Càncaro

La parola càncaro (anca dito cànchero, cancro), in medicina e biologia, la vien doparada par sinònimo de neoplasia maligna. Se intende cussì n'insieme de malatie anca tanto difarenti una da st'altra, che le ga in comune el fato de èssare caraterizade dalla créssita, nei tessudi dell'organismo e dei òrgani che i costituisse, de masse de sèlule col fenotipo (aspeto e comportamento) più o manco distante da quelo che vien recognossudo normale intel contesto, in conseguensa de cambiamenti a livelo de la so genètica e del'ambiente che, a vari liveli, ghe sta intorno. L'alterasion struturale e funsionale no la xe bastansa par ciamare una neoplasia come maligna: ogni càncaro par definission, necessaria pa la so diàgnosi mèdega, prevede i fenòmeni del'invasion e de la metàstasi, che i porta le sèlule alterade a colonizare, da la sede de partensa, tessudi e òrgani respetivamente visini e distanti. La parola tumor no la xe sinònimo de càncaro, ma la se riferisse a quele neoplasie, benigne o maligne, de caraterìstega sòlida, escludendo cussì le malatie proliferative del sangue e dei tessudi afini.

Toco operatorio de un carcinoma mamario, se vede la massa de color bianco che la resalta in confronto al grasso del tessudo de sostegno del'òrgano. I contorni iregolari e ramifegadi, segno de invasion logale, i spiega l'orìsene de la parola stessa càncaro

La malatia, se no la vien diagnosticada quando che la xe de dimension ridote e curada tei tempi e mejo modi (sempre che sia possìbile), la ga n'andamento crònico e ireversìbile, portando con vari mecanismi a morte el passiente che la svilupa. El càncaro, dopo le malatie cardiovascolari, xe ancó la seconda causa de morte in tei paesi sviluppadi; la so incidensa la xe in aumento par via del'inveciamento de la popolasion anca se le strategie de prevension le ga contribuio a contegnere in parte questa statìstega. Infati el major nùmaro de diàgnosi le capita inte le fasse tardo-adulte e ansiane de età, anca se xe possìbiłi forme anca in tei zóveni e in tei putei, coi vari tipi de càncaro che i se distribuisse in maniere particolari con preferense no solo par le età, ma anca par la presensa de fatori che i favorisse lo svilupo de un o più tipi de neoplasia.

Curve che le mete a paragon el ndamento in tel tempo de la difusion del fumo inte la popolasion generale e l'incidensa de càncaro al polmon. L'associasson xe cussì evidente e streta che ormai nissun ga el corajo de negare al fumo la responsabilità de la majoransa dei casi de sto tipo de malatia.

Questi fatori, diti de ris-cio o de protession, a seconda che i vaga a aumentare o deminuire la probabilità de formare una o più neoplasie, i no xe solo rapresentadi dal'età e i se destingue in:

• genètissi: da la famejarità (più casi de càncaro in fameja, secondo criteri stabilidi) a l'ereditarietà (de un sìngolo gene, che mutà e trasmesso par lìnea germinale, detèrmena la formasion de càncheri a trasmision mendeliana)
• ambientali: de infinidi tipi, el più cognossudo xe el fumo de sigareta che favorisse tanti tipi de càncaro al polmon e gnanca solo; altri i poe èssare el magnare scoreto, l'obesità, alcune particolari infession, ecc.

Vision al microscopio òtico de un toco de carcinoma renale, del'istotipo dito a sèlule ciare. Xe visìbile la difarensa col normale epitelio del'òrgano e la presensa de sèlule che le bandona, come da definission, el compartimento dove normalmente le se cata. La vision istològica, da parte de un dotor anatomopatòlogo, de tuto o un toco de massa cancarosa xe el riferimento de diàgnosi (gold stàndar) par squasi tute le neoplasie.

Va sotolineà che la squasi totalità de le neoplasie xe associada ai fatori de ris-cio in tèrmeni de probabilità e el nesso de causa de frecuente xe débole. A parte qualche caso spessìfego, xe difìssile dire che un fator da solo xe la causa de na qualche forma de càncaro. L'esenpio del fumo col carcinoma polmonare el juta a capire sto conceto: anca se se poe par serto dire che le sigarete le sia una causa de queste forme de neoplasia, al ponto che intorno al 90% dei càncari primitivi del polmon i capita in tei fumatori, resta senpre quela menoransa che ghe vien la malatia sensa gaver fumà, almanco bastansa a quele quantità che le vien recognossude come ris-ciose. Par tante neoplasie, alle cognossense de ancó, podemo donca listare fatori de ris-cio e protesion (e cognósserli xe ùtile par individuare le persone che le ga un aumentada probabilità e fare prevension): questi conceti i descrive el càncaro come malatia multifatoriale.

Multifatorialità signìfega anca che ogni singolo càncaro, anca se el se svilupa inte lo stesso tessudo de n'altra o de la stessa persona, sarà difarente da n'altro. Conplessi i xe i mecanismi che i porta le sèlule a cancerizare, senplifegando se poe dire che ghe xe mecanismi diti carcinogeni o cancerogeni, no solo sostanse come le tante che le xe contegnude inte na sigareta brusada, ma anche mutasion genètiche ereditarie, infiammasion cròniche, stìmoli ormonali e citochinici, pèrdita de interasion sèlula-sèlula e tanto altro: tute ste robe insieme le mete su, par custion de complessità dei organismi e dei avegnimenti che i se verìfega a liveli tanto pìcoli, una serie de condision che a longo tèrmene le poe esitare inte lo svilupo de na neoplasia. Par completare sto percorso xe necessari carcinogeni diti mutàgeni (i causa dani al DNA de le sèlule che le deventa càncaro), ma anca indutori (i stimola ste sèlule a prolifarare senpre de più, conservando le mutasion che le ghe dà vantaji de tipo evolussionìstico).

Coligà al conceto de multifatorialità xe quelo del càncaro come malatia multifàsica. I modeli più ressenti i descrive sta cancerizasion come un processo lento che, a livelo de tessudi, se poe anca a volte védare come acùmulo de mutasion in sequense a volte prevedìbili par tipo de neoplasia, che man a man che la cresse la presenta sèlule e n'architetura de tessudo senpre più maligna. Ghe xe neoplasie, come el carcinoma colonrettale, che le ga modeli in tei quali se descrive el passajo da la forma benigna del'adenoma a quela maligna (overo invasiva/metastàtica) del carcinoma, co inportanti recadue su prevension, diàgnosi e terapia de sta malatia.

Inte l'enorme varietà dei càncari, le classificasion le vien difìssili propio par la storia de la malatia che ogni volta la xe difarente da persona a persona. Tolendo come referimento un sìngolo òrgano, el primo livelo destingue neoplasie dite primitive (generade dai tessudi del'òrgano stesso) o secondarie (prodoto de metàstasi o invasion). Le primitive le poe èssare maligne come benigne, le secondarie solo maligne, par definission. N'altro livelo de classificasion destingue, anca al'interno de un solo òrgano, neoplasie de orìsene epiteliale e non-epiteliale.

• Parlando solo dei maligni, i càncari epiteliali i vien ciamadi carcinomi.
• Queli non-epiteliali, invesse, i poe èssare de proveniensa emolinfopoietica (linfomi se sòlidi, leucemie se lìquidi) ma anca stromale/mesenchimale (diti sarcomi).

I carcinomi i xe la majoransa de le neoplasie diagnosticade, soratuto inte le età medio-avansade quando che el càncaro xe frequente. Soratuto ai estremi de età xe comuni le neoplasie emolinfopoietiche, che le querze più o manco el 10% de le diàgnosi de càncaro. Infin par ùltimi gavemo i sarcomi.

Altri progetti

• Wikimedia Commons

• Wikimedia Commons el detien imàjini o altri file so Càncaro
• el detien schemi gràfeghi so