Strada de łe Gałarie

Ła Strada de łe Gałerie ła xe na mułatiera scavà 'nteła piera, longa sie kiłometri e mexo, co 52 gałerie, durante ła prima guera mondiałe. I Tałjàn ghe ga laorà, par farla in sie mesi, dal febraro ał'agosto del 1917 (ma la xe sta finia solo in novembre), co 600 operai e ła trentatreesima Conpania Minadori del 5° Genio della prima Armada , soto el comando del tenente Giuseppe Zappa prima e il capitan Corrado Picone (nomen omen) dopo. Xe sta necesario farla parkè i Austriaci i gaveva ocupà Monte Majo e de łì i sparava coł'artijeria suła Strada dei Scarubi. Ła mułatiera ła scuminsia a Bocheta Canpìłia, suła Strada dei Scarubi, a 1210 m, dove ke xe sta fata 'n'entrata monumentałe a inpiria, suła sinistra de ła caresada. El troso el taca subito co na pontara a tornanti a montar su pał versante de ła Val Leogra, finke no'l riva a ła prima gałeria, andove ke ghe xe na łapide a ricordo dei operai e dei soldà ke ga fato sta strada.

Dopo, el troso el continua drento e fora par na gałeria drio ł'altra, co finestroni ke varda na volta in Val Poxina e na volta in Val Leogra, senpre montando de quota. Ła gałeria pi longa de tute ła xe dicianovesima, ke ła misura trexentoventi metri, co diversi finestroni verti suła Val Leogra.

Ła ventesima gałeria ła xe scavà a spirałe drento na guja de piera. Da ła ventunesima a ła ventinovesima gałeria xe tuto un alternarse de gałerie e de trati de troso streti come viaz, tajà su profondi buroni. Pi vanti se traversa ła Val Camosara; intrà ła 32. e ła 34. gałeria se cata ła parte finałe dei trosi ke vien su dal Vajo del Pino, dal Vajo del Moto e dal Vajo de Mexo. Fra ła 38. e ła 45. gałeria se riva al Paso de Fontana d'Oro, andove ke sboca el Troso dei Ronle, del Vajo del Ponte e el troso de ła Val Fontana d'Oro. Dopo ła 45. gałeria, ła strada core alta suła Val Canałe finke no ła riva al punto pi alto, a domiła metri pi o manco, co na beła vista sul Sojo Roxo, ła Guja del Frate e ła Pria Faveła. Pi vanti, pasando rente i resti de opere miłitari, ła se sbasa pian pianeło e ła salta fora, dopo ła 52. gałeria, proprio de fianco al Rifugio Papa.

Consiłi par l'escursion canbia

Ła montà ła dura 3 ore e mexa. Xe indispensàbiłe portarse via na piła par vedarghe drento łe gałerie ^[1]. Ocio in primavera coł'ultima neve, ke ła strense el viaz e xe fasiłe sbrisiarghe sora. Mejo far de manco col bruto tenpo parkè ła piova fa cascar xo sasi e marugołoti sul troso. El tenpo mejo par far ła strada xe inìsio o fin stajon parkè d'istà piena xe masa caldo. No se pol in nisuna maniera doparar ła mountain bike.

Łe Gałerie canbia

Número	Nome	Łonga
1	Cap. Giuseppe Zappa	17 metri
2	Gen. D'Havet	65 metri
3	Rovereto	14 metri
4	Cesare Battisti	31 metri
5	Guglielmo Oberdan	10 metri
6	Trieste	17 metri
7	Gen. Antonino Cascino	35 metri
8	Gen. Antonio Cantore	23 metri
9	Gen. Gaetano Zoppi	78 metri
10	Nazario Sauro	12 metri
11	Magg. Giovanni Randaccio	28 metri
12	Cap. Motti	95 metri
13	Cap. Fabio Filzi	27 metri
14	Cap. Melchiori	61 metri
15	Tortona	45 metri
16	Reggio Calabria	74 metri
17	Bergamo	52 metri
18	Parma	46 metri
19	Re	318 metri
20	Gen. Luigi Cadorna	86 metri
21	Gen. Carlo Porro	20 metri
22	Breganze	8 metri
23	Gen. Luigi Capello	18 metri

Número	Nome	Łonga
24	Bologna	16 metri
25	L'Aquila	11 metri
26	Napoli	24 metri
27	Cap. Corrado Picone	98 metri
28	Genova	14 metri
29	La Spezia	31 metri
30	Miss	10 metri
31	Gen. Achille Papa	72 metri
32	Palazzolo dello Stella	48 metri
33	33ª minatori	57 metri
34	Gen. Giustetti	132 metri
35	Trani	10 metri
36	Gen. Peppino Garibaldi	12 metri
37	Giovanni Battista Perasso Balilla	26 metri
38	Torino	29 metri
39	Mantova	53 metri
40	Trento	10 metri
41	26ª minatori	24 metri
42	Macerata	19 metri
43	Polesine	55 metri
44	Zappatori Liguria	22 metri
45	Plotone 25ª minatori	83 metri
46	Piceno	65 metri
47	Pallanza	22 metri
48	Cesena	14 metri
49	Soldato italiano	19 metri
50	Cavalieri di Vittorio Veneto	27 metri
51	Plotone minatori sardo	66 metri
52	Sardegna	86 metri