Automòbiłe

L'automòbile, ciamà comunemente màchina, la xe un veicolo a motor con quatro rude, doparà par el trasporto de le persone. La funsiona mediante un motor a combustion, che brusando benzina o diesel el fa 'ndar su e zo dei pistoni, che i trasmete el movimento a la biella e a l'albero-motore fasendo quindi girar le rude.

Machine parchegià

Benz Auto, 1886

Guidar na machina no xe massa difìcile, parò bisogna essar boni, e conòssar i vari comandi. Prima de tuto ghe xe el volante, che el permete de girar e destra e a sinistra. Do ghe xe i tre pedài: quel de destra el xe l'acelerator, che fa 'ndar la machina pi veloce; quel de mezo el xe el freno par fermarse; quel de sinistra el xe la frizion, che bisogna tegner macà ogni olta che se vole canbiar de marcia. De solito su le machine pi comuni ghe xe 5 marce più la marcia indrìo: par partir bisogna métar in prima marcia, macando la frizion e azionando la leva del canbio. Dopo man man che se 'celera se pol passar a le marce pi alte, in modo da 'ndar pi veloci. Oltre a sti qua che i xe i comandi fondamentali, ghe xe anca la freccia, par segnalar a quele altre machine dove se ga intension de girar, el freno a man par quando se parchegia in discesa, el tergicristali che el tien neti i veri quando piove, ecetera.

Ghe xe in circolasion tanti modèi de machine: su quei pi comuni pol starghe fin a 4-5 passegeri, conpreso quel che guida, e pol essarghe do o quatro porte ai fianchi de la vetura, più el portelon dedrio. A seconda de la forma, se distingue vari tipi de machine: i monovolume, le station-wagon, i coupè e tanti altri.

Dato che le machine le xe anca pericolose, in genere par guidar na machina ghe vole la patente, che i te la dà dopo aver sorpasà un esame de guida, e in quasi tuti i paesi del mondo bison ver conpìo almanco disdot'ani. In più ghe xe serte limitasion da tegner presente: chi che guida el ga da osservar i segnali stradali e rispetar le regole de la circolasion, par esenpio far de manco de guidar se el xe inbriago.

Altri progetti

• Wikimedia Commons

• Wikimedia Commons el detien imàjini o altri file so machina automobile

Varda anca

• Trabant
• Navigador satelitare