Ƚe proteine ƚe xé biomoƚècoƚe definìe dal pónto de vista chìmego come poƚìmeri de unità monomèriche ciamade aminoàsidi. Ƚe pol averghe paréce de funsion detade dal'enorme quantità de struture réxe posìbiƚi da ƚa varietà dei monòmeri e da ƚe desferénti sequénse co ƚe quaƚi sti qua i se unise.

Formasion del ƚigame peptìdico

Ansituto, i aminoàsidi i xé conposti formadi normalmente da un grupo amìnico (H2N-), n'àtomo de carbonio sentral al qual se unise n'idrògeno (-H) e un rexiduo orgànego (-R) de varia natura e infin da un grupo carbosìƚico (-COOH). Ƚa formasion del ƚigame peptìdico infrà dó de ste moƚècoƚe ƚa se verìfega a liveƚo de n'idrògeno del grupo amìnico e'l -OH grupo carbosìƚico e, co na reasion de condensasion, ƚa crea na moƚècoƚa de aqua (H2O), a fianco del dipeptide (dó aminoàsidi).

Có che ƚa cadéna formada ƚa raxónxe na quantità granda (dai 70 ai 100) de aminoàsidi ƚa perde el nome de poƚipeptide e ƚa tol queƚo de proteina.

StrutureCànbia

Eséndo ƚe proteine moƚècoƚe straordenariamente conplese i biochìmeghi i ga definìo quatro liveƚi de ƚa só strutura par anaƚixarle più fasilmente.

Strutura primariaCànbia

 
Còdexe genètico tradóto in aminoàsidi

Ƚa strutura primaria de na proteina ƚa xé ƚa sénplise sequénsa ordenada dei aminoàsidi che ƚa conpon. Durante ƚa sìntexi protèica ƚa vien tradota 'ntei ribosomi su ƚa baxe de i codoni (grupi de tre nucleotidi qualsevogia) de ƚa cadéna de m-RNA che ƚa xé ƚa copia in negativo de un particoƚar toco del DNA contegnùo 'ntel nùcleo de ƚa sèƚuƚa. A ogni codon del m-RNA corespónde n'anticodon (costituio dai tre nucleotidi conplementari de quéƚi del codon), parte de ƚa moƚècoƚa de t-RNA, altro àsido nuclèico che'l trasporta un particoƚar aminoàsido. Ƚa corispondénsa codon-aminoàsido ƚa xé dada da un còdexe ciamà degenerà de sòƚito i basta i primi dó nucleotidi del codon par stabiƚir l'aminoàsido reƚativo (par exénpio, ƚ'aminoàsido fenilalanina el xé codifegà da ƚe sequénse UUC e UUU)

Strutura secondariaCànbia

 
Mioglobina, da notar ƚe α-èliche coƚorade

I aminoàsidi che i costituise ƚa strutura primaria i xé ƚigai traverso el ƚigame peptìdico ma sto fato no cava ƚe repulsion de natura magnètega che i vari àtomi ('ntei rexidui orgàneghi ghe pol èser anca sólfaro e azoto) de n'aminoàsido i fa verso n'altro. Ƚa cadéna, in sta maniera, ƚa tol desferénte configurasion spasiaƚi. Considerando ƚe grande quantità de aminoàsidi che i fa na proteina, sta qua difisilmente ƚa gavarà n'aspeto linear, ma ƚa torà un secóndo tipo de strutura che'l pol'èser:

  • α-èlica, conformasion a spiral, come che'l sugerise el nome;
  • fogéto-β, conformasion che ƚa se repiéga su de eƚa.

Strutura tersiariaCànbia

El liveƚo daspò el xé ƚa strutura tersiaria, ulterior conplicasion de ƚa despoxision spasial de ƚa moƚècoƚa. Ƚe varie parte ƚe se despon 'nte ƚa megio maniera respeto a ƚe interasion sia infrà ƚóre, sia col solvénte o qualsevogia roba che ghe staga: ƚa strutura dónca no ƚa depende sóƚo che da quéƚa primaria. Ghe xé dó tipi fondamentaƚi anca par quanto revarda ƚa strutura tersiaria:

  • proteine globuƚari: funsion spesìfeghe come i ormoni e enzimi;
  • proteine fibróxe: deputae a funsion in gènere de strutura o moviménto, par exénpio miosina e colàgene.

Strutura quaternariaCànbia

St'ultimo liveƚo el revarda póche proteine formae dal'union de più struture tersiarie. L'exénpio più cognosùo de strutura quaternaria xé l'emoglobina, formada da quatro unità globulari.

FunsionCànbia

 
Schema del'anticorpo che'l mostra (limitatamente) ƚa só spesifisità ai antìgeni

L'enorme nùmero de conbinasion e despoxision spasiaƚi posìbiƚi ƚe fa in modo che ƚe proteine ƚe gabia anca na quantità eƚevata de róƚi inportanti drénto ƚe sèƚuƚe e i organismi:

  1. Funsion cataƚìtica: i enzimi i xé particoƚari proteine fibróxe che ƚe cataƚixa ƚe reasion chìmeghe: sta roba no signìfega sóƚo che ƚe veƚocixa, ma anca che perméte i só svolximénti a na tenperadura adeguada ai procesi bioƚògisi. Sénsa de ƚóri anca sóƚo par degerir bixognaria alsar ƚa tenperadura interna a liveƚi inconpatìbiƚi co ƚa vita. Da notar l'alta spesifisità de ste moƚècoƚe;
  2. Funsion strutural: no sóƚo xé proteine i microtùbuli, overosìa el schèƚetro drénto ƚa sèƚuƚa, ma anca péƚi, cavégi, squame e péne;
  3. Funsion de moviménto: i mùscoƚi i baxa i só moviménti sul scoriménto de bande protèiche, che ƚe costituise na granda parte de ƚa só masa;
  4. Funsion de protesion: i anticorpi, ciamai più coretamente imunoglobine, i xé proteine che ƚe ataca agénti esterni e/o patògeni. I xé altamente spesìfisi come i enzimi;
  5. Funsion de trasporto: a parte l'emoglobina che ƚa tol l'osìgeno 'ntel sàngue, gavémo proteine 'nte ƚa menbrana seƚuƚar che ƚe règoƚa el pasagio de sostanse;
  6. Funsion energètega: i aminiàsidi i pol èser convertidi in glucosio, 'ntel figà, par cavarghe energia: ƚa parte amìnica azotada ƚa vien trasformada in urea e butada fora col'orina;
  7. Funsion mesagera: n'intiera clase de ormoni, diti no-steroidei perché miga grasi, xé proteine doparade par inviar segnaƚi de vario tipo ai òrgani.
Controło de autoritàLCCN (ENsh85107666 · GND (DE4076388-2 · BNF (FRcb11936447p (data) · NDL (ENJA00572676
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Proteine&oldid=677326"