Wikipedia

Stasion miłitare de Pierre-sur-Haute

Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Stasion miƚitare de Pierre-sur-Haute
1 canbio in sta version el xe drio spetar ła verìfega. Ła version stàbiłe ła xe sta controłada el 27 oto 2023.

Ła stasion radio miłitare de Pierre-sur-Haute ła xe un sito de etari dedicà a łe comunicasion miłitari fransexi, che se cata inte i comuni de Sauvain e de Job al confin tra łe region Rodano-Alpe e Alvernia (el limite el pasa drento de ła baxe).

Tori de semento co łe atresadure miłitari radio inte ła stasion miłitare de Pierre-sur-Haute

El conpleso miłitare el se trova so ła "Croix de Pierre-sur-Haute", che co i so 1634 m de altesa el xe el ponto pì alto del departemento de ła Loira oltre a segnar el confin col departemento de Puy-de-Dôme.

Oltre a łe instałasion miłitari, el sito el ospita anca na antena de ła tełevixion comerciałe TF1 e un radar de ła Direction générale de l'Aviation civile (DGAC).

Istòria

canbia
 
El tełegrafo otico de Pierre-sur-Haute inte el 1913.

Inte el 1913, el exersito fransexe el costruise sol posto un tełegrafo otico, costituìo da un picoło stàbiłe de pièra co sora el dispoxitivo de comunicasion.

Inte el 1961, durante ła guera freda, ła NATO ghe da al exersito fransexe ła mision de costruir una de łe 82 stasion de ła so rède de trasmision ciamà ACE High, co nòme in còdexe "FLYZ". Inte el 1974, ła responsabiłità del sito la pasa da l'exersito a ła reonautega miłitar. Dal 1988 ła NATO ła ga ciapà in considerasion el smantełamento de ła rède ACE High, che gavarà par conseguensa ła creasion de novi piani de frecuense nasionałi.

Funsion

canbia

Ła stasion miłitar de Pierre-sur-Haute ła xe sua de l'armée de l'air e ła dipende da ła baxe aerea 942 Lyon-Mont Verdun, che se trova a 80 chiłometri dal sito. Ła xe una de łe cuatro stasion radio de l'ase nord-sud, e ła comuega de continuo co chealtre tre: Lacaune, La Borne di Henrichemont e ła baxe aerea de Brétigny. Ła fa cuindi da tramite par łe tełecomunicasion interne de l'exersito, rivardanti prinsipalmente el comando operativo: se pensa che se ła forsa de disuaxion nucleare fransexe ła dovese èsar doparà, el ordine de ataco el podaria pasar da sto sito.

El sito el dipendeva dal "Commandement air des systèmes de surveillance d'information et de communications" (CASSIC) dal momento de ła so creasion el 1º de zugno 1994, e po, a partir dal 1º de genaro 2006, da ła "Direction interarmées des réseaux d'infrastructure et des systèmes d'information" (DIRISI) e da ła so gestion sentrałe a Le Kremlin-Bicêtre.

Direte da un magior, na ventina de persone łe laora sol sito par el so funsionamento e ła so difexa.

Strutura

canbia

Ła stasion ła se cata so un sito de 30 etari infrà i comuni de Sauvain e Job, al confin infrà i departementi de ła Loira e del Puy-de-Dôme. El perimetro el xe sircondà da na alta bariera de legno e metało, e el aceso del personałe miłitare e dei dipendenti el xe garantìo da na strada vietà ai siviłi.

Costrusion

canbia

Ghe xe tre tori. Ła pì alta ła xe na tore de tełecomunicasion siviłi de 55 metri de altesa, de propietà de Télédiffusion de France. Ła tore de tełecomunicasion ła xe sormontà da un radome e ła contien un moduło de controło del sistema "S beacon radar" del trafego aereo, d propietà de ła Diresion xeneral de l'aviasion siviłe. El radar el xe operativo dal 18 de agosto 2021, ma el ga de frecuente malfunsionamenti a cauxa de łe forti nevegade inte ła xona. Łe do tori de cemento łe xe del propietà dei miłitari: łe struture łe xe altre 30 metri e łe xe sta doparae dal 1991 par ła trasmision e ła ricesion radio; łe xe costruìe par rexistare a un ordigno nuclear. Po ghe xe edifisi doparai come garage e ałogi, conpleti de cuxina, sała da pranso e camare; i xe cołegai infrà de łori da tunel, de sirca 400 metri de longhesa totałe, in modo da evitar de caminar in mexo a ła neve co se se sposta da un stàbiłe a 'n altro.

Soteranei

canbia

El tòco pì inportante del sito el xe ła parte soto tera, doparà par łe trasmision: a na vełosità de 2 Mbit/s, łe comunicasion da łe tori łe vien anałixae e po reindirisae a destinasion. I edifisi soto tera i xe stai clasifegai come "infrastrutura de masima sicuresa" soto ła protesion nuclear, biołoxega e chimica. Inte el xergo miłitar, el sito el xe "indurìo": par exenpio, el ga na cełula in semento proteta dai inpulsi eletromagnetisi da na gabia de Faraday e i locałi i xe soto presion, propiamente diti "camare bianche". Ła strutura ła xe dotà de acua e de enerxia eletrica autonoma e de un sistema de risiclo de l'aria independente.

Tentativi de censura

canbia

Seben tante de łe informasion prexenti inte ła voxe łe fuse stae tolte da un documentario, autorixà da ła reonautega miłitar fransexe e trasmeso inte el 2004 da ła tełevixion regional TL7, inte el avriłe del 2013 ła Direction centrale du renseignement intérieur (DCRI, i servizi de intelligence interna fransexi) ła ga dimandà ła scansełasion de ła version fransexe de sta voxe de Wikipedia prima a ła Wikimedia Foundation, che ga rifiutà, po rivolxendose diretamente a Rémi Mathis, presidente de Wikimedia France, minaciando asion legałi contro de lu.[1] L'asociasion Wikimedia France ła ga protestà publicamente co un comunicato stampa in fransexe e inglexe. L'asion del DCRI ła ga vudo ła conseguensa de aumentar de tanto l'atension dei mèdia a liveło fransexe e internasionałe so ła voxe che, oltre a èsar sta rimesa da un utente svìsero so ła version de Wikipedia in lengua fransexe e èsar sta slargà, ła xe stà anca tradota in diverse lengue e asé vixità. El tentativo de oscuramento ga cuindi vudo un efeto contrario determinando chel che xe conosùo come effetto Streisand:[2] ła voxe ła ga infati risevùo 120 000 vixite inte el fin setimana sucesivo[3] e inoltre ła figura, dopo ła visenda, in pì de venti version lenguisteghe de Wikipedia.[4]

Da na anałixi dei acesi so łe difarenti version lenguisteghe de Wikipedia xe posìbiłe oservar el efeto Streisand xenerà da ła dimanda de scansełasion da parte de łe autoridà.

Nùmaro de acesi a ła voxe inte łe difarenti version
Data creasion pàgina Version Avriłe 2013 Marso 2013 Febraro 2013 Genaro 2013 Disenbre 2012
29 de zugno 2021[5] fransexe 224 934[6] 0 0 0 0
6 de avriłe 2013 todesca 14 265[7] No prexente NP NP NP
6 de avriłe 2013 inglexe 13 593[8] No prexente NP NP NP
6 de avriłe 2013 rusa 12 300[9] No prexente NP NP NP
6 de avriłe 2013 cinexe 2 956[10] No prexente NP NP NP
6 de avriłe 2013 olandexe 1 982[11] No prexente NP NP NP
6 de avriłe 2013 spagnòła 1 939[12] No prexente NP NP NP
6 de avriłe 2013 Basic English 1 195[13] No prexente NP NP NP
6 de avriłe 2013 catełana 1 083[14] No prexente NP NP NP
7 de avriłe 2013 itałiana 4 584[15] No prexente NP NP NP
7 de avriłe 2013 giaponexe 1 680[16] No prexente NP NP NP
7 de avriłe 2013 połaca 1 013[17] No prexente NP NP NP
8 de avriłe 2013 ongarexe 1 026[18] No prexente NP NP NP
10 de avriłe 2013 araba 1 473[19] No prexente NP NP NP
13 de avriłe 2013 ceca 3 395[20] No prexente NP NP NP

Altri progeti

canbia

Note

canbia
  1. ↑ (IT) Alberto Mattioli, Finiscono su Wikipedia i segreti militari della Francia, in La Stampa, 9 de avriłe 2013. entrada il 9 de avriłe 2021.
  2. ↑ (IT) Francia: par "sicurezza nazionale", amministratore di Wikipedia costretto a cancellare una voce - Wikinotizieit.wikinews.org. entrada l'11-04-2013.
  3. ↑ (EN) Statistiche del traffico su Wikipedia, aprile 2013stats.grok.se. entrada il 9 de avriłe 2021.
  4. ↑ (IT) Luca Martinelli, Non stuzzicare il wikipediano che dorme, nemmeno se sei un agente segreto francese, in Libertiamo, 9 de avriłe 2013. entrada il 9 de avriłe 2021.
  5. ↑ crono de ła pàgina orixenal so fr.wikipedia.org
  6. ↑ da stats.grok.se
  7. ↑ da stats.grok.se
  8. ↑ da stats.grok.se
  9. ↑ da stats.grok.se
  10. ↑ da stats.grok.se
  11. ↑ da stats.grok.se
  12. ↑ da stats.grok.se
  13. ↑ da stats.grok.se
  14. ↑ da stats.grok.se
  15. ↑ da stats.grok.se
  16. ↑ da stats.grok.se
  17. ↑ da stats.grok.se
  18. ↑ da stats.grok.se
  19. ↑ da stats.grok.se
  20. ↑ da stats.grok.se
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Stasion_miłitare_de_Pierre-sur-Haute&oldid=1176114"