Canpanò

Co la parola canpanò se intende na maniera particolar de sonar le canpane che se costuma doperar ten serte ocasion speciai, tipica del Nord-Est de l'Italja. Esiste diversi modi de sonar a canpanò secont la tradision del posto, la conformasion del canpanil e el numero de canpane a disposision. La tradision la ciameree che se fesse canpanò a mezodì, ma al dì de incoi i canpaner i ga quasi tuti al laoro in fabrica, sichè de solito al apuntamento al gnen spostà a la sera.

In teoria no ghe n'é limiti reguardo a quante canpane che se ol doperar par sonar a canpanò.

Sonar a "cop"

Se ghe ciama a cop el canpanò fàt co na unica canpana. Te un sto caso se dòpera la man sinistra par sonàr co el batocio, e co la destra se péta co un sass te la parte esterna. Par evitar bruti movimenti se se fronta co na spala te la roda de la corda de la canpana. Te la zona aonde che se sona a cop se costuma sonar da 7 o 14 dì prim de la festa del Santo Patrono infin al dì stess. Probabilmente la ultima olta che ze stat sonà a cop la ze stata a Menin (Sess) par San Biasi del 2008.

Sonar "a canpanò" o "a batarela"

Se diss che se fa canpanò o batarela quando ke se sona co 3 canpane (o qualche olta 4). Te un sto caso se liga le canpane ke le stàe čete, podòpo se taca n'antra corda te el batočio de ogni canpana e te la ringhiera del canpanìl (o 'te un qualke altro suporto) tirandola polito in modo da ravesinar al batočio infin a un det de distansa da la canpana. A sto punto baténdo te le corde se le mete in trasion quel tànt ke basta parkè al batočio al rue de petar te la canpana e al la fae sonàr. De solito se sòna la pisola e la granda co la man destra, la mèdia co la sinistra. Se le canpane no le ze in linea se dòpera co una an pié, senò se sona in doi. Aonde che ghe n'è sta tradision de solito se sona i 7 dì prim del Santo Patrono.

Sonar a "canpanon"

Al canpanon al ze al equivalente de la batarela par le Ceze de la part alta de la Provincia de Belun. I canpaner i ga a disposision quatro o sinque canpane, e ogni un no el ghe n sona de pì de doi. De solito le ze grande e le ciapa quasi tut al posto del canpanil, sichè i canpaner ghe toca star te el pericol. Le canpane no le gnen ligade, e le gnen sonade tirando i batoci co le man. Gnen sonà a canpanon le vezilje del Patrono, de Nadal, de Pasqua.

Altri modi de sonar canpanò

Te la part del Trentin che la varda al lago de Garda al sistema de sonar al ze tip quel a batarela, co la diferensa che le corde dei batoci invese de esser paralele le se incrosa e le gnen tirade assialmente. Ten altre parti invese se cata diversi canpaner che i sona co le corde diretamente da la base del canpanil, na canpana a testa, secont sequense prefissade.

Musiche

La sonada a canpanò la gnen fata diferénte 'te un ogni cesa. Inte serti posti ghe n'è la tradision de sonar na musica fìsa tramandada "a rečia" tra le generasion o scrita in qualke maniera. De solito comunque ghe n'è tuta na serie de sequense particolari studiade e perfesionade in tanti ani ke le gnen conbinade insieme secònt la braùra del canpaner in maniera libera da regole fìse. Te un sto caso le sequense le canbia sia pur de poc da na Ceza a quel'altra. Anca al ritmo no el ze mai conpagn parkè al ga da adatarse a la sonada ke fa le canpane e a la acustica del canpanìl.