Còdaze de ła SOIUSA

El còdaze de ła SOIUSA ła ze ła codìfega doparada da ła Sudivizion Orogràfega Internasionałe Unifegada del Sistema Alpin (SOIUSA) par clasifegare łe vàrie montagne del sistema alpin.

Zenerałità

Piràmide SOIUSA, o sia łe vàrie sudivizion de łe Alpe drio ła codìfega SOIUSA.

La SOIUSA, superando ła tradisionałe tripartision de łe Alpe, el ga adotà ła bipartision in Alpe Osidentałi e Alpe Orientałi. Senpre drio ła SOIUSA łe do grande parti łe se sudivide oncor-pì in:

• 5 grandi setori (SR)
• 36 sesion (SZ)
• 132 sotosesion (STS)
• 333 supergrupi (SPG)
• 870 grupi (GR)
• 1625 sotogrupi (STG).

Conseventemente a ogni montagna del sistema alpin ła ghe połe vegner aplegada na codìfega che ła se refarise a cuałe parte, setore, sesion, sotosesion, supergrupo, grupo e sotogrupo sta cuà ła fa parte.

Definision de ła codìfega

Par costruire ła codìfega se parte da ste convension:

• 2 grande parti:
  • Alpe Osidentałi indicae col nùmaro roman I;
  • Alpe Orientałi indicae col nùmaro roman II;
• 5 grandi setori:
  • inte łe Alpe Osidentałi:
    • Alpe Sud-osidentałi individuae da ła létara majùscoła A;
    • Alpe Nord-osidentałi individuae da ła létara majùscoła B;
  • inte łe Alpe Orientałi:
    • Alpe Centro-orientałi individuae da ła létara majùscoła A;
    • Alpe Nord-orientałi individuae da ła létara majùscoła B;
    • Alpe Sud-orientałi individuae da ła létara majùscoła C;
• 36 sesion individuae dai nùmari da 1 a 36 partindo da łe Alpe Lìgure e finindo co łe Prealpe Slovene;
• 132 sotosesion individuae inte ła sesion alpina de apartegnensa dai nùmari romani necesari par contar tute łe sotosesion;
• 333 supergrupi individuai inte ła sotosesion alpina de apartegnensa da łe létare majùscołe necesàrie par contar tuti i supergrupi;
• 870 grupi individuai inte ła sotosesion alpina de apartegnensa dai nùmari àrabi necesari par contar tuti i grupi de ła sotosesion;
• 1625 sotogrupi individuai inte el grupo alpin de apartegnensa da łe létare minùscołe necesàrie par contare tuti i sotogrupi.

Co łe convension adotae e zontando i seventi segni de interpunsion (/; -; .; -; . e .) ła codìfega de na sima alpina ła sarà del tipo:

nùmaro roman (I o II) / létara majùscoła (A, B o C) - nùmaro da 1 a 36 . nùmaro roman - létara majùscoła . nùmaro àrabo . létara minùscoła

In racuanti cazi ła podarà mancare ła létara minùscoła finałe parché no tuti i grupi alpini i ze sudividesti in sotogrupi.
Altre (rare) volte el sotogrupo el ze oncor-pì in setori; in sti cazi a ła létara minùscoła prinsipałe ghe vien drio na bara e un'altra létara minùscoła guałiva.