Ormon

In fisiologia, se ciama ormon, parola derivada dal grego hormao col signifegà de móvare, qualsevoja sostansa chìmega prodota e sircolante drento a un sistema biològico che la ga la funsion de métare in comunicassion sèlule, tessudi, òrgani e aparati che i se cata lontan in intrà luri. Sto processo el vien ciamà segnalassion endòcrina e'l sistema endòcrino xe l'insieme dei òrgani che i ga, come funsion prinsipale, la secression (o mejo, incression) de ormoni inte la circolassion sanguigna, donca drento al'organismo, a difarensa de le giàndole esòcrine.

El cortisolo (anca ciamà idrocortison) el xe el più inportante e bondante glucocorticoide prodoto da le giàndole surenali del'omo. Derivà dal colesterolo, el xe un lipide che el ga bisogno de trasportatori proteici par ndare in giro par i lìquidi corpòrei, ma'l passa fassilmente traverso le menbrane de le sèlule.

Modelo struturale del'ormon idrosolùbile ciamà insulina. La strutura proteica (na caena piegada de aminoàcidi in fila) la parmete de girare lìbara par i lìquidi drento ai vasi e i interstissi, ma miga de passare traverso le menbrane selulari.

Miga solo a la secression esòcrina, la funsion ormonale la xe destinta da le cussì dite segnalassion paràcrina e autòcrina, propie de sostanse ciamade citochine, che le svolze la so atività de messajero, respetivamente, su le sèlule intorno e su la stessa che ele ga prodote e butà fora. Sta destinsion (ormon che el ga atività sistèmica, citochina che la ga atività logale) la xe più na schematizassion che quelo che càpita inte i sistemi biològici: gnente inpedisse a ormoni de gavere atività anca sul tessudo dal qualo i vien produti, cussì come xe possìbile che le citochine le ranzonza na concentrassion sanguigna bastante par dare un signale ativo anca su lughi distanti del corpo.

Altre sostanse, che le va destinte dai ormoni par la so modalità de assion fisiològica, le xe i neurotrasmetitori e i neuromodulatori che i se cata in te'l sistema nervoso sentrale e perifèrico. Anca se i funsiona, cussì come i ormoni e le citochine, con la stessa sequensa de produssion, secression, trasporto, ligame al recetor, ghe xe inportanti difarense de tenpo e intensità del segnale prodoto: l'ormon ghe mete più tenpo a produre n'efeto biològico respeto al neurotrasmetitor, ma sto efeto el dura assè de più, parchè el se destribuisse in volumi più grandi e'l vien eliminà in tinpi mazori.

No'l gavaria senso listare tute le sostanse del corpo uman che le poe funsionare come ormoni e i infinidi processi che i xe inpissai, modifegai e stuai da n'atività ormonale. La funsion generale del sistema endòcrino e dei altri aparati (a dire el vero i xe tuti) che i desfruta ormoni, xe el mantegnere l'omeòstasi de le funsion corpòree adatàndole a le modifegassion che le vien dal anbiente fora e anca drento al'organismo.

Classificassion

I ormoni i vien destinti in classi soratuto in base a la so strutura chìmega, in base a la quala se difarensia:

• Ormoni idrosolùbili: co che i vien butai in te'l sangue i se cata tuti in forma lìbara, o sia dessiolta. In sta categoria ghe xe do sotoclassi, quela a alto peso molecolare, che la toe drento le molècole a strutura proteica e peptìdica (esenpi i xe dai dal'insulina che la règola la glicemia, le liberine del'ipotàlamo e le tropine del'adenoipòfisi che le controla i assi endòcrini mazori, e tanti altri), e quela a basso peso molecolare, che la revarda i derivai dei aminoàcidi (come l'adrenalina, ecc.). Tute ste sostanse le xe comunade dal fato che i so recetori i se cata su la menbrana selulare (se parla de recetori transmembrana), co un toco fora che el liga l'ormon e n'altro drento che el tramete el signale inpissando o stuando n'atività enzimàtica sua o de proteine tacade, cussì da viare na cascada de segnalassion intraselulare. I ormoni idrosolùbili, infati, i no xe boni de mandare un signale drento a na sèlula parché i no sùpara el strato lipìdico de la menbrana.
• Ormoni liposolùbili: i ga trasportadori come proteine del plasma sanguigno che eli porta in jiro e solo na pìcola frassion la poe èssare catada lìbara. I xe sostanse de natura lipìdica e i xe ciamai ormoni steroidei (o steroidi) parché i vien prodoti traverso l'ossidassion dei lipidi ciamadi steroli: sti qua i vien prodoti soratuto da le giàndole surenali e da le gònade e i xe i mineralcorticoidi, i glucocorticoidi e i ormoni sessuali (andrògeni, estrògeni e progestìnici). L'ecesson la xe rapresentada dai ormoni tiroidei, che, anca se i xe sostanse liposolùbili, i xe derivai da aminoàcidi. Tuti sti ormoni, propio par ste caraterìsteghe chìmeghe, le poe passare fassilmente traverso le menbrane selulari e par sto motivo i ga recetori intraselulari: co che i se liga a la so sostansa, i se sposta dal citoplasma al nùcleo e i va a modifegare l'espression gènica dei tessudi bersajo.

Schema de la recession del signale ormonale a livelo de le sèlule che le ciapa el messajo. Xe messe in contraposission i mecanismi de funsion dei recetori intraselulari dei ormoni liposolùbili (come i steroidi, a sanca) respeto a queli dei recetori transmembrana dei ormoni idrosolùbili (come queli proteici, a drita).

Ormoni come fàrmaci

La definission de fàrmaco la poe quèrzare in parte la descrission de le funsion del'ormon, anca se se podaria considarare fàrmaci anca sostanse che no le agisse drio un recetor, oltra al'evidente fato che, da la prospetiva de n'organismo, el fàrmaco el vien da fora, mentre l'ormon el vien prodoto drento. Parò in un gran nùmaro de situassion mèdeghe xe racomandà doparare i più difarenti ormoni, prodoti fora dal corpo par via naturale o artifesale, par terapia. I ànbiti i xe in pràtega do:

• El primo el xe la terapia sostitutiva: co na giàndola endòcrina no la funsiona più bastansa, xe necessario dare da fora l'ormon, anca parfin a volte par salvare la vita del passiente. Esenpi i xe dai da la levotiroxina doparada par l'ipotiroidismo, l'insulina par el diabete melito, la vitamina D par le so carense, ecc.
• El seconto el xe la terapia de potensiamento de n'atività ormonale che la resulta ùtile inte no spessìfico contesto clìnico. Par fare n'esenpio, i passienti co na malatia autoimune i ga de frecuente na resposta infiamatoria esajerada e poe tore vantajo da na major atività dei glucocorticoidi (comunemente ciamai cortison) che donca i xe dai come fàrmaci, anca se no xe miga dito che sti passienti i parta co n'insuficiensa de sti ormoni. Deverso xe l'anbito de aplicassion (e i dosaji) dei glucocorticoidi inte la malatia de Addison, co che i xe par vero in defeto.

La natura chìmega la influensa la modalita co la quala el medesinale contegnente ormon come fàrmaco el se soministra: i liposolùbili i se poe ciapare par via enterale (par boca, soratuto), mentre i idrosolùbili i no xe assorbidi ma degeridi par sto verso, e quindi i se buta drento par via parenterale (overo na pontura sotocute, in mùscolo o in vena).

Altri progetti

• Wikimedia Commons

• Wikimedia Commons el detien imàjini o altri file so ormon