Nairobi

La sità de Nairobi' xe la pi grande sità del Kenya e la cavedal del paexe africano. El nome vien dal maasai (enkare nai robi) e vol dir el posto de l’acqua giasa. Nairobi la xe stà fondada in tel 1899 e la conta 4 milioni de abitanti. El centro sità l’è a 1700 metri sul livel del mare.

Nairobi

Nairobi (sw)
Pozision
1°17′S 36°49′E
Stato	Kenya
Contee del Kenya (it)	Contea di Nairobi (it)
Cavedałe de	Kenya Contea di Nairobi (it) Kenya britannico (it) provincia di Nairobi (it)
Popołasion
Totałe	5 545 000 (2016) 2 304 845 (2010)
Densità	7 966,95 hab./km²
Zeografia
Parte de	Kenya meridionale (it)
Àrea	696 km²
Altitùdene	1 661 m
Còdazi de identifegasion
ISO 3166-2	KE-110
Fuzo oràrio	UTC+3
Prefiso tełefònego	020

Storia

El Tribunale co la statua de Jomo Kenyatta

La zona dove Nairobi la xe stà costruia l’era na palude e no l’era abità da nisuni. I maasai i ghe portava le bestie a bear. En tel 1899, i operai che costruia la ferovia de l’Uganda, ga meso in piè on deposito rente de la palude. La zona la xera fresca, pena dopo la Rift Valley, a metà via tra Mombasa e Kampala, sensa sginsale (e sensa malaria) e ghera l’acqua. Par i primi deceni, Nairobi xe restada on vilagio ligà a la ferovia. Ghera on par the alberghi par i caciatori bianchi – famoso el Stanley Hotel usà anca da Hemingway – e empori par i coloni che abitava fora sità. Al momento de l’indipendensa, Nairobi la contava 200 000 abitanti, e le infrastrutture costruie da i inglexi le xera pi che suficenti par el paexe. Ancò, co la popolasion l’è cresuda, le infrastruture no iè pi suficenti. El centro de la sità se stà trasformando, co la costrusion de gratacieli, la disponibilità de linee digitali e otiche, co nove strade, che parò no le xe suficenti par le necesità de stà grande cavedal africana.

Costrusion importanti

A Nairobi ghe boni ospedali, tra i meio del continente: Kenyatta Hospital, Nairobi Hospital, Mater Hospital, Aga Khan Hospital e Karen Hospital. El centro sità l’è dominà dal Kenyatta International Conference Centre, e la so tore, costruio par ricordar el primo presidente del paexe. L’aeroporto se cata a sud, a 1661 m. Su el livel del mar, so i Kaputiei Plains – la spianata de i maasai kaputiei – e el xe el secondo aeroporto africano par el trafico, dopo quel del Cairo. A nord se cata la zona de Gigiri – che saria Thighiri ne la lengoa kikuyu – dove ghe le Nasion Unite. Quela de Gigiri xe la pi grande sede de l’ONU fora da New York. Le catedrali catolega – Holy Family Basilica – e anglicana – All Saints Church – xe in tel sentro de la sità. La sità ga anca de i parchi ben tegnui. Uhuru Park (Parco de la Libartà) xe rente al distreto governativo, el Nairobi Park l’è l’unico parco nasionale rente a ona sità in Africa.

Clima

Nairobi la xe pena soto l’equatore. El clima l’è moderato. La temperatura masima xe a la fin de genaro (30°), e la pi basa in agosto (7°). De norma, la temperatura no la supera i 25 gradi de dì, e no la va soto i 10 de note. La piova se cata in marso-magio e novembre-dicembre, ma ghe pol esar precipitasion anca ne i altri mezi. A agosto ghe el manyunyu, na specie de sguazza forte.

Economia

Kenyatta Avenue

A Nairobi se cata industrie de tuti i tipi. Importanti xe le industrie alimentari, de le materie plastiche e metalurgiche. La Borsa xe la seconda, dopo quela de Johannesburg. Tante compagnie multinasionali ga le loro sedi centrali a Nairobi. La sità la xe anca el centro de smistamento de i turisti par el Kenya, ma anca de i paexi confinanti.

Problemi sociali

Gnanca la metà de i abitati de Nairobi vive ne i quartieri residensiali. Pi de do milioni de persone vive inte le baracopoli, che osupa manco del 5% del teritorio. Ghe xe pi de do sento baracopoli a Nairobi e le so vicinanse. La pi grande baracopoli de Nairobi, e de l’Africa, xe Kibera: 800 000 abitanti in manco de 2 km². Altre grandi baracopoli xe: Korogocho, Mathare, Kawangware. Le sità satelite de Thika, Limuru, Ngong, Ongata Rongai ghe zonta n’altro milion e mezo de abitanti a l’area metropolitana. El 30% de la popolasion adulta xe infeta de HIV, el virus che porta l’AIDS.

Mass Media

Nairobi xe la cavedal africana de i mass media. L’Asociasion de i Giornalisti Foresti (Foreign Correspondent Association of East Africa) la ga pi de domila aderenti. El Daily Nation xe el giornal co la pi grande circolasion in Africa Orientale. El Daily Nation xe ona de le publicasion del Nation Group, la pi granda casa de produsion de mèdia de l’Africa. Se publica giornali in inglexe e swahili, riviste in inglexe, swahili e ne le majori lengoe del paexe. A Nairobi se conta sete televisioni. Le agensie internasionali come Reuters e Associated Press ga i so centri de produsion ne la cavedal keniana. La BBC, CNN, e la RAI ga i loro ofici par l’Africa a Nairobi. El New People Media Centre de i comboniani, misionari de Verona, xe la pi grande casa de produsion multi-mediale catolega de l’Africa.

Portałi:
• Portałe de Africa
|

Altri progetti

• Wikimedia Commons

• Wikimedia Commons el detien imàjini o altri file so Nairobi