Rock

El rock ze un zènare de ła popular music che'l se ga zviłupà inte i Stati Unìi e inte'l Renjo Unìo inte'l corso dei ani sincuanta e sesanta de'l XX sècoło. Inte i ani el tèrmene rock el ze deventà un tèrmene zenèrego doparà par indegar na granda varietà de sotozènari muzegałi che i se ga zviłupà inte'l córer de'l tenpo. El ze n'evołusion de'l rock and roll, un zènare che'l ciapava diretamente dai zènari blues e rhythm and blues de ła mùzega afroamericana e da ła musica country. Ła mùzega rock ła ga anca ciapà fortemente da na serie de altri zènari cofà el blues ełètrego e el folk e el ga incorporà influense da'l jazz, da ła clàsega e da altri stiłi muzegałi. Muzegalmente el rock el ze insentrà so'l dòparo de ła ghitara ełètrega, pardesòłito conpanjada da'l baso ełètrego e da ła bataria. De sòłito, el rock el ze bazà so canson co un tenpo in 4/4 che'l utiłiza na forma strofa-ritorneło, ma el zènare el ze deventà stremanmente vario. Cofà ła mùzega pop, i testi speso i enfatiza l'amor romàntego ma i afronta anca na anpia varietà de altri temi che i ze speso spesiałi o połìteghi.

I muzeghisti rock a metà dei anni sesanta i ga tacà priviłezar l'àlbun so'l singoło cofà forma prinsipałe de espresion e consumo de mùzega rezistrada, co i Beatles in prima łinea in 'sto zviłupo. I só contribudi i ghe ga conferìo a'l zènare na łezitimità culturałe inte'l mainstream e i ga invià n'era de àlbun rock che i ga dominà l'industria muzegal inte i deseni sucesivi. Inte'l parìodo de'l "classic rock" de ła fine dei ani sesanta, A zera za emerzesti numarozi sotozènari distinti de mùzega rock, incluzi ibridi come blues rock, folk rock, country rock, southern rock, raga rock e jazz rock, tanti dei cuałi i ghe ga contribuìo a'l zviłupo de'l rock psichedełico, influensà da ła controcultura dei ani 1960 psichedełica e hippy. Novi zènari emerzesti drioman i includeva el rock progresivo, che'l estendeva i ełementi artìsteghi, el glam rock, che'l meteva in resalto el spetacoło e el stiłe vizivo, e el sotozènare vario e duraùro de l'heavy metal, che'l enfatizava el vołume, ła potensa e ła vełosità. Inte ła segonda metà inte i ani setanta el punk rock el ga reazìo produzendo critiche sosiałe e połìteghe esensiałe ed enèrzeghe. El punk el ga avùo n'influensa inte i ani otanta so ła new wave, so'l post-punk e infin so'l rock alternativo.