i xe conposti biochìmeghi assè vari e difarenti, definidi in orìsene come tute le sostanse che le vien tolte fora da na sèlula faséndoghe passare traverso un solvente apolare. Par via de'l prinsìpio de'l sìmile che'l dessiolie el sìmile, donca se trata de sostanse caraterizade da'l'èssare liposolùbili o idrofòbiche, overo i se smissia mejo in fra luri (e co altre sostanse co ste propietà, come i idrocarburi e i èteri) che miga in aqua. A'l mejo i xe sostanse anfipàtiche: un toco de la molècola la xe bona de interajire co quele polari come la molècola de aqua, el resto xe più stàbile se'l sta tacà a altre sostanse idrofòbiche. Mai parò i xe conpletamente boni de intrare in solussion co'l'aqua.

A le prime descrission sistemàtiche, i lipidi i gera stai divisi in do categorie fondamentali. I grassi, de sòlito de orìsene anemale, i xe quii che a condission standard de tenperaura e pression i se conporta come sòlidi; i oji, invesse, i xe più spesso de proveniensa vegetale, e a le condission standard i xe lìquidi. Sta destinsion la xe ancora bona, ma manman se ga ciario la natura lìpidica de sostanse poco bone a èssere definie come grassi o oji, come siere e rase, ma anca lipidi de menbrana e vitamine liposolùbili.

La caraterìstega fondamentale de chìmega orgànica che la definìsse el conportamento idrofòbico de i lipidi la xe la bondansa, in ste molècole, de àtomi de carbonio ligai in fra luri e co altri de idrògeno: no se gènera na bastante difarensa de carga parsiale in fra sti àtomi par réndare la molècola polare, roba che la càpita co che se inserisse l'ossìgeno o altri àtomi in mezo fra carbonio e idrògeno. Sta roba la poe verifegarse a n'estremo de la molècola de un lipide, mentre el resto de la so strutura la resta apolare.

I lipidi, insieme a i àcidi nucleici, le proteine e i carboidrati, le sostanse biochìmeghe fondamentali de la strutura de un organismo vivente. Le so infinide varietà struturali ghe parmete de quèrzare na granda quantità de funsion, in base a le quai i xe classificai.

Classificassion

No'l xe fàssile ingrumare in grupi sostanse assè variegade come i lipidi. In generale, se poe identifegare:

• Lipidi de riserva energètica. I primi a fare parte de sta categoria i xe i àcidi grassi, che i parmete la formassion de la majoransa dei lipidi che i vansa, e i saria definìbili come àcidi carbossìlici co na longa caena de ligami direti in fra carboni, al ponto che un toco de la molècola el deventa lipofìlico: da almanco 4 (àcido propiònico) fin a 36. I ligami in fra carboni i poe èssare sìngoli (C-C), ma anca dopi (C=C). In te'l primo caso se parla de àcidi grassi sàturi, se ghe xe anca solo un ligame dopio se parla de insàturi: sti ùltimi i poe tore na configurassion trans co la caena de carboni che la resta in asse, o cis che'la piega. St'ultima configurassion la xe più frequente in natura, soratuto in piante e pessi: la presensa de àcidi grassi che i se conpata manco par sti piegamenti ghe sbassa la tenperadura de solidificassion, par cui i tessudi i xe più resistenti al fredo. La reassion de esterificassion dei àcidi grassi co un o tuti i tre grupi alcòlici de la molècola de glicerolo la porta a formare i glicèridi (o acilgliceroli), dei quai i triglicèridi (o triacilgliceroli, tuti i àlcoli saturai) i xe i più inportanti. I rapresenta la fonte de energia più inportante par i organismi svilupai parché ste molècole le ga na granda quantità de àtomi de carbonio a nùmaro de ossidassion basso: in te i anemali i vien messi in magazin soratuto in te i cussì diti tessudi adiposi. Infin, in fra sti lipidi gavemo le siere (come quele de le ave), che le se forma par esterificassion de n'àcido grasso e n'alcol anca elo co assè carboni e più che da resserva de energia, e serve par lontanare l'aqua.
• Lipidi de menbrana. I ga na strutura de base assè sìmile a quela dei triglicèridi, ma invesse de un terso àcido grasso, un dei carboni del glicerolo el vien coniugà a conposti idrosolùbili. Se vien a formare cussì i fosfolipidi co che ghe xe un grupo fosfato che po el poe continuare co n'altro conposto orgànico variàbile (ghe ne xe un bel fià de tipi); in alternativa gavemo anca i glicolipidi, co che sto passajo el vien fato miga da un fosfato ma da un sùcaro. Sti conposti i xe fondamentali parché la parte idrosolùbile de la molècola la ga dimension assè più grande de la sola estremità polare del àcido grasso: se poe cussì formare interassion fra estremi idrosolùbili che a so volta le sta più tacade al'aqua respeto a le parte liposolùbili che le se vissina in fra lore. Come risultà gavemo struture a sìngolo strato (balete dite micele) e a dopio strato: tute le menbrane selulari se forma co un dopio strato de, soratuto, fosfolipidi, che i vissina in drento le coe lipofìliche e i buta in fora le teste idrofòbiche.
• Lipidi speciali. I fa parte de sta categoria tuti i altri. I steroli i xe in parte lipidi de menbrana, soratuto el colesterolo, che'l xe el conposto base de sta molècola par quanto revarda i organismi anemali. Da i steroli, par ossidassion, se cava fora i steroidi, che invesse i laora come ormuni. Oncora, i eicosanoidi derivai ossidai del'àcido grasso ciamà àcido arachidònico, i ga funsion segnalatoria, assè più limitada par estension del signale, ma comunque fondamentale par infiamassion e emòstasi, oltra che altri processi fisiològici e patològici. Infin, gavemo le vitamine liposolùbili, dite grupo ADEK, co vari roli vitali de segnalassion endòcrina e/o come coenzimi.

Va recordà che ste categorie no le xe fisse, ma un conposto de na classe el poe quèrzare i ruli propi de n'altra. Oltre a'l'esenpio de'l colesterolo, se poe védare come ghe xe lipidi de menbrana (come fosfatidilinositolo e diglicèridi) co funsion segnalatoria, i stessi àcidi grassi i poe ativare resposte traverso recetori. De fora dal'organismo uman e anemale ghe xe tanti altri lipidi che i poe intrare più o manco ben in ste categorie.