Sanpieròta
Ła sanpierota o "sampierota" xe na inbarcasión che ciapa el so nome da San Piero in Volta, uno dei paéxi de l'ixoła litoranea de Pełestrina. Xe na inbarcasión a fondo piato in łegno tìpega de ła tradision łagunar veneta. Deve łe so orìxeni come barca da utiłixàr soratuto par la pesca łagunar, pol esar spènta a remi da do remadóri (uno a pòpe e naltro a pròva) o sanò da uno soło a pòpe (co un remo, o co do remi ne ła vòga dita a ła "vałesana"), da un picoło motor forabordo (normalmente co un masimo de 9.9 cv), o sanò a veła, armàda al "al terso". In sta configurasión l'armo vełico pol eser a so' volta conposto da ła veła méstra (ła randa) isàda su l'albaro méstro, cui fiancarghe un fiòco armà in testa d'albàro, o sanò un "veła de trincheta" isàda su l'albaro de trincheta (sul trasto de pròva).
Se tràta de na evołusión del sandoło; ła so łinea ricorda queła de ła topa ma rispeto a staltra ła xe più curta, łarga e bassa de bordo. Gà ła prova èrta e anpia par megio frontàr łe ónde inte łe boche de porto.
Ła so costrusión xe più senplice rispeto a queła de ła topa, in quanto el scafo xe reałixà seguindo ła natural ełasticità de łe tółe de łegno, sensa bixògno de ricorer a forme e piegaùre a fògo.