Discusion:Fołina

DO PAROLE...

Mi ò ciapà in man sta pàgina medo an fa, in istà, có vee tenp par gestirla. Un di, in otun, me son incort che un poche de modìfiche le era state fate, e nò pa 'l mejo. Có le ò viste, me son mes a gratarme la testa parché ò catà de tut. Ma andon co órden, modìfica par modìfica. Partixon però da 'l fat che su sta pàgina gh'en é 'l model dialetal Çanca Piave e che se se à da scrìver in altri dialet se canbia anca 'l model.

1) Version de le 15:53, 22 ago 2024

In sta version i é vegnesti fora un pochi de canbiamenti, e svariadi i era sença senso (es. àneme > persone, come se sol che un de i do el fuse giust; Trevixo > Treviso, come se ghe fuse na grafìa stàndard che la cavese via la X).

Do pasai intieri i é stati canbiadi: L'é 'n çentro cultural e turìstego ativo, graçie anca a la so apartenença a 'l grupo de i [[Borghi più Belli d'Italia]], e inte 'l 2021 l'à ciapà la [[Bandiera Arancione]] da 'l [[Touring Club Italiano]]. L'é anca na sede industrial e artexanal. > L'é 'n centro cultural ativo e pien de turisti, grasie anca al fat che l' fa parte dei [[Borghi più Belli d'Italia]], e inte 'l 2021 l'à ciapà la [[Bandiera Arancione]] da 'l [[Touring Club Italiano]]. L'é anca na sede industrial e artigianal. (cuà le é state canbiade mede robe, da çentro a centro (parché???), da graçie a grasie (anca cuà, torne a dir, se tu vol scrìver co un dialet diverso intant tu canbia tuta la pàgina, parché meda l'é restada conpagna a come che la era) e i é stati mesi giri de parole che no i serve a gnent (es. turìstego > pien de turisti)) e El teritorio de Folina, estendest par 24,08 km², l'é logà inte l'[[Marca trevizana|Alta Marca]], pi precixament inte la seçion final de la Valada, la val che la à... > Fuina la è granda 24,08 km², la è inte l'[[Marca trevizana|Alta Marca]], pi precisamente inte a Val Sana, la val che la à... (anca cuà i à mes un giro de parole conpletamente inùtil, e par de pi chi che l'à scrit sta porcherìa no 'l se a gnanca pensà de canbiar i acenti tre righe sot: un genio!!!! (la è versus l'é, ndee a véder)).

Canbiamenti su baxe de gusto (e nò de raxon), canbiamenti de grafìa fora de posto e giri de parole inùtii i sarà la costante de sto thread. Tegneeve a cuel che avee sote man parché partirò in cuarta.

2) Version de le 17:07, 26 nov 2024

Poc pi de na ora dopo l'isteso elemento el se à fat sentir da novo.

Treviso l'é deventà Trevizo, cusì. 3 canbiamenti de létera su par na parola inte 'l giro de na ora e un cuarto.

Prealpi Belumate l'é deventà Prealpi de Belun, parché evidentemente in Çanca Piave 'l agetivo "belumat" no l'é na roba "mèstega".

Soligo l'é deventà Soigo parché de sì.

"El" (artìcol e clìtico) l'é deventà "al", parché anca cuà evidentemente in Çanca Piave gh'en é sol che un modo giust par dirlo e tuti cheantri i é faladi.

Un pasajo intiero al é stat canbià: El confina verso in su co la Provinçia de Belun (co 'l novo comun de [[Borgo Valbełuna|Borgo Valbeluna]]), verso matina co Cixon, verso in zo co Pieve de Soligo (verso matina) e co [[Fara de Sołigo|Fara de Soligo]] (verso sera) e verso sera el confina co [[Miàne|Miane]]. > Al confina a Nord co 'a Provincia de Belun (co 'l novo comun de [[Borgo Valbełuna|Borgo Valbeluna]]), verso Est co Cizon, verso Sud co [[Pieve de Sołigo|Pieve]] e co [[Fara de Sołigo|Fara de Soligo]] e verso Ovest al confina co [[Miàne|Miane]]. (No sò da onde scuminçiar!!!! I punti cardinai canbiadi, la L che la sparis, i clìtici!! Vardee che "verso sera", "verso matina", "su" e "do" i é vàlidi fà Ovest, Est, Nord e Sud (e moto anca de pi parché i é roba nostra)).

Entro l'é deventà dentro. Anca cuà parché de sì.

I eror da corèger su Wikipedia no i é mio de lengua, ma de forma e de contegnù!

3) Version de le 17:09, 26 nov 2024

Cuà l'é stat cavà via "Folina" da "Folina o Fuina". Anca cuà, parché sì. Gh'en é sol che un modo giust par ciamarghe a un paexe.

4) Version de le 11:34, 27 nov 2024

El di dopo, la é subentrada n'antra persona, che la à canbià "persone" in "abitanti". Dà che savee parché, mi no die gnent.

Ançi, mi die na roba: no tu pol parlar de "coreçion de eror de scritura" se ti tu scrif "corezhest" come se ZH 'l fuse un son sonoro e "éror" come se la fuse na parola piana. Tu perde tuta la to credibilità.

5) Version de le 11:48, 27 nov 2024

Un paràgrafo intiero al é stat canbià: Fuina la è granda 24,08 km², la è inte l'[[Marca trevizana|Alta Marca]], pi precisamente inte a Val Sana, sote le [[Prealpi Belumate|Prealpi de Belun]] verso e sora 'l fiume [[Soligo|Soigo]]. L'é giust verso Folina che 'l Soligo el scuminçia ndar verso sud inte 'l [[Cuartier de la Piave]] par po terminar entro la Piave stesa. > Fuina la se slarga par 24,08 km², la se cata inte l'[[Marca trevizana|Alta Marca]], pi precisamente inte la Val Sana, ai pie de le [[Prealpi Belumate|Prealpi de Belun]] e a destra de 'l fiume [[Soligo]]. L'é giust a Fuina (sote la riva de Roncavazzai) che 'l Soligo 'l scuminzhia a 'ndar verso sud inte 'l [[Cuartier de la Piave]] par po butarse proprio dentro la Piave a medha via tra Faldhé e Sant'Anna de Susegana. (cuà no die gnent parché tute ste modìfiche le se poja su na parte ritocada da calchedun antri, cuindi nò laoro meo; ançi, ghe consejarìe a chi che à fat la coreçion de no doperar do létere par un alòfono de /d/, vist che inte la majorança de le lengue indicar i alòfoni no 'l serve a gnent)

Cison l'é deventà Cizon parché de sì.

Part l'é deventada parte parché de sì.

6) Version de le 11:59, 27 nov 2024

I é stati canbiadi diversi pasai, tendençialmente par forma e per grafia, ma anca cuà le é tute o scuaxi de utilità dubia. Cuesto no 'l vol dir che la pàgina la apie da restar come che die mi: có varò finì de scrìver el mur de testo pensarò a integrar le info; nò tut l'é da butar via.

7) Version de le 12:00, 27 nov 2024

L'é stata canbiada na parola sol che: grasie > grazhie. I canbiese tuta la grafia pitost che parole da lore sole...

8) Version de le 15:35, 11 dis 2024

El nome l'é deventà al nom. Parché sì. Da novo.

Un pasajo intiero l'é stat canbià: Inte 'l 1680 Folina la fa un salt de cualità, da 'l punto de vista de l'[[Economia|economìa]], dovest a la fondaçion de la [[manifatura]] de 'l bresan [[Francesco Fadda]], che la é stata una de le prime in Italia a proar a imitar le stofe inglexi e olandexi pi fine e liziere. > Inte 'l 1680 a Folina la vien messa su la [[manifatura]] de 'l bressan [[Francesco Fadda]], che la é stata una de le prime in Italia a provar a far le stofe come che i inglesi e i olandesi (fine, invezhe che grose come che se féa da noialtri). (principalmente el me dà fastidi tut el giro de parole che l'é stat fat).

Pi vanti gh'en é n'eror pi interesante: Graçie a l'esperiença pilota de 'l Fadda > Dopo Fadda (cuà l'eror l'é de forma: el "dopo" no 'l pol èser sinònimo de "graçie a l'esperiença pilota" - i vol dir do robe ben diverse!)

I altri eror de norma i é de lengua o de grafia (cai > casca, el nas > al nase, stabilidi > stabilii, dominaçion > dominazhion...). Cuà, da novo, èvite de parlar.

9) Version de le 15:36, 11 dis 2024

Trevizo l'é deventada Treviso. Altro no die.

10) Version de le 22:58, 23 dis 2024

Cuà le é state modificade un bel poche de robe. Tendençialmente robe de lengua, grafia, "forma". Chi che l'à fat tuti sti canbiamenti par mi l'à pers un mucio de tenp e çerti i é anca faladi (es. tacadi zo > scuminzhiadi; dat fogo > incendià (!!!)).

Prima de tirar le some çercon de méter in pie un pochi de princìpi:

- Vanti tut, corèger el dialet de calcheduni l'é na pèrdita de tenp. Cosa te inpòrtelo a ti se mi die "el nas" pitost che "al nase"? Capise corèger un eventual "ghe xe" su un testo belumat, ma fra cuel e cuel che ò let mi un poche de diferençe le gh'en é.

- Dopo: parlar de coreçion de grafìa l'é fora de posto parché el vèneto no l'é na lengua standardixada. Cuindi, mi pose scrìver scuaxi come che vui. Die "scuaxi" parché de sigur no vae a méter acenti su vocai àtone e a scanbiar consonanti sorde par sonore.

- Se avee da canbiar calcosa el lo fee su tuta la pàgina è nò un paràgrafo a la olta inte 'l perìodo de un mexe intiero. E ledee do olte par capir se le vostre modìfiche le é coerenti, pi de tut.

- Fee in modo che i dati che metee entro i sonpie giusti e nò faladi.

- Se na parola la à un sinònimo e i é giusti tuti e do a la stesa maniera, de sigur canbiar la parola pa 'l so sinònimo l'é butar via 'l tenp.

- Par finir, se calcosa el lo avon bel che inte la nostra lengua, çercon de doperarlo.

CONCLUXION

Mi no son un che 'l dis ste robe cuà parché l'é convint de èser senpre inte 'l giust. Le die parchè ò caro che Wikipedia VEC el sonpie un posto onde che se pose divulgar in modo sano informaçion sana sença far a gara par far véder chi che 'l scrif mejo. Mi ò caro prexervar come che scrive par un motivo de coerença, e varìe caro che sta coerença la fuse rispetada inte le pàgine che modìfiche: sote la me òtica un canbiamento l'à da èser pensà ativamente e èser coerente, nò limitarse a canbiar sol che na létera inte na pàgina sença gnanca lèder el resto e pi de tut sença curarse de aver fat na modìfica coerente. Wikipedia VEC la deventarà granda sol che se concentron su i problemi veri, come la so cura e la so difuxion, pitost che le monade. Mi la me part la ò fata, ò ciapà n'artìcol e 'l lo ò traduxest tut parché vui che Wikipedia VEC la sonpie forte e springa fà Wikipedia ITA.

Amighi e conpagni, nò nemighi e dixonesti. FrancescoColomberotto (msj) 23:21, 25 dis 2024 (CET)