Paso Vexena
El paso Vexena, 1404 m, xe in Trentin e el liga l'Altopian de Lavarone ał'Altopian dei sete comuni. El xe na beła piana larga de prà, coi boschi tutintorno e tante malghe e vache (lì su vien fato el formajo Vexena).
Storia canbia
Fin a ła Sentensa roveretana del 1605, Vexena xera soto ła Republica de Venesia, come ke riporta el proveditor ai confini conte Francesco Caldogno al so doge Marin Grimani ai primi del 17° secoło. Dopo, ła xe pasà soto ł'Austria.
Prima guera mondiałe: i forti de Vexena canbia
I Austriaci i gaveva tirà su, prima de ła prima guera mondiałe, na cadena de forti difensivi verso ł'Italia, da Folgaria (forti Serrada, Dosso del Sommo o Cherle, Sommo Alto, Sebastiano) a Lavarone (Gschwendt o Belvedere, Łuxerna) fin a Vexena (Verle e Spitz Vexena).
A Vexena ghe xe difati sti do forti: uno, kueło de Verle o Busa Verle el xe a pochi minuti a pie dal paso, l'altro, in sima al Spitz Vexena, 1905 m, el xe in alto, scavà drento ła piera, a strapionbo suła Valsugana e se ghe riva col troso n. 205, in do ore e mexa.
Dal Spitz Vexena se ga na vista meravejosa sui laghi de Levico e Caldonaso, sul Panarota, sul Lagorai e, distante, sułe Dołomiti de Brenta. El forte del Spitz Vexena el xera in realtà un posto de oservasion, co teritoriałi, tełegrafisti e tełefonisti e sapadori. Ai primi dì de guera del 1915 i do forti i xe sta bonbardà dal forte Verena, tałjan, e el Verle anca da ła fanteria, ma i Tałjan no i ghe ła ga fata a ciaparli. Dopo ł'ofensiva austriaca del 1916, i do forti i xe restà 'ntełe retrovie e cusì fin al 1918, a ła fin de ła guera.