Vajo Streto

El Vajo streto el xe un vajo ke porta su al Corneto, inte el grupo del Sengio Alto. Par rivarghe bisogna ciol ła strada del Re, ke ła parte dal Pian de łe Fugase, a 1162 metri, intrà el Veneto e el Trentin. Sta strada ła xe verta soło fin a ł'Osario del Pasubio, dopo ła xe sarà al trafico. Vegnendo dal Pian de łe Fugase, a 1220 metri de quota, ghe xe, a sinistra de ła strada, ła Malga Corneto. Un trenta metri pi in łà scuminsia su un prà un troso ke'l punta drito verso sud, drento un bosco ceduo, montando in presa. Drento el bosco, ad un çerto punto, el troso diventa na pontara verso sinistra e el se ranpega in mexo ai albari finke no'l riva a ła base rociosa del Corneto. A sto punto, el troso piega a sinistra e el riva a un pasagio de masegne e marugołoti ke se supera tirandose su par un cavo de fero: in sima ghe xe na sfesa streta dove ke bisogna cavarse el xaino par poder pasar. Da kełaltra parte se va xo in un inpluvio de sgrebani e girandose a monte, suła destra se vede ł'inboco del Vajo Streto. Se va su in mexo ai sgrebani, jutandose co naltro cavo de fero, finke no se riva a un punto dove xe incastrà na grande masegna de 4-5 metri de diametro.

Ła masegna incastrà inte el Vajo Streto e ła scała par rivarghe soto

Suła destra na scała de fero de sie metri ła fa rivar soto ła masegna; qua bisogna girarghe soto e vegner fora davanti, giràndoghe intorno. Pi su, el troso sul fondo del vajo el continua, senpre jutandose co un cavo de fero suła destra, finke no se riva in sima. Fora dal vajo el troso el gira a destra e, dopo un giaron in montà dove ke se triboła asè, se riva a ła Seła d'Emełe. Łì riva anca el troso numero 15 ke vien su drito da ła strada del Re; da sto punto se continua a destra, senpre 'ndando su, finke no se cata el troso 45 ke vien su dal Trentin. 'Ndando vanti, se monta fin a ła sima del Corneto, a 1899 metri, anca qua coł'juto de un cavo de fero.