Totila xe el nom co el cual l'è stà tramandà el nom Baduila, re dei Ostrogoti dal 541 al 552, dopo la morte del suo zio Ildibaldo e l'asasinio de suo cuzin Erarico. Morì inte ła bataja de Tagina inte el 552.

Dopo le pesanti sconfite subìe contro el general Belisario e dopo la catura de Vitige inte el 540, i Ostrogoti i xe riusìi faticosamente a tegnar en vita uno Stato a nord del fiume Po. Totila l'era el comandante de le trupe gote sul Tarvisio, e el fu nominà re inte ła metà del 541.

El suo obiettivo el fu subito quelo de sventar la politega de l'imperador Zustinian I, che el mirava a la presa de poseso de l'Italia. Totila el gà bùo a l'inizio piassé suzeso, profitando del fato che le trupe del Zustinian le fusse impegnà dal 540 in na guera contro i Sasanidi inte el Impero Roman d'Oriente. Elo el gà conseguìo notevoli suzesi sul canpo de bataja asediando e sachezando Alatri inte el 543, reclutando contadini e servi par raforzar l'eserzito, e el xe riusìo a conquistar la zità de Roma par ben do volte, ala fin del 546 ed al'inizio del 550. Roma la xe stà depredada e le sue mure smantelade, mentre i so abitanti i xe stà caziadi o copadi. Inte ła primavera del 547 Belisario al xe riusìo a libararla. Inte el autuno del 549 Totila al gà posto soto asedio Roma par la tersa volta, e l'è riusìo a reconquistarla grasie ad un novo trademento dei guardiani che i gà verto le porte al so eserzito. La zità la gà contà pochi sopravisudi e el Senato el se gà trasferìo a Bisanzio.

La seconda guera gotica la fu piassè sanguinosa de la prima nei ani tra el 535 ed el 540. Dopo la seconda conquesta de Roma, Totila el ga tacà na campagna de propaganda, inte ła quale el gà meso a confronto el stil de vita dei Ostrogoti ai tenpi de Teodorico el Grando, co i ani de la soferenza, dela guera e dela politega fiscal de Zustinian I. El gà bùo manco suzeso coa politega estera, in quanto no el xe riusìo a strenzar aleansa coi Franchi.

Inte el 551, Zustinian I el ghe gà afidà el comando de l'eserzito a un vecio eunuco de corte, Narsete, e el lo gà mandà a ocupar l'Italia: le so trupe le xe entrade in Italia da nord atraverso i Balcani, evitando le linee defensive gotiche. Totila alora el gà abandonà Roma, portando co elo 300 zovani ostagi sielti tra le fameje piassè importanti de la zità. El 30 de giunio del 552, l'eserzito gotico el xe cascà en Unbria soto le freze dei tirador d'arco de l'eserzito de Narsete, en na bataja intrà Gubio e Gualdo Tadino. Totila el xe scapà verso le odierne Marche dove el xe morto par le ferìe riportade en bataja; i Ostrogoti i se gà riunìo soto l'ultimo re Teia: questo el gà fato copar i 300 zovani ciapadi en ostagio da Totila, e la stesa fin la gà fato tuti i prizonieri e le fameje senadòrie. Tutavia, a causa de la perdita dela magior parte de la cavalaria, el sogno dei Ostrogoti de un'afermasion en Italia el gà bùo fine, mentre Totila el gà continuà a vivar da fegura eroica.

La tomba de Totila l'è stà rinvenua inte el diciotesemo secolo a Matelica, rente el pian dei cavalieri, ciamado en origine pian de le tonbe. L'identificasion la xe avegnuda grasie la descrizion de la bataja fornìa dal cronista Procopio. Inte ła cripta, de chiara orìzene gotica, i gà catà un cadavere tumulà secondo le usanze dei nobili goti, co un anelo d'oro al dièl, quatro corpi de soldai de guardia e na spada.

Controło de autoritàVIAF (EN100455887 · ISNI (EN0000 0000 7820 1866 · LCCN (ENn2003077178 · GND (DE139154205 · BAV ADV10307084 · CERL cnp01197488 · WorldCat Identities (ENn2003-077178
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Totila&oldid=1042687"