Riva de Biasio

Ła Riva de Biasio se cata a drèta del "Canal Grando", inte el sestièr de Santa Crose.

Biasio "ługaneghèr"

Ła riva ciapa el nome da un çerto Biasio Carnico, un furlan che façeva el mestièr de ługaneghèr. Se dise ch'el sia dasseno esistìo, ma altre vose aferma invese che sia na legenda. El gavea ła so ostarìa in Canpo San Zan Degołà ciamàda "Taverna da Biasio", local conossùo soratuto par le bone ługaneghe ch'el fasseva. El piato ghe gaveva dà fama de esser un bon luganeghèr gera el "sguazzeto", un spezzatìn de carne che vegniva apresà anca da ła zente che rivava da Mestre par magnarlo.

Un dì, intrà tuti quełi che podeva amar sta so speçiałità ghe xe stà anca Toni, carpentièr, na persona precisa e un mucio atenta. El gera andà łà anca eło par provàr sto guazeto, cussì el gà tacà a magnar sta porzion. Mentre ch'el gera drìo bever el broeto pien de gusto, el se inacorze de qualcossa che ghe resta intrà i denti : podeva esser un tòchetin de osso; Toni, essendo schizignoso spua quel'oso che gaveva in boca descoverzendo che parò no pareva par gnente un osso, ma de un deo cèo de un putèło, co anca l'òngia tacàda. Un gran oror, un qualcossa che no se podeva mo' gnanca imaginàr.

Gremìo par sto fato, ma senza farse ciapar dal scatùro, el sconde sto deìn drento int'un fazzoleto fracandoło indrento ła scarsèła pagando e insìndo come se no fusse capità gnente.

Poco tempo drìo sta taverna se gà impegnìo de soldài de ła Quarantia Criminal, che gà slontanà cussì i aventori e rivando in cusina i gà avùdo un bruto spetacoło de vardàr tute ste parti de putèłi tagiài a tòchi, tridài col terìbiłe destìn de deventàr luganeghe e parte de quel guazzeto che Biasio saveva ben de far e de cui el gera altièr, no vołendo verzerse co nissùni riguardo ła so riçeta.

Ła storia continua contando anca de quanti putèłi gera desparìi a Venezia. Descoverto pròpio dal vivo, el gà dovesto confessàr i so atroci dełiti. Condanà a morte, el xe stà strazzinà da un cavàło in còtego: drìo aver avùo man smozzàe ghe xe stàe tacàe al còło e vegnìndo torturà e straportà verso łe do cołone de San Marco e Todaro; ghe xe stàda cavàda ła testa e 'l so còrpo tagià in quatro tòchi cussì pagando tuto quel che gaveva fato a quèłi fantuìni. El so cao xe stà cussì mostrà in Campo San Zan Degołà.

Butàda zo ła ostarìa e ła carbona dove ch'el viveva, l'imàzene de ła so testa xe stàda rapresentàda su'l muro viçin al ponte del campo, e par no vołer desmentegarse de cussì tanto orór xe stà deciso de ciamàrla Riva de San Biasio. Ancùo xe una de łe fermàe de vaporeti presenti su'l Canal Grando.

Sta storia cussì piena de atrocità xe parte del passà, ma anca vardando i tempi inte i cuałi xe capitàda, ła sità gà savùo dar un fio zusto par un móstro come ghe ne xe tanti ne łe società.