Vincenza Pasini

Vincenza Pasini (Suiso, 1356 – Vicensa, 1431) ła ze stà na agricoltora e vejente itałiana, dopo łe aparision de ła Madona che drio sti fati ze stà edifegà el Santuario de ła Madona de Monte Bèrego in provincia de Vicensa, posto tanto conosesto. Par sta motivasion ła ze na figura tanto inportante par ła istòria popołare del comun de Suiso e par ła sità de Vicensa.

Vincenza Pasini

Ceza de San Zorzo in Gogna a Vicensa, Ła Madona aparia a Vincensa Pasini e proteje i visentini da ła peste, Pała de Giambattista Maganza el Zovane
Biografia
Nasimènto	1356 (Gregorian) Suiso (Itàlia)
Morte	1431 (Gregorian) (74/75 ani) Vicensa (Itàlia)
Atività
Ocupasion	contadin

Biografia

Ła caza de Vincenza Pasini a Suiso

Dona Vincenza ła ze nasesta a Suiso inte'l 1356. Dopo che ła se ga maridà, ła se ga trasferia prima a Montedemezo, frasion del comun de Suiso, e dopo a Vicensa, par nar drio a so marìo che el łaorva come marangon.

Inte'l 1426, e inte'l 1428, ła ga gavesto do aparision de ła Madona, intei chi ani ła sità de Vicensa ła zera diłagà da ła peste (1404 – 1428).

Dona Vincensa ła more intel 1431 e ła ze stà sepełia intel simitero visin Santa Catina, intel 1810 ła ze sta stasportà inte ła cripta de ł'altar de Monte Bèrego.

Łe aparision

Ła tradision ła vole che par dona Vincenza sipia sta edifegà el Santuario de ła Madona de Monte Bèrego in onor de Maria dopo che ła ze aparesta do volte.

Ła prima aparision vegnesta el 7 de marso 1426, fin che ła dona ła zera drio nare da so marìo che el łaorava intel vegnałe a Monte Bèrego. Inte sta ocaziòn ła Madona ła ga dito de edifegar na ceza in so onor in sima al monte. Se cuesto el fose fato ła sità ła vegnaria łiberà da ła peste. I sitadini no i ga mia credesto a Vincenza e ła peste ła ga continuà a copar jente.

Ła segonda aparision ła ze vegnesta dopo do ani, el 1° de agosto del 1428. Sta volta i sitadini i ga credesto a ła dona, e in puchi dì i ga tacà a edifigar el Santuario. Come ga promeso ła Madona, ła peste ła ze całà, fin che ła ze sparia inte'l 1430, cuando i ga finio i łaori.

Bibliografia

• (IT) R. Pilastro, Vincenza Pasini. Una storia che si fa leggenda, Publligrafica Editrice, Altavilla Vicentina (Vicenza), 2005.
• (IT) Padre A. Michelin, Le Pievi e i Bissári (1311-1404), Fascicolo 6°, 27 aprile 1991, pp. 63–68, in "Conoscere Sovizzo", Periodico Quadrimestrale dal 1989 al 1994.
• (IT) Luoghi dello spirito, Touring Club, 2004 (Veneto) p. 62.

Voze corełade

• Santuario de ła Madona de Monte Bèrego