La canpana la è an strumento musical de solito de bronzo, doperà 'te 'l mondo cristiàn pì ke sia par scandir al tenp da i canpanii de le cese o come richiamo par funsion, ricorense o eventi che reguarda la comunità, e al gnen sonà da i canpaner. Le canpane se le destingue par la so sonada carateristica, fata da la percussion de 'n pendol de fer ciamà batocio su le pareti interne de la canpana.

Canpana de la Chapelle Saint-Antoine a Chastel-sur-Murat, Cantal, Francia

Al nomeCànbia

Secont i studiós, al nome "canpana" al deriva da 'l latin vasa campana, espression ke la indichéa cadin semisferici de bronđo fati 'te la zona de Napoli, la sagoma de i quai la era recordada da le canpane.

Par latin la canpana la era ciamada tintinnabulum, co riferimento a 'l so suono.

Al insieme de le materie ke reguarda al studio de le canpane (storia, tecniche, musicologia, significati) al costituìs la canpanologia.

StoriaCànbia

Pareree ke le canpane pì veče le risale a la Cina de qualche mili ani prim de Cristo. Secont la tradision la canpana co 'l batočo interno la è invese na invension 'taljana: la saree stata introdusesta da San Paolin vescovo de Nola 'te 'l V secolo d.c., anca se no ghe n'è gnissun documento ke ghe intèste la paternità de la invension a 'l Santo.

Le dimension, al suono e la notaCànbia

Al sòno de na canpana al è ligà a 'n equilibrio conplicà de spesòr ke i determina al profilo de la canpana. I spesòr i fa, insieme de la nota principàl e a i sòni parsiai, al sòno de la canpana. La nota, invese, la è determinađa da 'l volume de la cavità inte la canpana: pì al è grant e pì gròsa la sarà la nota, pì al è čeo e pì acuta la sarà la nota. Le canpane le pol eser quindi acordade tra de lore tramite operasion specifiche ke le va a modificar al volume. Esiste diversi tipi de canpane a seconda de 'l spesòr, de la nota e de la forma. Al profilo, ke al čapa al nome de "sagoma", al pol eser diverso (par esenpio) a seconda de le esigense de 'l posto aonde ke sarà metest la nova canpana. Esiste "sagome lidjere" e "sagome pesanti" doperade da i diversi fondiđor. La diferensa la è 'te la qualità de 'l suono fata da na canpana de sagoma pesante. In Italja de solito se fonde pì "lidjer" in confronto a 'l standard de l'Europa central.

Al magiór peso, e quindi al magiór spesór, al fa sì ke la àbie na pì grosa e longa vibrasion del strumento oltre ke an magiór sostegno dei toni parziali, sopratuto quei de ottava inferiore e de terza maggiore, ke i a da eser presenti in ogni campana. De solito la campana in proporsion pì pesante la risulta aver an sòno in general pì càlt e pì graẑioso, mentre na campana "leggera" la è spés strident e spiacevole ale reče.

Na bona campana la pol rivar a emeter fin a 50 toni parziali, ma i pì importanti e sopratut i pì riconosibili i é (rispeto ala nota fondamental):

  • parsiale de "Prima"
  • di "Terza" (ke pol eser magiór o minór)
  • "Quinta" (ke pol eser diminuiđa)
  • "Ottava Superior" e "Ottava Inferior".

Tipi de sonada, funsion e segnaiCànbia

Canpane de cese

  • bot: bot sìngoi par sonàr le ore
  • meridiana: sonada a tre canpane fata a manca an quàrt a meodì te la česa de Vilabruna (Feltre)
  • sonada a na canpana: in ocasión de qualunque celebrasion se al canpanil al à na unica canpana; sonar le avemarie se al canpanil al à pì de na canpana
  • sonada da mort: se sona solke do canpane par nunsiar an mort e par conpagnarlo al simitero dopo al funeràl
  • sonar dópio: se sona a tre canpane par nunsiar la mesa (an quart de ora prima) e co se leđe al Gloria; 'te 'n serti posti anca par conpagnar al mort a 'l simitero
  • sonar ugnol: dopo de er sonà dopio, se sona ugnol (co na canpana solche) par ciamar la đent a messa
  • canpanò: se sona le canpane a concerto qualke dì prima de 'l santo patrono secónt le tradision de 'l posto par nunsiar la festa
  • canpane a martel: se sona a martel par avisar ke ghe n'è an incendio o na aluvion, in modo ke tuti i core a jutar

Campane de edifici civici

  • Convocasion consiglio comunal
  • Mort particolari
  • Aniversari locai e\o nasionai (4 novenber, 25 aprile, 1 majo, 2 giugno e altri)
  • Ore
  • Scóla
  • Vari

Disionario de i termini specificiCànbia

  • CPortante: strutùra, na olta in lenč, incói in ghisa o aciaio, 'ndé ke vien fisà la campana basculante.
  • Asta: stanga, deta anca aspetta, toc ke vien fora dal ceppo 'ndé ke vién colegà na corda par meter in movimento la campana; 'te i sistemi "a slancio" l'è inseriđa inte na strutùra a triangol ciamađa cicogna o bilancia; 'te i sistemi a concerto (inglese, ambrosian, veronexe) e con la pì moderna eletrificasion vien spés sostituiđa dala Ruota.
  • Batocio (dal latin "Bataculum"): toc in fèr tacà a pingolón drento la campana ke baténdo contro i oposti bordi la fa vibràr e risuonàr. Na olta al ñea asicurà al'asola con an nervo de bue o na strika de cuoio, adés vien usa rinforzi e cavet in acciaio.
  • Bocce: pomi (de solito 3) ke i vien imbulonà al de sóra del contrapeso inte 'l sistema ambrosiano e le soe derivasion.
  • Contrapeso o Scatola dei contrappesi: parte de sóra del ceppo ambrosiano ke, riempiđa con piastre de fer, bilanča ralentando la rotasión dela campana.
  • Maneghere: dete anca anse. le forma la corona superiore, ričioli de bronzo ke se trova sora ala campana par colegarla al ceppo (se basculante) o al trave (se fisa) par međo de sbàre in fer e bolói.
  • Isolatore: toc de lenč ke l'à na importantìsima funsion in tute le campane ke se move: al' è infati mes fra le maniglie dela canpana e 'l ceppo; al asorbe le vibrasion ke le ariva al'estremità de sora dela campana, ke se le continuarése le 'ñarie trasmése al ceppo superiore.
  • Perni: i è 2 cilindri ke i vansa fora da i lati de 'l portante e ke i permét al movimento. I è colegài a la strutùra fisa da cusinét, de solito a sfera.
  • Roda: la gnen colegada a destra o a sinistra de 'l portante e de la canpana. Inte la so gola cor la corda, se la canpana la è sonada a man, o na cadena ondesta se ghe n'è na automasion elètrica. Le canpane sensa roda le à la asta.
  • Campana a distesa: se usa sta espresión par indicar la canpana quando ke la sgorla atorno 'an ase squasi baricéntrico e la fà an suono da no scambiarlo con al mezzo slancio o con lo slancio alto, ke i à an asse de rotasione rispettivamente sempre p' distante dal baricentro.
  • Campana a bicchiere o a concerto: se usa sta espresión par indicàr la posisión dela canpana completamente revèsa; sta posisión la vien quando ke la canpana la fà na rotasión de 180°. Ovio ke le canpane a concerto le é tìpike dei sistemi de suono con canpane ke se move; na olta rivađi a la posisión "a bicchiere", la canpana la vien fata giràr per far un o pì rintóki e po' tornar in quéla posision. In serti modi de sonàr, come 'l veronexe, la canpana a concerto la fa part de na sequenza preordinata de rintóki con altre campane; in altri modi la campana a concerto la pól concluder frasi musicai in modo solene o aver na funzion funebre.
  • Campana a slancio: varda la sesion ke segue "classificazione delle campane".
  • Campana controbilanciata: varda la sesion ke segue "classificazione delle campane".

Classificasion de le canpaneCànbia

Le canpane le pol esser classificađe in base a come che le é montade:

  • canpane fisse, cioè colegade a potrèle o sostegni
  • canpane "a slancio", o "a batocio volante"
  • canpane controbilanciade, o "a batocio cadente"

Anca se ale reče del profàn i rintoki dele canpane le pol sembrar tuti compagni, in Italia i esiste diversi sistemi de suono par canpane basculanti, o in movimento, par canpane fìse o ferme e par l'unión de questi doi tipi.

Le canpane fìseCànbia

Le é senza ceppo, cioè contrappeso, parké no le à da compier osilasion de nisun genere; le é quindi ferme, tacađe a putrele o travi; le vien sonađe con la percusión del batoč de entro o de martèi de fòra (čiamađi "elettrobattenti" se ge n'é la elettrificasion). In Italia le canpane fìse le é squasi sempre pičole e fracađe drento te l' campanìl, speče se le fa part de 'n complèso de canpane. Nei carilon, difusi te 'l nord Europa, le riva anca a 60 o pì esemplari te 'n solo campanìl.

Le campane "a slancio" o "a batocio volante"Cànbia

Le è canpane dotade de 'n portante lidjer, cioè poch contrapesade, e par sto motiu le pol er ossilasion svelte, fando cossì bot vesini te 'l tenp un a quelaltro.

Te i sistemi a slancio "classico", par far suono le à da donder almanco i 60° de inclinasion (anca se esiste sistemi a slancio co 'l batocio dotà de 'n dopio snodo par poder sonar anca co 'l movimento pì pisol). Ten sto sistema de sonar al batocio al è ingancià sot a i perni de rotasion sichè al va a petar te 'l bronđo senper verso in sù; se diss che al batocio, che de solito al è pì pesante rispeto a i altri sistemi de montajo, al ""caresa la canpana".

ten sto sistema de montajo al batocio al se destaca subito dopo al bot e quindi no 'l smorsa i armonici rendendo libere le vibrasion a 'l contrario de 'l sistema controbilancià. Par sto tant le canpane a slancio le mancen vibrasion par pì tant tenp. Al sistema al è tipico in tuta Europa (es: "changeringing" inglese ), te 'l sistema emiljan, inte 'l centro e inte 'l Sud Italja, 'te 'l Tirol e 'ten serte bande de 'l Triveneto.

Le canpane "controbilanciade" o "a batocio cascante"Cànbia

le è canpane dotade de 'l portante pesante, cioè tant contrapesade, e par sto tant le pol far ossilasion pitost lente, fando cossì na serie de bot distanti 'te 'l tenp un da quelaltro. Da' che le è tant contrapesade le donde fasilmente la posision "a goto", cioè le fa fasilmente na rotasion de 180° dopo poche ossilasion. le sona pena che le gnen inclinade, parchè 'ten sto tipo de canpane al batocio al è ingancià pì in sù o a 'l stesso livel rispeto a la altesa de i perni de rotasion sichè al va a petar te 'l bronđo senpre verso al bass.

Curiosità e noteCànbia

  • Le canpane che le à de pì de 50 ani da la so fusion le è an ben artistico, tutelà quindi da la Sovraintendensa par i beni Artistici e Storici, no le pol quindi gner vendeste o fondeste da novo.
  • Ogni canpana metesta su 'n canpanil la è dedicada a un o pì Santi e la à sù decorasion a tema. In pì, quasi senper le à sù inscrision par latin o par la parlada uficial de 'l posto che le reguarda al an de fusion, al nome de 'l fondidor e qualche olta anca de quei che, co oferte varie, i à contribuì a la fusion de quel bronđo.
  • Ten tanti posti, ogni vendre a le 15.00, se costuma infin da tenp lontani de sonar le "agonie", cioè 33 bòt in memoria de la mort de la mort de Gesù.
  • Da' che l'Italja la è caraterizada da sistemi de sonada e de montajo che i canbia da rejon a rejon (e tante olte tra le singole province), è nassest diverse società e associasion de canpaner 'te le diverse rejon 'taljane, par salvaguardar e promuover sta antica arte.
  • Inte la civiltà rural le canpane le à senper abù al conpito de sonar a 'l ruar de bruti tenporai o de la tenpesta, 'te la speransa de deslontanarli e quindi de salvar i racolt; 'te le orasion scrite sora le canpane se cata da spess ste formule: "a fulgure et tempestate libera nos Domine" opur "recedat spiritus procellarum" o "Defunctos ploro-nimbos fugo-festaque honoro".
  • San Paolino vescovo de Nola al è considerà al protetor de i canpaner. Santa Barbara, anca ela patrona de i canpaner, la cognossesta anca come la santa che proteje tute le persone che 'te 'l so laoro le à a che far co 'l pericol de mort instantanea, come i artificer, i artiljer, i carpentier (quindi anca le persone che le laora su le tor canpanarie: mecanici instalador, inpiegati de la manutension e canpaner), i minador e i geologi. Dess la è venerada anca come la protetrice de i Vigili del fogo.
  • Santa Barbara considerada anca ela patrona de i canpaner. La so storia la diss che dopo de esser stata serada sù 'te na tor, la sie stata martirizada par man de 'l pare, che subito dopo erghe tajà la testa al è stat ciapà da na saeta. Da lora la tradision la ghe atribuiss a la Santa la capacità de controlar le saete. Al è ovio quindi par i canpaner torla come protetrice, da' che 'te le stesse canpane se cata inscrision a reguardo, come che è belche stat dit.
  • Anca Sant'Antoni abate al pol esser considerà come patrono de i canpaner, da' che 'te la so iconografia al gnen representà co na canpana 'te la man.
  • Inte i tre dì de la Setimana Santa de Pasqua, 'te le cese cristiane catoliche e anglicane al è in uso de no sonar le canpane ('te 'l rito anbrosian se le sona infin a 'l nunsio de la mort de N.S. de 'l Vendre Sant), che le gnen sostituide da i cosideti "instrumenta tenebrorum": sti qua i deriva da i "semantron", cioè da tole de legn, ancora dess doperade 'te la Cesa cristianaortodossa e catolica oriental. I gnen ciamadi anca "sacrum lignum": se trata de tolete su le quale è tacà de le maneghere de fer, che co se le sgorla le bat e le fa an rumor sordo. In Spagna an strumento che 'l ghe someja al se ciama "matraca": al è de grosse dimansion e al è instalà diretamente su i canpanii. Inte la Provincia de Belun invese se costumea sonar le sgreole.
  • Inte la California meridional, 'te 'l sito de na mission spagnola, è stat catà de 'l 1920 na canpana che la ea sù la inscrision: "Inte 'l an 1796, 'te 'l mese de genaro, sta canpana la è stata fondesta 'te l'isola de Kodiak co la benedision de 'l archimandrita Joaseph, durante la permanensa de Alexandr Baranov". No 'l è ciar ten che modo che sta canpana ortodossa russa, da Kodiak, citadina de la Alaska la sie dondesta cossì distante.

AudioCànbia

 Melodia sonada da le canpane de Westminster

VideoCànbia

Varda ancaCànbia

Altri progetiCànbia

Colegamenti esterniCànbia

Controło de autoritàLCCN (ENsh85013057 · GND (DE4021292-0 · NDL (ENJA00564859
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Canpana&oldid=955853"