Thousand Sunny

Voxe prinsipałi: One Piece, Glosaro de One Piece.

Ła Thousand Sunny (サウザンドサニー号 Sauzando Sanī-gō) ła ze na nave imajinaria che ła conpare sol manga One Piece, scrito e dizenjà dal mistro japoneze Eiichirō Oda. Inte el contesto naradivo de l'òpara ła ze ła segonda e atuałe nave de ła Ciurma del Capel de Paja, e ła vien anca ciamà senplisemente Sunny. Ła ze stà projetada e costruìa da Franky col juto de i mejo mistri d'asa de Water Seven: el carpentier, daspò de vérgheła donà a i Mugiwara, el se ga convinto łu steso a nar rento inte ła ciurma. A confronto de tante altre navi de i pirati ła Sunny no ła ze mìa ła pì granda, soratuto respeto a łe navi de i Cuatro Inperadori, via de tut ła ze de łe dimension juste pa' na ciurma de 9 parsone e col tenpo ła se ga demostrà una de łe navi pì vełosi e zgagie che se pol catar pa' i mari. Ła ze stà costruìa da Franky doparando el presiozo e costozo łenjo del Àlbaro Tezoro de Adamo che el ze renomà par èsar rezistente asè. I schei che i ze stà pagài par 'sto łenjo (200.000.000 de Berry) i jera coełi de ła ciurma che inisialmente Franky łi gheva robài a Uzop. Co 'sto tipo de łenjame presiozo jera costruìa anca ła Oro Jackson, a dir ła nave de ła ciurma de Gold D. Roger, el Re de i Pirati .

Descrision

Da'l ponto de vista tècnego 'sta nave ła ze un brigantin grando almanco el dopio de coeło che jera ła Going Merry. Ła ga du àlbari bełi alti (un de maistra e un de mezana) che i porta de łe vełe cuadrade e a pupa A ghe ze anca na veła de mezana; ła łinea del scafo ła ze asè retondada e ła recorda un mezo sguso de noza. Na caratarìstega tìpega del aspeto de ła Sunny ła ze ła połegia che ła ga na fegura granda de łion co ła criniera somejante a i petałi de un fior o anca a i raji del sołe: fazendo jirar 'sta criniera cofà un zventołon A se pol far móvar indrìo ła nave. Ła boca del łion ła sconde un canon asé potente, ciamà el canon Gàon, che el se mostra cuande che vien spałancà ła boca. Da rente de ła połegia, una par banda, A se cata łe du àncore che łe ze fate a forma de sata de łion. El projeto de ła Sunny el ga tenjesto conto de łe ezijense de tuti i menbri de ła ciurma de i Mugiwara e donca ła ze ben struturada co spasi e łocałi indóe che onjun el pol pasar el tenpo durando ła navigasion. In partigołare A se cata:

Łocałi inte el càsaro de pupa

a łeveło del ponte de coverta A se cata un sałon grando ciamà acquarium bar: el ze na sorta de zona lounge co un divano łongo e dadrìo un acuaro indóe che ghe noa rento i pesi pescài da ła ciurma, senpre prunti par èsar cuzinài da Sanji;
al łeveło suparior A ghe ze ła sała da pranso granda co ła cuzina altretanto granda e ben fornìa; 'sta zona chive ła ze el "renjo" de Sanji che cusì el pol dar sfogo a tuta ła só braura de cogo de ła ciurma. A ghe ze un forno zigante e un frigorìfaro col łucheto a conbinasion. I nùmari par vèrzarlo i ze "7326" e 'sta secuensa ła ze conosùa solche da Sanji, Nami e Nico Robin: A sarìa asè parigołozo se Luffy el fuse bon de vèrzar el frigo parché no'l se controła mìa cuande che el ga fame. De fianco de 'sta zona A ghe ze na stansa co ła funsion de infermerìa e łaboratorio, reservada a Chopper che el ze el mèdego de bordo;
el cuerto del càsaro el ze praticàbiłe e 'l ga na zona co łe piante de mandarin de Nami, na fioriera de Nico Robin e un ortezel indóe che Uzop el cultiva łe só semense spesiałi ciamàe Pop Green;
in pozision a zbalso sora ła pała del timon a ghe ze na sorta de cofa "de pupa" fata e mezasfera indóe che se cata: al łeveło pì baso ła bibłioteca granda de ła ciurma (in partigołare co i testi de Nico Robin e co ła toła da dizenjo pa' łe mape de Nami), al łeveło suparior A ghe ze el łocałe co ła vasca da banjo granda (ałimentada co acua calda) che ła vien doparada scuazi solche da łe tuze.

Łocałi inte el casteło de prora

a łeveło del ponte de coverta A ghe ze i łocałi reservài a i masci de ła ciurma, a dir un stanson grando co i łeti in sospension (picài co łe corde al sofito), na toła granda e basa in stiłe japoneze e un sofà;
al łeveło suparior A se cata i łocałi pa' łe fémane che i ze mejo aredài, co tanto de sałotin co łe poltrone;
el ponte suparior el ga ła postasion del timon de ła nave co i comandi par el dispozitivo ciamà Soldier Dock System.

Ponte de coverta

el ponte de coverta el ze curiozamente revestìo de erba cusì da somejar a un jardin, de fati A se cata anca un sìvoło che el vien zo dal casteło de prora e na altałena montada so un albareto;

Łocałi sote el ponte de coverta

in zona prodiera A ghe ze na stiva che ła contien el magazen pa' armi e recanbi, in partigołare A ze imagazenà na serta cuantità de łenjo del Àlbaro Tezoro de Adamo che el pol servir pa' łe reparasion;
in zona sentrałe A ghe ze el vano grando rotante che el serve par el Soldier Dock System;
in zona de pupa A ghe du stanse specułari: una ła ze ła cusidita Uzop Factory, a dir l'ofisina parsonałe de Uzop, chełaltra ła ze ła stansa de Franky pa' ła reserca e'l zviłupo de łe armi; in ùltema A se cata ła "Stansa de l'Enerzìa" indóe che ghe ze i bariłoti de Cola che i ałimenta i dispozitivi vari de ła Sunny. Donca ła nave ła dòpara ła Cola cofà carburante al isteso modo de Franky che ła dòpara par ałimentar el propio corpo robótego.

Cofa del àlbaro de maistra

so ła ponta del àlbaro A se cata na cofa coverta a forma de mezacùpoła indóe che ghe ze un tełescopio e na pałestra (co tanto de pezi) che de sołito ła vien doparada da Zoro.

Soldier Dock System

El Soldier Dock System (ソルジャードックシステム Sorujā Dokku Shisutemu) el ze un sistema che el ze stà inventà da Franky e 'l consiste inte un vano grando sircołare, posto in zona sentrałe soto el ponte de coverta, che el ze dividesto in sie gaoni (ciamài dock inte el manga orizenałe e anca canali inte ła varsion itałiana) e onji gaon el contien un partigołare dispozitivo. El vano sircołare el ga ła capasità de rodar e in 'sto modo onji gaon el pol mòvarse fin che el se ałinea co i du fori tondi: un inte ła murada de sanca e un in coeła de drita. I fori tondi i ga un mecanizmo de avertura a sarasinesca e donca i dispozitivi rento i gaoni i pol nar fora in mar a cupie de du a ła volta. I comandi par desidar coało gaon el ga da vèrzarse i ze posti sol timon a prora de ła nave. Tuto 'sto sistema el ze ałimentà co ła Cola de ła "Stansa de l'Enerzìa". Daspò del salto de du ani Franky el ghe ga zontà de i dispozitivi canbiando ła configurasion che, par el momento, ła ze 'sta chive:

gaon n°1: el contien el Shiro Mokuba de Nami (ciamà anca waver), na sorta de moto da acua col propulsor a idrojeto;
gaon n°2: el contien ła Mini-Merry, a dir un barchin a vapor che el serve cofà mezo vełose da zbarco; el se ciama cusì parché Franky el ga doparà ła połegia co ła forma de testa de piègora che ła jera instałada inte ła Going Merry;
gaon n°3: el contien el Shark Submerge III, a dir un sotomarin ceo fato a forma de scuało, che el pol contenjar fin a tri parsone e che el pol nar sote acua fin a 5.000 metri de profondità;
gaon n°4: el contien el Black Rhino FR-U IV, a dir na motosicreta somejante a un rinoseronte;
gaon n°5: el contien el Brachio Tank V, a dir un caro armà somejante a un brachiozàuro;
gaon n°6: el contenjudo el ze ancura sconosùo.

El Black Rhino FR-U IV e 'l Brachio Tank V i ze stài introdoti daspò del salto de du ani e, durando ła bataja finałe inte l'Ìzoła de i Òmeni Pese, Franky el ga mostrà che i pol conbinarse insenbre pa' formar un roboton grando piłotà purpio da łu, el "Zenarałe Franky" (フランキー将軍 Furankī Shogun).

Altri dispozitivi e armi

el Coup de Burst: el consiste inte un colpo de propulsion sparà dal tubo grando de scapamento che el ze a pupa, el ze talmente viołento che el pol łansiar ła Sunny a pì de un chiłòmetro de distansa. Onji 'olta che el vien doparà el consuma tri bariłoti de Cola;
el canon Gàon: el funsiona col jeto viołento che el vien sparà da la boca del łion a prora, el ze potente asè ma onji 'olta che se ło dòpara el consuma sincue bariłoti de Cola: tri par el culpo e du pa stabiłizar el rencuło; normalmente el vien manovrà da Uzop che el ze tirador e artełier;
ła Chicken Voyage, a dir ła manovra de doparar ła criniera del łion cofà un zventołon pa' far nar a marcia indrìo ła nave.

Oltra de tut A ghe ze instałà un totałe de sie canoni normałi: cuatro a prora e du so łe murade de pupa.