Kamba

I kamba (en te la loro lengoa mukamba al singolar e akamba al plural) i xe on popolo che vive in tel Kenya. I kamba i xe bantu e i vive tra la costa e la region sentral del paexe. I xe ono de i majori grupi etnici del Kenya.

Storia

I kamba i xe ono de i popoli bantu che el xe rivà in Kenya durante le migrasioni del X secolo. I xe rivà ne la zona de Machakos in tel XVII secolo e i sa slargà inte la zona de Kitui in tel XVIII secolo. I sa anca mosi verso la costa a lo steso tempo dove i ga fondà i vilagi de Mtito Andei (foresta de i avoltoi) e Mariakani (la faretra). I no xe andà fin su la costa parché i ga fato guera co i maasai par el control de la zona de Voi e i xe stà blocà ne l’espansion a sud. I kamba i xe agricoltori ma i ga anca controlà el marcà co i arabi e i swahili. Tute le piste carovaniere che rivava su la costa, le pasava dal teritorio kamba. I kamba i ga resistio la colonizasion, ma dopo i ga formà el groso de l’esercito. Co i inglexi sa tolto la tera e le vache, i kamba i ga marcià so Nairobi e ocupà la zona de Kariokor. I inglexi i ga dovù restituir tera e bestie. Ancò i kamba i sofre par la sicità ne le loro tere ancestrali, ma i se sa espanso ne le zone maasai (Altopian de i Kaputiei, zona de Narok e zona de Kajiado), e i ga atività comerciali ne le pi grandi sità del Kenya. Tanti kamba i segue la cariera militare o de le guardie forestali (Wildlife Service).

Cultura

Come quasi tuti i grupi etnici keniani, i kamba i segue el sistema de le clasi de età. Tuti i omeni che i ga fato l’iniziasion insieme i fa parte de on grupo de età. On butel diventa omo co la circoncision. Al primo stadio de l’iniziasion, el butel el se ciama kamwana (picolo omo), al secondo stadio el diventa mwanake (gueriero) e al terzo nthele (omo maduro). Dopo sti tri stadi on el diventa ansian (i anziani i aministra la giustisia) e dopo custode del sacro (i veci i mèdia i bisogni del grupo con Dio). Tuti i kamba i apartien a ono de i 25 clan patrilineari. No se se pol sposar co done de lo steso clan.

Religion

I kamba i crede in Dio (Ngai o Mumbi) ma anca in tuta na serie de spiriti. De solito i spiriti i xe i spiriti de i antenati. Ma ghe anca spiriti cativi. La dea Gatambi la xe la dea de le acque. No se capise ben se Gatambi la ga da esar considerà na dea al pari de Ngai, o solo no spirito sotomeso a Dio. I kamba ofre de frecuente de i sacrifici incruenti a i spiriti, normalmente soto i albari sacri. Anca se la majoria la xe diventà cristiana, el mondo de i spiriti el xe oncora tanto importante par i kamba.

Economia

I kamba i xe restai agricoltori e alevatori. Quei che vive in sità i sa dato al marcà. Tanti i laora ne l’esercito. I artigiani kamba i xe bravi a scolpir el legno.

Portałi

Portałe de Africa

|

Wikimedia Commons el detien imàjini o altri file so Kamba
Scholia el detien schemi gràfeghi so Kamba

Controło de autorità	LCCN (EN) sh85071390 · BNF (FR) cb12362059b (data)