Verona

Verona l'è la cità pì a ovest del Veneto, l'è vissina al Lago de Garda. L’è el sentro pì popoloso della región. Ła ga na posision ziogràfega che ła ghe permete de esar senpre al sentro dei trafichi de mercanti, che i vegna da levante, che i vegna da Milan, chi sia tamochi o chi vegna dal sud. Infati l'è una dei centri piasè importanti par łe comunicasion par strada, e gh'è na mota de robe inportanti par exenpio un fiera, 'ndo che i fa tute łe 'spoxissioni.

Verona

Verona (it) Veròna (vec)
Pozision
45°26′00″N 10°59′00″E45°26′00″N, 10°59′00″E (Verona)
Stato	Itàłia
Rejon	Vèneto
Provinsa	Verona
Cavedałe de	Verona
Popołasion
Totałe	255 588 (2023)
Densità	1 284,88 hab./km²
Zènaro	134 995 (%52,8)   (%48,1) 123 036
Demònemo	veronezi ,
Idioma	italian
Zeografia
Àrea	198,92 km²
Bagnà da	Àdeze
Altitùdene	59 m
Rente a	Busołengo Somacanpagna San Piero in Carian San Martin Bon Albergo Sona Butapiera Viłafranca de Verona San Màuro de Sałine   San Joani Lupatoto Pescantina Castel d'Asan Roverè Veroneze Gresana Negrar   Mezane de Soto Tregnago
Dati istòreghi
Prima mesion documentada	Verona romana (it)
Dì festivo	Festa patronałe(12 de apriłe)
Patrono	San Zen vescovo
Organizasion pułìtega
Òrgano lejislativo	consejo comunałe de Verona (it)
Sìndico de Verona	Damiano Tommasi (it) (29 de zugno del 2022)
Còdazi de identifegasion
Còdaze postałe	37100 e 37121–37142
Còdaze de matricołasion	VR
Fuzo oràrio	UTC+1 UTC+2
Clasifegasion climàtega	clima subtropegałe ùmido
Prefiso tełefònego	045
ID ISTAT	023091
Còdaze catastałe de Itàlia	L781
Premi  Medaglia d'oro al valor civile (it)  Medaja de Oro al Vałore Miłitare
Istòrego
← Verona romana (it)
Sito web	comune.verona.it

El panorama de Verona da Castel San Piero

I só monumenti prinsipali i ze l'Arena in piassa Bra, el pontesel de Romeo e Giulieta, el ponte Piera, Piassa Erbe ndo che gh'è un casin de palassi pituradi, e el Teatro Romano su par łe toresele. Łe só vie principali i ze via Mazzini, via Capèl e via Bałòn, se vardemo solo inte ła parte pì asè vecia.

Łe squadre de balòn de Verona i ze do: l'Hellas Verona, che l'è la squadra piesè conoçua e che a gà vinto anca un scudeto e l'è pena tornà in serie A, e el Ceo, che la xuga in Serie A e st'ano ghe sarà de novo el derby de Verona dopo 12 ani. A dir la verità łe done a balon jè andà mejo, tri squadre le ga ciapà el scudeto: el Verona Calcio Feminile jutà anca da ła Fondasion Gunther, el Foroni Verona e a ła fin el Bardolin.

Verona l'è anca sede universitaria, che l'è sempre piasè granda sora-de-tuto par medicina e informatica anca se jè facolta rilativamente nove.

Storia

Storia antica

Verona l'è sta abità fin da la preistoria co un pochi de insediamenti su la cołina de le Toresełe (dita anca de San Piero) che domina l'Adese. Se barufa oncora deso su ci sia stà la popołasion che ga fondà ła sità: l'ipotesi pi acredità, sostegnua anca dal scritor romano Plinio el Vecio, ła parla dei Reti, opure de na popołasion de Galli Cenomani, come sostien inveze Tito Livio. Altre ipotesi łe parla de na inprobàbiłe origine etrusca (forsi parché vizin a Verona vivea i Arusnati, popolo de origine mia certa e che secondo alcuni el saria etrusco) e, par ultima, l'ipotesi paleoveneta ła dise che ła sità ła saria stà fondà da ła popołasion local dei Euganei.

Comunque l'è stà solo co la fondazion de la colonia romana ne ła "esse" de l'Adese (89 a.C.) che ze tacà el periodo de grando splendor de ła sità. Da insediamento picenin e sconosùo, i romani i ghe na fato un capolaoro d'arte tirando su grandi monumenti, alcuni dei quali i se pol vedar oncora deso. Ła sità l'è sta in seguito particolarmente doparà inte el III secolo d.C. come base militare contro i barbari, e l'è sta rinforzà da l'inperador Gallieno, che el ga fato slargar i muri de la sità.

Storia medieval e moderna

Dal V al XII secolo Verona l'è passà soto el dominio de varie popołasion barbare: dai Visigoti de Alarico I a le distruzion portà da Attila, pasando par el dominio dei Ostrogoti de Teodorico el Grande, fin a rivar a l'ocupazion dei Longobardi guidà da Alboin. Inte el 774, proprio a Verona, i Franchi de Carlo Magno i ga batuo l'ultimo re dei Longobardi, Adelchi, causando la fin del periodo Longobardo.

Dal 1136 Verona l'è deentà un Comun, entrando in na faxe de transizion dal feudalesimo. Da de lora sa sucedùo varie guere e la sità l'è sta doparà de frecuente come forteza. Dominà prima da Ezelin III da Roman, inte el 1262 l'è passà soto le mane dei Scałigeri, che i ga slargà un bel po la sità e i so domini. Dal 1387 Verona l'è sta ciapà dai Visconti de Milan, dopo par un tochetin dai Carraresi, e par finir inte el 1404 ze rivà i Veneziani. Soto la Serenisima ghè sta quasi quatro secoli de relativa pace, co na breve ma sanguinosa parentesi (1509-1516) al tenpo de la guerra de la Lega de Cambrai, quando i soldai inperiali i ga ocupà la sità.

Storia contenporanea

Inte el 1796 l'è sta conquistà da le armate de Napoleon, che inte el 1797 el ghe là dà ai austriaci col Tratato de Campoformio, dopo che la sità la gavea proà co corajo a ribelarse ai francesi co le Pasque Veronesi. Dopo col Tratato de Lunéville (1801) Verona l'è stà spartìa in do longo el corso de l'Adese: la parte destra ai francesi, la sinistra (che i francesi i ciamava co disprezo Veronette, da cui el nome Veroneta) ai austriaci, e cosita l'è restà fin al 1805 quando i austriaci i ga dà el Veneto par intiero a la Francia.

Col Congreso de Viena (1815), Verona l'era stabilmente in man dei austriaci e la ghe restarà fin al 1866, deentando el vertice che strategicamente contava piasè tra le forteze del Quadrilatero, l'inportante zona militar asburgica che gavea da far da cusineto contro i asalti dei Piemontesi che zercava de conquistar el Lonbardo-Veneto austriaco.

La storia de Verona italiana l'è tacà el 16 de otobre 1866 co la conquista del Veneto da parte dei Savoja dopo la terza guera de indipendenza: da de qua in avanti la sità la ga passà un periodo de relativa tranquilità e prosperità, anca se verso la fin del secolo ze tacà un forte fenomeno de emigrazion, soratuto verso le Meriche.

Inte el 1882 ghè sta n'aluvion tremenda: l'Adese el ga sorpasà i arzeni e bona parte de la sità l'è ndà soto aqua. Dopo de lora, par metar al sicuro la sità da altre piene, ze stà costruii i murajoni, e la sità la ga dovuo rinunciar par senpre a uno dei so aspeti piasè tipici, de "sità che vivea su l'aqua".

Ne la seconda guera mondial l'è sta una de le sità pi colpie dai bonbardamenti. Dopo la caduta del fasismo (1943), Verona l'era difati deentà centro nevralgico dei "republichini" nazifasisti. Col Processo de Verona, Galeazzo Ciano e altri gerarchi fasisti, acusà de ver tramà co Badoglio par far arestar el Duce, iè stà dichiarà colpevoli e fusilà in riva a l'Adese.

Dopo el processo el regime de Salò l'è deentà, se posibile, oncora pi violento e persecutorio. L'atuale santuario de Lourdes sul col de san Leonardo (protetor dei carcerati), zà sede de una Ceza omonima dal XII secolo, che l'era sta esproprià da Napoleon e trasformà dai austriaci inte el 1838 inte el Forte San Leonardo, l'è stà trasformà inte el 1943 in carcere pułìtego adibìo a la persecuzion de sitadini ebrei, antifasisti e prigionieri de guera.

Inte el secondo dopoguera, sicome l'Italia l'è entrà ne la NATO, Verona la ga ciapà de novo inportanza strategica, vista che la cortina de fero coi Paesi de l'Est no l'era mia tanto distante. La sità l'è deentà sede del Comando de le Forze Terestri Alleà del Sud Europa (FTASE) e par tuto el periodo de la guera freda ghè sta na forte presenza militar, soratuto mericana, che la sta calando solo in sti ultimi anni.

Ancó Verona la se presenta come na sità dinamica e inportante, econòmegamente tanto attiva, e anca meta turistica de rilievo grazie a la so storia milenaria, dove el passato romano el vive a fianco de la Verona scaligera, che par tanti versi la riprende i stessi motivi architetonici e artistici.

Clima

Verona ła ga un clima umido subtropico come łe pianure del nord de l'Italia, co istà calde e inverni fredi e umidi, anca se el Lago de Garda mitega parsialmente su ła sità. Ła Rejon prexenta l'influo de łe correnti occidentałi e de l'Oceano Atlàntico o, in manco ocasion, de quelle nordorientali pì fredde e asciute de origine eurasiàtica e l'Eoropa meridionale, dove inveze el domina l'influso de i antizicloni subtropicali e del mar Mediteraneo.

Tacà a Nord, Verona xe delimitada da catene montuose de łe Prealpi Vènete a orografia complessa e con una apertura prinsipałe verso est.

Ła umidità relativa ła xe alta soratuto in inverno, quando ghe xe ła nebia, soratutto dal tramonto fin a tardi matina; el fenomeno el xe diventà sempre meno frecuente inte i ultimi anni.

Verona-Vilafranca (1991-2020)	Mizi												Stajon				Ano
	Zen	Feb	Mar	Apr	Maj	Zug	Luj	Ago	Set	Ot	Nov	Dis	Inv	Pri	Ist	Aut
T. max. mèdia (°C)	7,2	9,7	14,4	18,6	23,6	27,8	30,2	30,0	25,0	18,6	12,4	7,8	8,2	18,9	29,3	18,7	18,8
T. mèdia (°C)	3,2	4,9	9,1	13,1	18,0	22,2	24,4	24,2	19,5	14,0	8,4	3,8	4,0	13,4	23,6	14,0	13,7
T. min. mèdia (°C)	−0,8	0,1	3,7	7,5	12,4	16,6	18,7	18,4	14,0	9,3	4,5	−0,1	−0,3	7,9	17,9	9,3	8,7
T. max. asołuta (°C)	19,8 (1974)	22,1 (1990)	27,2 (2008)	31,8 (2011)	36,6 (2009)	38,1 (2019)	38,2 (2007/2013)	39,0 (2003)	33,2 (2006/2008)	31,4 (2023)	23,6 (2004)	18,9 (2023)	22,1	36,6	39,0	33,2	39,0
T. min. asołuta (°C)	−18,4 (1985)	−18,4 (1956)	−10,4 (1949/2005)	−5,2 (2021)	0,0 (1976)	3,8 (1953)	7,3 (1948)	8,1 (1995)	2,0 (1974)	−4,6 (1946)	−7,9 (1975)	−15,5 (1950)	−18,4	−10,4	3,8	−7,9	−18,4
Precipitasion (mm)	50,9	43,3	48,7	70,4	74,2	87,2	62,6	81,7	76,2	91,0	64,8	52,5	146,7	193,3	231,5	232,0	803,5
Dì de piova	6,8	5,1	6,0	8,9	8,6	8,6	5,5	5,8	6,0	7,4	7,1	6,2	18,1	23,5	19,9	20,5	82,0
Umidità rełativa mèdia (%)	85	78	73	75	73	73	73	74	76	81	84	84	82,3	73,7	73,3	80,3	77,4
Ore de sołe par meze	94	102	156	180	241	255	304	262	199	158	72	81	277	577	821	429	2 104

Monumenti e posti da ndar vedar

Ben protexesto da l'UNESCO
Sità de Verona
Verona
Stato	Italia
Tipołoxia	Architetonico
Critero	C (ii) (iv)
Perigoło	Nisuna indicasion
Ano	2000
Linganbo	inglexe fransexe

[[Categoria:Patrimoni de l'umanità in Itàłia]]

El teatro romano

Epoca romana

Verona la ga un mucio de monumenti de epoca romana, tirà su tuti quanti dopo el I secolo a.C., quando la sità l'è sta ricostruia rento de la "esse" de l'Adese. El monumento piasè famoso in asoluto, sinbolo de la sità stessa, l'è l'Arena, el terzo anfiteatro roman par dimension dopo el Colosseo e l'Anfiteatro Capuano, ma quelo tegnù mejo tra questi, tanto che el vien doparà oncora deso par ospitar el famoso Festival Lirico Areniano, oltre a numerosi concerti.

N'altro famoso monumento l'è el teatro romano, del I secolo a.C., ma riportà a la luce solo inte el 1830, quando i edifici che i leteralmente i lo cuerzea iè stà butà zo. D'istà se tien inte el teatro na serie de spetacoli che tol el nome de Estate Teatrale Veronese.

La Basilica de San Zen

Epoca medioevale

El basso medioevo el ga lasà pochi ricordi a Verona, par via del devastante teremoto del 3 xenar 1117 che ga vu come epicentro proprio el veronese, e ga fato un mucio de danni. Par colpa del teremoto ze cascà parfin na parte de l'anel esterno de l'Arena, lasàndoghene in pié solo un tochetin, che l'è sta botà oncora piasè in un sucessivo terremoto inte el 1183, creando cosita l'attuale suggestiva forma de l'Arena co lo so "ala". Inoltre un mucio de palazi e quasi tute le cese, i monasteri e i monumenti iè stà seriamente danegià, se non butà zo. A sto proposito ghe da dir anca che i veronesi i sà ciavà qualche piera par costruir le case che vedemo visin a l'Arena e più precisamente se pol vedarle inte el cantòn tra via Leoncino e la piasetta prima de via Patuzzi.

I principali monumenti medievali i risale quindi a dopo del XII secolo. In particolar sto periodo el ga visto la costruzion de un saco de edifici de culto, dei quali quelo piasè famoso l'è la Basilica de San Zen, ritegnù uno dei capolavori del romanico in Italia, e ligà a l'omonima Abazia de San Zen, de cui ne resta la torre e alcuni chiostri.

Piaza dei Signori co la statua de Dante e el Palazo del Podestà

Epoca scaligera

El centro storico, in particolar piaza Erbe, piaza dei Signori e piaza San Zen, el presenta vari edifici nati durante la Signoria dei Scaligeri, come el Palazo del Podestà (o Palazo del Goerno) e quelo de Cansignorio.

Importantisimo l'era el sistema difensivo costruio dai Scaligeri, che el fasea perno su Castelvecio, fato costruir da Cangrande II de la Scala insieme al ponte Scaligero. El castel l'è sta tirà su tra el 1354 e el 1376, e l'era pensà no par difendar la sità dai nemici, ma par difendarse proprio dai sitadini; difati el ponte Scaligero el servea par poder scapar via dal castel verso la Germania, dove regnava el genero de Cangrande II, Ludovico el Bavaro. El ponte Scaligero l'è sta costruio ne l'arco de tri anni, tra el 1354 e el 1356, e l'è talmento ciosso che el ga tegnù bota a tute le piene de l'Adese par sié secoli, fin a la note del 24 aprile 1945, quando, a la fin de la seconda guera mondial, i tedeschi, che i stava scapando via, i ga fato saltar tuti i ponti de Verona. Castelvecchio l'ospita inoltre el museo piasè importante de Verona, el museo civico de Castelvecchio.

Veronexi famosi

Tra i scritori e i òmeni de cultura famosi nati a Verona, val la pena de nominar almanco Aleardo Aleardi, Scipione Maffei, Ippolito Pindemonte, Emilio Salgari, el storico Giovanni Battista Biancolini, el umanista Guarino da Verona e el poeta Berto Barbarani. Inoltre se pol zontarghe el architetto Michele Sammicheli, el pitor Paolo Caliari ciamà el Veronese, Cesare Lombroso antropologo, criminologo e giurista. Tra i veronexi famoxi de ancó ghè el genetista Mario Capecchi, premio Nobel par ła medisina inte el 2007 e la Sara Simeoni campionessa olimpica de salto in alto.

Tra le personałità famose che gà visù un tòco a Verona o ghe n'ha parlà in tełe só opere, i tre piesè famosi jè sicuramente Dante Alighieri, William Shakespeare e Wolfgang Amadeus Mozart. N'altro veronexe celebre, anca se no se conoxe propio ben łe só origini, l'è el poeta latìn Catullo.

Tra e persone de cativa fama, ma che le sa fate conossar anca a livel nassional podemo elencar l'assassin Pietro Maso, chel ga copà i so veci, e l'altro assasin Gianfranco Stevanin che el ga copà quatro putane sicuro e forse anche qualche altra femena ma no se sa mia de sicuro.

Evolusion demografica

Abitanti censii

Xemełagi

Albany

Monaco de Baviera

Nagahama

Nîmes

Poła

Saint Josef Teen Noode

Sałisburgo

Varda anca

• Furto de cuadri al Muzeo de Castelvecio del 2015

Altri progetti

• Wikimedia Commons

• Wikimedia Commons el detien imàjini o altri file so Verona
• el detien schemi gràfeghi so