Al pjol al è an spasio che al vansa fora da la faciada de 'n edificio, che se pol doperarlo, e che de solito al à na ringhiera.

Al famoso pjol de Giuljeta, a Verona
An pjol te la cità de Roma

Sagoma, dimension e tecniche costrutive le canbia in maniera inpressionante secont al uso che ghen gnen fat, al perido de costrusion e i schei che al à spendest al paron.

Inte le case citadine vece e 'te le vile i pjoi de solito i è de pjera. La so funsion la era ligada a na vista panoramica, a 'n elemento par far pì bela la faciada de la casa, o, qialche olta, a 'l bisogn de er an palco da 'l qual farghe descorsi a la popolasion. Se trata de pjoi estremamente pisoi, de solito fati a sbals.

Le case de i porecan, invese, no le à mai abu an gran bisogn de er pjoi infin a la introdusion de 'l sorch. Le prime qualità de sto cereal american difati le fea fadiga a gner fate, cossì al è nassest al bisogn de er spasi grandi aonde meter le panoce a secarse. de fianco de ste qua se à dontà anca fasoi e qualche altro cereal. I pjoi i era anca inportanti come spasio par meter i vestì a sugarse. I representea anca al elemento de comunicasion tra le canbere de le case rurai. Par tuti sti motivi, i pjoi i ea da esser grandi. Al materjal da costrusion principal al era al legn. I trau i podea esser incastradi a sbals 'te 'l mur, co elementi de inrigidiment che ruea 'te 'l quert (zona feltrina) o pojadi 'te 'l mur da na banda e te na pjana incastrada a pilastri da quelaltra (solusion adotada 'te 'l beluness e 'te la alta Trevisana). Al legn doperà de solito al era roro, castegner, laress. Tra i pjoi de solito ghe n'era scale normai o a pecoi. La ranpa de scale che tochea tera comunque la era senpre de pjera. La ringhiera la era senpre fata de 'l stesso legn de 'l pjol, co elementi verticai a base esagonal. fea ecesion solche serti paeset de montagna aonde che al legn al costea poch, sichè la đent la podea permeterse anca de far ringhiere de tole decorade. Inte le case moderne la funsion de i pjoi la se à redusest forte. De solito i gnen fati de cimento a sbals e de dimension pisole parchè le norme edilisie le tende a scorajarli e parchè i representa an elemento pericoloss par la trasmission de 'l calor.

Altri progetiCànbia

Controło de autoritàLCCN (ENsh85011151 · GND (DE4130867-0
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Pjol&oldid=955243"