Aparato sircolatorio
L'aparato sircolatorio o cardiovascolare xe l'insieme dei òrgani che i ga la funsion de varentare la circolasion del sangue par la perfusion de tuti i distreti corpòrei, cussì da parmétare el so metabolismo. Sti òrgani del quale xe struturà i xe, prinsipalmente:
Ghe xe vossudi un bel fià de sèculi par rivare al modelo de ancó de la circolasion sanguigna, el resultà xe tribuio a William Harvey co la so publicasion De motu cordis in tel 1628. El core el funsiona come na ponpa mecànega che la buta vanti un flusso continuo de sangue inte i vasi, che i xe come tubi. Sti qua i parte dal sistema alterioso che el ramìfega manman fin ai capilari, queli de diàmetro menor e parede streta bona par i scanbi de sostanse coi tessudi; a la fin i converze a formare el sistema venoso che el porta indrio el sangue al core. La circolasion che la gira da e in diresion del core la resulta organizada in do seturi che i funsiona come sircùiti desposti in serie:
- la granda circolassion o circolasion sistèmica in partensa dal ventrìcolo de sanca e in ritorno al'atrio de drita, la porta el sangue alterioso (rico de ossìgeno e pòaro de anidride carbònica) ai tessudi periferissi traverso le ramifegasion de la più granda e spessa alteria del corpo che la xe l'aorta; el ritorno del sangue venoso passa traverso le do tributarie cardìache ciamade vena cava superiore e inferiore.
- la pìcola circolassion o circolasion polmonare in partensa dal ventrìcolo de drita e in ritorno al'atrio de sanca, la porta el sangue venoso (pòaro de ossìgeno e rico de anidride carbònica), traverso le rame del'alteria polmonare, ai alvèoli polmonari, dove che el sangue poe far scanbio de gas col'aria che cata; da qui torna, traverso le vene polmonari, come sangue alterioso de novo al core par tornare in circolasion sistèmica.
La regolasion de la circolasion sanguigna la xe basada sul prinsipio de sigurare na perfusion bona par tuti i distreti corporei a seconda de le so esigense, parò favorendo teritori privilezai par inportansa come el core stesso e'l servelo parché i no vaga in ischemia. Sta regolasion la ga da far fronte ai adatamenti fisiològissi ai quali se va incontro coi canbiamenti de atività e esigense metabòliche dei sìnguli distreti, variando spessìfissì paràmetri.
- La presion sanguigna xe fondamentale parché el so gradiente longo tuto el torente sircolatorio xe quelo che el move el sangue: sarà più alta a livelo dei cai alteriosi de la circolasion e più bassa ai cai venosi, se no'l fusse cussì el sangue tornaria indrio par st'altro verso. Se vien a creare un distreto del'intiero aparato dito sistema a alta pression (le alterie de la circolasion sistèmica), che el ga la funsion de propulsion, dove sto paràmetro el ga provisorie variasion in funsion de la fase del ciclo cardìaco, alternàndose intrà i normali 120 e 80 mmHg de la presion sistòlica (la màssima) e diastòlica (la mìnima). La volemia xe determinante, insieme al'atività de contrasion del core, la presion che se cata inte i distreti del'aparato. Gran parte del volume emàtico se cata in tel sistema a bassa pression (tuto el resto, capilari e vene sistèmissi e l'intiero sìrcolo polmonare) che el ga funsion de magazin de sangue da butare in giro in caso de bisogno. La presion venosa sentrale la xe assè più bassa de quela alteriosa sistèmica (no la gavaria da ndare sora dei 8 mmHg), in tel sìrcolo polmonare la presion alteriosa la xe de 25/10 mmHg.
- La gitada cardìaca xe el flusso (volume/tenpo) butà fora dai ventrìcoli, deverso a seconda de la persona e de l'atività che la xe drio fare, ma gualiva a livelo dei do versanti sistèmico e polmonare. I do ventrìcoli i buta fora la stessa quantità de sangue al menudo, anca se i elo fa a presion deverse. La gitada cardìaca la xe el prodoto de frequensa cardìaca par gitada sistòlica, paràmetro che el depende da ritorno venoso al ventrìcolo e forsa de contrassion.
- Le resistense ai flussi le xe vero più alte inte la circolasion sistèmica respeto a quela polmonare, par rezon de anatomia, e sta roba la spiega parché i flussi i xe gualivi mentre le presion le xe deverse.
Par mantegnere n'aporto de sangue bastante e adatà a le necessità del momento, i tessudi i risseve na quantità de sangue regolada da tanti mecanismi. Intrà sti qua ghe xe adatamenti logali de autoregolasion (a livelo de core, servelo e rene soratuto, ma anca a livelo dei mùscoli) e mecanismi generali mediai dal sistema nervoso vegetativo (al breve perìodo) e dal sistema endòcrino (al longo perìodo).
Varda anca
canbia
Wikimedia Commons el detien imàjini o altri file so aparato sircolatorio
el detien schemi gràfeghi so
| Controło de autorità | LCCN (EN) sh99004797 · BNF (FR) cb11934858z (data) · BNE (ES) XX525158 (data) · NDL (EN, JA) 00575112 |
|---|