Storia de la Somalia

Anca se no ghe mai stà ricatamenti paleontologici de interese, sicuramente l’omo de età preistorica el ga visù inte la rejon che ora ciamemo Somalia. I stesi abitanti de la Somalia i xe de origine axiatica, a dimostrasion de na longa storia de pasajo de popoli da la penisola arabica a le zone del Corno d’Africa. Le coste de la Somalia le xe sempre stà feequentade da popoli mediteranei. I egisiani i ga mandà de le spedisioni, i greci e i romani i vegnea fin qi, e fin a le coste del Kenya atuale, par comprar mira e incenso. Ma no ghe notisie pi precise so i popoli e la loro storia.

Medioevo canbia

I primi documenti so la Somalia i vien dal mondo arabo. El viagiator ibn Battuta (1331) el ga visità la Somalia durante el so girovargar par l’Africa. Anca la spedision del general cinexe Zheng He (1417-19) la xe rivà so le coste de la Somalia. Battuta el riferise che Mogadiscio el gavea on gran marcà e che le lane tesute da i somali le vegnea vendude longo tuta la costa fin a l'Egito.

Islam canbia

L’Islam el se sa propagà in Somalia fin da i primi secoli dopo Maometo. I musulmani de la Somalia i ga sempre rispetà el regno cristiano de l’Etiopia parché i etiopici i gavea salvà i primi muslmani scampà la par scapar a la persecusion, e Maometo gavea meso na fatwa contro ghi agrediva el regno Etiopico. Tra el 1300 e el 1400, el regno etiopico e el sultanato de Harrar i ga combatuo in tel nord de la Somalia. En tel 1415, l’imperatore Yeshaq I el ga caturà el re Sa’ad ad Din e lo ga fato copar. El ga fato anca scrivar on poema par ricordar i gesti epici de la so vitoria. I etioipici i ga controlà la zona par pi de on secolo.

En tel 1527, el cao carismàtego de na seta islamica, Ahmed Gurey, el ga fato n’aleansa co i otomani turchi e invaso l’Etiopia. I soldai de Gurey i faxea tera brusada do i arivava e i ga bruxà la majoria de i manoscriti etioipici che i ga catà. L’invasion la xe stà fermà da l’arivo de i portoghexi soto la guida de Cristoval da Gama, fiol del pi famoxo Vasco. El 21 fevraro 1543, i etiopici e portoghexi i ga vinto la bataja de Wayna Daga, Ahmed Gurey el xe stà copà, e la guera co i musulmani vinta da l’Etiopia. El regno somalo (regno de Adal) el se sa disintegrà in tanti Stati picoleti ligà a i porti longo la costa. Tanti de sti porti i xe finii soto el control de fameje yemenite.

 
Marcà de Mogadisio, 1882.

En tel XIV secolo, in tel sud de la Somalia, la dinastia Ajuuran la ga creà n’altro regno inte la val de Uebi Scebeli. El regno de i Ajuraan el xera pi potente de le sità stato de Mogadisio, Merka e Baarawe. El sboco al mar el xe garantì dal porto de Hobyo. Co i re i ga perso el control de Hobyo dopo la rivolta de i seichi locali, el regno el ga perso importansa par somparir a la fin del XVII secolo. I omaniti i xe riusidi a parar via i portoghexi da Benaadir e tor el control de la costa. Soltanto in tel XVIII secolo n’altro regno somalo el xe nato in tel sud. El sultanato de Geledi el controlava la zona de Uebi Scebeli. I omani i ga lasà far. En tel nord, el sultanato de Warsangeli el xe diventà el pi grande regno mai esitì in Somalia. El controlava n’area del nord e parte del sentro da la Somalia moderna.

Colonialismo canbia

 
Somalia, XIX secolo

I inglexi i ga sempre avù on groso interese su la costa de la Somalia. I pagava el sultan de Warsangeli parché jutase i marinai inglexi che faxea scalo so le coste. I ga mandà do esploratori, Richard Burton and John Speke a esplorar l’interno in vista de n’invasion. L’esplorasion no la xe mia riusia come i volea, ma Speke el xe stà bon de registrar tanti fati de la vita de la zente del posto. Altri esploratori mandà dal goerno o da società geografiche i xe stà boni de visitar l’interno, ma nisuno el xe stà bon de dar notisie certe e complete su la Somalia.

Francia, Regno Unio e Italia i gavea de le rivendicasion su el Corno d’Africa. I inglexi i volea sora-de-tuto el control del streto de mar rente a Aden. I francexi i volea fermar la supremasia inglexe so la rejone. I italiani i volea verghe de le colonie, ma tuti i posti pi importanti i xera za stà ciapà da i altri.

I britanici i ga stabilìo el protetorato in tel nord in tel 1886. L’Italia la ga ocupà parte de la costa a sud in tel 1892, e la Francià la sa tolto el teritorio rente a la sità de Gibuti. Fin al 1925, l’Italia la controlava solo na parte del teritorio e la gavea de i tratati de protesion co i sultanati. Co l’arivo de i fasisti de Benito Mussolini, l’Italia la ga scominsià na serie de guere par conquistar e controlar tuto el teritorio somalo. La colonia la xe resistia fin al 1942. La Somalia la xe alora pasà al controlo britanico e la xe ritornà al mandato italiano fin al 1960, co l’indipendensa del paexe.

Guera e ditatura canbia

Subito dopo l’indipendensa, la Somalia la ga combatù contro l’Etiopia par el teritorio de l’Ogaden. Questo el xe on teritorio arido e abità da popoli de etnia somala, ma da secoli parte de l’Etiopia. Le do guere le xe finie co la vitoria etiopica. En tel 1969 el generale Sida Barre el ga fato on colpo de stato e el xe salì al poter. Ne i promi ani ’80, vari grupi de guerilieri i ga provà a butar zo Barre. La guerilia la continua fin a ancò. Barre el ga scapà el tel 1991 e la guerilia la xe andà cresendo de forsa, fin a metar tuto el paexe in stato d’asedio.

En tel 1994, l’ONU la ga provà a controlar la situasion co l’operasion Restore Hope, anca l’Italia la ga mandà le so trupe. La mision de l’ONU la xe falia. En tel 2004 el proceso de paxe el sembrava ndar ben. I paexi de l’IGAD, l’organizasion inter governativa de i paexi del Corno d’Africa che la gavea anca laorà par la paxe in tel Sudan, i ga provà a mediar la situasion somale co vari incontri a Eldoret e a Mbagathi, in Kenya. Tuti i clan i ga firmà i acordi de paxe e eleto Abdullah Yusuf presidente ad interim e Mohamed Gedi come primo ministro. De fato, el novo governo no el xe mai stà bon de entrar ne la cavedal e nianca a far sentir la so autorità so tuto el teritorio (la Somalia del Nord la se sa costituià stato indipendnete in tel 1994, e Puntland – in tela region sentrale – la xe sempre restada fora da i problemi del sud).

L’ultima crisi la xe sciopà in tel 2006 co l’arivo de le Corti Islamiche, grupi de integralisti islamici, che i ga fato scapar i signori de la guera da Mogadiscio. L’Etiopia la xe entrà ne la cavedal par par via i fondamentalisti, che i xe scapà in Eritrea. L’Union Africana la ga mandà (fin 2006) le trupe de l’Uganda, che no le xe mia stà bone de ristabilir l’ordine ne la cavedal. Ancò, la cavedal la xe in continuo subulio e el governo provisorio nol ga mia control del teritorio.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_de_la_Somalia&oldid=1035361"